1 «Sonika ku mbazi yi dibundu dii ku mbanza yi Efeso: "Yondowo simbidi mbwetete nsambwadi mu kooko kwandi ku lubakala, wuna kwe dyati ha kati di bitentokolo nsambwadi bi minda bi wola, ebu kateedi: 2 Nzebi nsadulu aku, mpasi zaku na mvibudulu aku. Nzebi ti kwe vibidilanga bantu baa na mbalu ko. Wutontidi yobobo bakwe tanga ti zintumwa badi, kansi badi awu bo ko, mpe bakudi ti bantu ba luvunu kwandi badi. 3 Mvibudulu zii naku, mpasi zizingi yeni mu dyambu di nkumbu ani, mpe bebidi ko. 4 Kansi, musamu wu naani nina kusembila, mu dyambu ti wulosidi luzolo lwaku luntete. 5 Bambuka moyo hedi wubwididi, viluka mpe sadila nsadulu zaku zintete. Tala ti vilukidi ko, mbo niza ku ngeye, mbo nakukatula kitentokolo ki mwinda aku ha kibuka kyandi. 6 Kansi dyambu dimbote di nina kutondila, bu wubedidi nsadulu zi bantu ba kimvuka ki Nikolayite bonso meno mpe bu na bedidi zo.

7 Yondowo wuu na makutu, kayuwa misamu bemyomyo mina ta Mpeve ku mabundu! Ku yondowo nungini, naamuhaana kadya mbutu zi muti wu luzingu, wudi mu paladiso di Nzambi."»

8 «Sonika ku mbazi yi dibundu dii ku mbanza yi Similine: "Muntu wuntete na wumanunu, yondowo wufwa na wufuluka mu bafwa, ebu kateedi: 9 Nzebi mpasi zaku na bumputu bwaku, nsyongono mvwama wudi. Nzebi bituku bimbalu bikwe kutukanga bahiika. Bakwe tanga ti Bayudayo badi, kansi badi awu bo ko: kimvuka ki Satana badi! 10 Kuyenandi bunkuta mu misamu bemyomyo mi waayenina mpasi ko. Tala, ha kati dyeno nkadyampemba waalutonta bu kaatuba babingi mu boloko. Mu bilumbu kumi baalukwamisa. Ba wukwikama natee lufwa, mbo nakuhaana luzingu bonso mpu yi ndungunu.

11 Yondowo wuu na makutu, kayuwa misamu bemyomyo mina ta Mpeve ku mabundu! Ku yondowo nungini, kaayena bunkuta bu lufwa lunzole ko."»

12 «Sonika ku mbazi yi dibundu dii ku mbanza yi Pelengame: "Yondowo wuu na mbele yiyila yilwenga, yii meeno mu ndambu ka ndambu, ebu kateedi: 13 Nzebi kwedi kwe zakidilanga: kokoko kuu kyandu ki kintinu ki Satana. Ngeye wukangama nakekete wudi mu nkumbu ani. Wunyafuni kiminu kyani ko, kaati mu ntangu yi bahonda ku kweno, Antipase mbangi ani yikwikama, kokoko kukwe zakidilanga Satana! 14 Kansi, mwa ndambu yi misamu mimbi nina kusembila: mu dyambu ti ku kwaku, wuu na bantu badi bakangama mu ndongosolo yi Balami. Yondowo wuhaana mayindu ku Balaki mu tambila bisi-Isaeli mutambu, mwanki badya mbizi zi bibulu bibahaana munkayulu ku biteki na basadila kindumba. 15 Bumosi mpe, kudi dyaka na bantu bakangama mu ndongosolo yi kimvuka ki Nikolayite. 16 Ni hahoho, viluka bwabu. Nganunu, mbo niza mu nswalu ku ngeye mpe mbo nanwanisa bantu bebobo mu mbele yiyila, yina duuka mu munwa ani.

17 Yondowo wuu na makutu, kayuwa misamu bemyomyo mina ta Mpeve ku mabundu! Ku yondowo nungini, naahaana maana maa maswama. Naahaana dyaka mpe tadi dimpembe dibasonikini ha yulu nkumbu yimoona, yilembolo zabu ku muntu, tala ti ka yondowo tambudi yo ko."»

18 «Sonika ku mbazi yi dibundu dii ku mbanza yi Tiyatili: "Mwana wu Nzambi, yondowo wuu na meso mana lezima bonso milaka mi tiya, mpe wuu na malu bonso kisengo kibaduukisi ku tiya, ebu kateedi: 19 Nzebi nsadulu zaku, luzolo lwaku, kiminu kyaku, mpeve aku yi nsalasani, mvibudulu aku. Nzebi ti nsadulu zaku zi bubedidi zivudidi bubwingi na zintete. 20 Kansi, misamu mii naani nina kusembila: wubikidi Yezabeli kahidika mi katiidi. Mukento bewowo wuna kibika mu mbikudi wu Nzambi, kansi wuna huna bisadi byani, mu bahukumuna mu ndongosolo yi luvunu mwanki badya mbizi zi bibulu bibahaana bonso munkayulu ku biteki. 21 Namuheeni ntangu mwanki kaviluka, kansi bisidi kwandi mu bika kindumba. 22 Ni hahoho, nina mulambikisa ha mbuka yi mpasi zihyokidi kitezo, ha kimosi na yobobo bakwe sadilanga kinsuza nandi, tala ti babisidi nsadulu zandi ko. 23 Mpe naahondisa baala bandi. Bwabobo mabundu mamvimba maazabila ti meno ni yondowo kwe fimpanga misamu mii ku nsye mutima na kwe bakulanga mabanza ma bantu. Mbo nasenda kadi muntu bonso budi mavanga mandi."

24 Ku yeeno bantu ba dibundu di ku mbanza yi Tiyatili, lulembolo kangama mu ndongosolo beyoyo, mpe lulongoka misamu bemyomyo ko mi bakwe tumisinanga ti "Mansweki mampinda ma Satana", ebu nina luteela: nalukwikidi kizitu kihiika ko. 25 Kansi, kangameeno nakekete mu ndongosolo zi lutambudi natee bu naavutuka.

26 Ku yondowo nungini, mpe wuna landa bumbote nsadulu zani natee ku nsukunu, mbo namuhaana lulendo mu yaala zinsi.

27 Waabatwadisa mu kibakala na muhangu wu kimfumu wu kisengo mpe waababula bonso bu bakwe budilanga masanga ma tubumba, 28 bonso mebende natambudi lulendo belolo ku Tata ani. Mpe naamuhaana lubwetete lu mene.

29 Yondowo wuu na makutu, kayuwa misamu bemyomyo mina ta Mpeve ku mabundu!»