1 Buuku bedidi dina zabikisa misamu miba miswama, Nzambi mi kahaana ku Yesu-Klisto, mwanki kalonka ku mindongo myandi misamu myatuula mu mwa ntangu yifyoti. Klisto wutambika mbazi andi ku mundongo andi Yoane mu muzabikisa myo. 2 Yoane wuteedi kimbangi mu misamu mimvimba mi kayeni: ni Mambu ma Nzambi na kikedika kizabukusu mu nzila yi Yesu-Klisto. 3 Kyese ku yondowo tengi buuku bedidi, kyese ku yobobo bayudi mpova zi mbikudulu beyiyi na bakebidi bumbote misamu mibasonikini momo! Mu dyambu ti ntangu yikubuku misamu mimvimba bemyomyo yeka bela-bela mu tula.

4 Meno Yoane nsonikini ku mabundu nsambwadi maa ku kizunga ki Aziya: bika Nzambi wudi, wuba na wuna kwiza na zimpeve nsambwadi zidi ha ntadisi yi kyandu kyandi ki kintinu, baluhaana lusakumunu na kiyenge. 5 Bika Yesu-Klisto, mbangi yikwikama, muntu wuntete wubutuka na wufuluka mu bafwa, mpe yandi wudi mfumu yi zintinu zii ha luse lu butoto, kaluhaana lusakumunu na kiyenge.

Klisto wututiidi, mpe mu menga mandi, wutukuula mu masumu meto, 6 mpe wutusa bantu ba kimfumu ki zinganga-Nzambi mu sadila Nzambi Tata andi. Bika nkembo na lulendo lusikila ku yandi mimvu ka mimvu! Ameni.

7 Taleeno, wuna kwiza mu matuti! Bantu bamvimba baamuyena, na yobobo mpe bamutobola lubanzi. Bantu ba bifumba bimvimba bii ha luse lu butoto, baadila mu dyambu dyandi. Ninga, bwabobo bwaabeela!

8 Mfumu Nzambi wuna ta ti: «Meno nidi alafa na omega», yondowo wudi, wuba na wuna kwiza, ni Mfumu wuu na lulendo lumvimba.

9 Meno Yoane, mpangi eno, nii kintwadi neeno mu kati di mfyetokoso, mu kimfumu na mu mvibudulumu mu Yesu. Naba ku kizanga kii nkumbu Patamose mu dyambu di Mambu ma Nzambi na kimbangi mu Yesu. 10 Mu kilumbu ki Mfumu, Mpeve bu yimbaka, nayuwa ku manima mani, ndinga yingolo bonso muningu wu kulumenta, 11 yita ti :«Misamu mi wuna yena, sonika myo mu buuku, mpe tambika dyo ku mabundu nsambwadi ema: Efeso, Similine, Pelengame, Tiyatili, Saledesi, Filadelefi na Lawodise.»

12 Ni natala ku manima mu yena yondowo wedi nzonzila. Ni nayena bitentokolo nsambwadi bi minda bi wola. 13 Mpe ha kati-kati di bitentokolo bi minda, haba na muntu wedi fwanakana bonso mwana muntu. Wuba wulwata zwele didila na melika yi wola yikangama ha ntulu. 14 Milengi myandi miba bonso mika mi dimeme dimpembe, hoti bonso mvula zii na vekoveko, mpe meso mandi medi lezima bonso milaka mi tiya, 15 malu mandi medi lezima bonso kisengo ki baduukisi ku tiya, mpe ndinga andi yedi yuwakana bonso mamba mamanene ma ntadi mana bwa. 16 Wuba wusimba mbwetete nsambwadi mu kooko kwandi ku lubakala, mpe mu munwa andi, mwedi duuka mbele yimosi yiyila yilwenga, yiba meeno mu ndambu ka ndambu. Kini kyandi kyedi lezima bonso ntangu ha mbata. 17 Bu namuyena, nina bwa ha malu mandi bonso muntu wufwa. Wuntentika kooko kwandi ku lubakala na wuta ti: «Kuyenandi bunkuta ko! Meno ni wuntete na wumanunu, 18 wumoyo nidi. Naba wufwa, kansi bwabu nidi wumoyo mimvu ka mimvu. Nidi na lulendo mu lufwa na mu nsi yi bafwa. 19 Sonika bwabu misamu mi wuyeni, mina hyoka bubedidi na mina kwiza ku manima. 20 Mu myo mitadidi mansweki ma mbwetete nsambwadi zi wuyeni mu kooko kwani ku lubakala na bitentokolo nsambwadi bi minda mi wola: mbwetete nsambwadi ni zimbazi zi Mabundu nsambwadi, mpe bitentokolo nsambwadi bi minda ni Mabundu nsambwadi.»