1 Meno, Yude mundongo wu Yesu Klisto, mpangi yi zaki, ku yeno bantu, Nzambi Tata bakatumisa na bakatiidi mpe bakwe kebongo ku Yesu-Klisto. 2 Bika ti nkenda, kiyenge na luzolo bitoma nyeka ku yeno!

3 Mpangi zani zizola, na bedi na nsatu yi vudidi kitezo mu lusonikina, mu dyambu ditadidi mpulusu yii neto kintwadi. Kansi nayeni bumbote mu lusonikina mukanda bewuwu, mwanki na lusyamisa mu nwana mu dyambu di kiminu ki haana Nzambi ku bantu bamvimba bakavwidi.

4 Mu dyambu ti, kuu na bantu bambi bakotidi mu kinsweki ha kati dyeno. Bantu bebobo kitumbu kyawu ntama kisonama, mu dyambu ti bakwe balulanga mulemvo wu Nzambi eto, mwanki baba na kimpwanza mu sadila kinsuza na bakwe nyafunanga Yesu-Klisto, Mulongisi eto wumosi kaka na Mfumu eto.

5 Nzebi ti walutomini zaba bumbote, kansi ntiidi mu lubambula moyo ti Mfumu wuvuukisa bantu ba-Isaeli ku nsi yi Ngipiti, mboki wusa ti yobobo balembolo mukwikila bafwa. 6 Bambukeeno moyo mu zimbazi zilembana mu keba bibuka bi buzitu byo Nzambi bi kabatuula, banyafuna bibuka byawu: ni kabakanga mu misinga mi bisengo. Bayendila bakangama ku kitombe kii ku nsi mimvu ka mimvu, natee mu kilumbu kikinene ki mfundusu. 7 Bambukeeno moyo zimbanza zi Sodomo na Ngomola na zimbanza zilembolo ba nawu kitatu: Bantu bedi zinganga mu mbanza bezozo, bakiyekola mu kinsuza bonso buba zimbazi bezozo, na basosa dyaka mu vukisa nitu mulembolo zitisa Misiku. Yawu bana tambula mpasi zi tiya tu mimvu ka mimvu, yiyiyi nkatika ndwengosolo yidi ku bantu bamvimba.

8 Bumosi mpe, bantu bebobo bakota mu kinsweki ha kati dyeno nkadulu yibobo yii nawu: mayindu mawu makwe banatanga mu sumuna nitu zawu, mpe bakwe safulanga kimfumu ki Nzambi, na bakwe tyakanga zimbazi zii mu nkembo ku mazulu. 9 Mikali, mfumu yi zimbazi, kasa bo ko. Bu kedi bindana mpaka na Nkadyampemba mu nwanina nitu yi Mose, Mikali katonta mu mufunda mu mpova zi busafu ko, kansi wumuteela ti: «Bika Mfumu kakusemba!» 10 Bantu bebobo bakwe tyakanga myo mi balembolo zaba, kansi myo mi bazebi, mu kimuntu kyawu kwandi bazabidi myo bonso bibulu bilembolo ba na madyela. Myamyomyo mikwe bazimbisanga. 11 Kyadi ku yawu! Mu dyambu ti balanda nzila yi Kayini. Mu dyambu di mufutu, bakiyekola mu nzimbukusu bonso Balami. Mpe yawu bafwa bu banangumuka bonso busa Kole* note. – Balami: tala Ltg 22.1-35. – Kole: tala Ltg 16.1-35 . 12 Yawu bakwe tesisanga masakuba mu ntangu yi lukwe dyanga bindya bi kimpangi. Bakwe dyanga mpe bakwe nwanga ka mu yena nsoni ko, nitu zawu kwandi bakwe banzilanga. Badi bonso matuti mana kwe nati mupepe wulembolo mvula. Badi mpe bonso miti milembolo ba na mimbutu mu ntangu yi ntombo, mpe bu bavuza myo, mitomini fwa nkatika kufwa. 13 Bantu bebobo, bafwanakani bonso bipo bingolo bi mamba ma mubu. Bakwe mwanganga mavanga mawu mansoni bonso bipo bikwe loosanga mubu. Badi bonso zimbwetete zikwe kwe dyengidingi. Nzambi wubalundila kibuka ki mimvu ka mimvu ku nsye tombe kii na bokoboko.

14 Ni mu dyambu dyawu mpe Enoki, nkaka yi nsambwadi tuuka Adami, kabikudila ebu: «Tala! Mfumu waakwiza na makumi ma mafunda ma zimbazi zandi zilongo, 15 mu fundisa bantu bamvimba. Waabedisa bantu bamvimba bambi mu mavanga mawu ma basadila na waababedisa mu mpova zimbalu zi baduukisa ha ntadisi andi.» 16 Ntangu zimvimba, bantu bebobo bana kwe vunguti na bana kwe nyongi. Bana kwe landi nsatu zawu zimbi, bana kwe duukisi mpova zi mayama mpe bana kwe lebi bantu mu babakila ndandu.

17 Kansi yeno zimpangi zani zizola, bambukeeno moyo mu misamu mi balusamunina, tuuka ntama, ku zintumwa zi Mfumu eto Yesu-Klisto. 18 Mu dyambu ti, baluteela ti: «Mu bilumbu bimanunu, kwaaba na bantu baaluyodila mpe baadyatila bonso budi nsatu zawu zimbi.» 19 Ni yabobo bakwe twalanga nkabani. Mboki bakwe twadusungu mu nsatu zawu zi kimuntu, kansi ka mu Mpeve yi Nzambi ko. 20 Kansi, yeno zimpangi zani, tatamaneeno mu tunga luzingu lweno ha lufulu lu kiminu kyeno kilongo. Sambileeno mu lulendo lu Mpeve Yilongo. 21 Tatamaneeno muba mu kati di luzolo lu Nzambi, bu luna kingila nkenda zi mfumu eto Yesu-Klisto mu baka luzingu lu mimvu ka mimvu.

22 Beeno na nkenda ku ba nga maketiketi. 23 Bavuukiseeno mu basa kitatu na tiya tu mfundusu. Fwileeno bahiika nkenda. Kansi kebeeno kweno mu ba kintwadi nawu, mu dyambu ti binkutu byawu bii na mvindu mu mavanga mawu mambi.

24 Ku yondowo wulendi lukeba mu kyonso kibwa, mpe wulendi luyenikisa wulembolo kyeta na bafuluka mu kyese ha ntadisi yi nkembo andi, 25 ku Nzambi yimosi kwandi yidi Muvuukisi eto, mu nzila yi Yesu-Klisto, Mfumu eto. Bika ti nkembo, bunene, lulendo mpe kimfumu biba nandi, tuuka mu mbadukulu, bwabu natee mu ntangu zimvimba! Ameni!