1 Bu nayena Mwana Dimeme bu kazibula kimosi mu bikangulu nsambwadi, ni nayuwa kihangu kimosi mu bihangu biya bimoyo, kyedi zonza mu ndinga yii bonso mumbamina ti: «Yiza!» 2 Ni nayena mpunda yimosi yimpembe na yondowo wuba wuzakala ha yulu andi na kitubulu ki dyonga mu kooko, bamuhaana mpu yimosi yi nungunu. Ni kayenda bonso muntu wunungini mu kwe nunga dyaka.

3 Bu kazibula kikangulu kinzole, ni nayuwa kihangu kinzole kimoyo kyedi ta ti: «Yiza!» 4 Bwabu ni nayena mpunda yihiika yimbwaki bonso tiya. Mpe yondowo wuba wuzakala ha yulu andi, bamuhaana lulendo lwe katula kiyenge ha luse lu butoto mwanki bantu bahondasana yawu na yawu. Ni bamuhaana mbele yiyila yi mvita.

5 Bu kazibula kikangulu kitatu, ni nayuwa kihangu kitatu kimoyo kyedi ta ti: «Yiza!» Nina yena mpunda yindombe. Yondowo wuba wuzakala ha yulu andi, wusimba kipezolo kimosi mu kooko kwandi. 6 Mpe nayuwa bonso ndinga ha kati-kati di bihangu biya bimoyo yedi ta ti: «Kitezo kimosi ki bele mu mufutu wu kilumbu kimvimba, mpe bitezo bitatu bi oloze mu mufutu wu kilumbu kimvimba. Kansi kufuukisandi mafuta na vinu ko.»

7 Bu kazibula kikangulu kiya, nina yuwa ndinga yi kihangu kiya kimoyo yedi ta ti: «Yiza!» 8 Ni nayena mpunda yimosi yi mamba ma ntoba. Yondowo wuba wuzakala ha yulu andi, nkumbu andi Lufwa, mpe nsi yi bafwa yedi kwe mulandi. Ni babahaana lulendo lwe yaadila ndambu yimosi mu ndambu ziya zi luse lu butoto mwanki bahondoso bantu mu mvita, mu malema, mu mayeela na mu bibulu bimbalu bi luse lu butoto.

9 Bu kazibula kikangulu kitanu, nina yena ku nsye ziku diba kwe yokilanga minkayulu, myela mi bantu bebobo babahonda mu kingolo mu dyambu di Mambu ma Nzambi, mpe mu dyambu di kimbangi ki bata. 10 Baalooka mu ndinga yingolo na bata ti: «Mfumu yilongo na yikedika, natee nkye ntangu wuna kingila mu fundisa na mu vutula mambi ku bantu bana zinga ha luse lu butoto, mu dyambu di menga meto e?» 11 Zwele didila dimpembe dihaanu ku kadi muntu mu yawu, ni babateela bavividila dyaka mwa ntangu yifyoti, natee kwalunga bakundi bawu ba kisalu na zimpangi zawu zibafweti honda bonso yawu mpe.

12 Bu kazibula kikangulu kisambanu, ni nayena butoto bwedi zakamanga mu ngolo zimvimba. Ntangu yiyiza kituka nabokoboko bonso mpimpa, mpe ngonda yimvimba yiyiza kituka yimbwaki bonso menga, 13 mpe mbwetete zii ku yulu zibwa ha butoto bonso bukwe bwilanga mbutu zinkunzu zi muti wu fike wuningusu ku kitembo kingolo. 14 Yulu dizimbala bonso buuku dibazingidi, milandu mimvimba na bizanga bikatuka ha bifulu byawu. 15 Ntinu zii ha luse lu butoto, zinkuluntu, mfumu zi zimbulu-mbulu, zimvwama, bantu baa na lulendo, bamvimba, mindongo mimvimba na bantu baa na kimpwanza, baswama mu mabulu na mu nsye matadi mamanene maa mu milandu. 16 Bazonza ku milandu na ku matadi ma mamanene ti: «Tubwidileeno na tuswekeeno kitatu na kiini ki yondowo wudi wuzakala ha kyandu ki kintinu, mpe kitatu na mankesi ma Mwana Dimeme. 17 Mu dyambu ti kilumbu kikinene ki mankesi mawu kitudidi, mpe nani lenda vibidila e?»