1 Ku manima ma misamu bemyomyo, nina yena ku yulu, mwelo wumosi wuzibuka. Ndinga yintete yi nayuwa yedi zonza naani, yitendana bonso muningu wu kulumenta yita ti: «Maka eha, na mbo nakulonka misamu bemyomyo myaakwiza ku manima.»

2 Hansi na nsi, Mpeve yimbaka. Ni nayena ku yulu, kyandu ki kintinu kimosi. Ha yulu kyandu ki kintinu bekyokyo, muntu wumosi wuba wuzakala, 3 wedi lezima bonso matadi mantalu ma bakwe tumisinanga ti zasipi na saladwani. Mpe mukyama wuzungidila kyandu ki kintinu, wedi lezima bonso tadi di bakwe tumisinanga ti emelode. 4 Kyandu ki kintinu kiba kizungudulu ku byandu bi kintinu makumole na ya (24), mpe makumole na ya (24) ma binunu biba bizakala momo. Bilwata binkutu bimpembe na zimpu zi kintinu zi wola. 5 Ha kyandu ki kintinu, hedi duukanga mpedamu, zindinga na mimbamina. Hantadisi yi kyandu ki kintinu, minda nsambwadi mi milaka mi tiya myedi hyanga: midi ni mpeve nsambwadi zi Nzambi. 6 Hantadisi yi kyandu ki kintinu, haba bonso mubu wuu nakyenzikyenzi wufwanakana na tadi dikwe yenikisanga bima bii ku kinima. Ha kati-kati di kyandu ki kintinu na mu kinzungudila ki kyandu ki kintinu, haba na bihangu biya bimoyo, biba bifuluka mu meso ku mutwala na ku manima.

7 Kihangu kintete kimoyo kifwanakana na nkosi, kinzole kifwanakana na ngombe yintwenya yimbakala, kitatu kiba na kiini kifwanakana na muntu, mpe kiya kifwanakana na mbemba yina kwe pidumuki mu yulu. 8 Kimosi-kimosi mu bihangu biya bebyobyo bimoyo, biba na mahahi masambanu mafuluka mu meso ku kati na ku mbazi, mpe mpimpa na mwini bitatamana mu ta ti:

«Wulongo, Wulongo, Wulongo Mfumu, Nzambi wuu na lulendo lumvimba,

yondowo wuba, wudi na wuna kwiza.»

9 Bihangu biya bimoyo bebyobyo bu byaahaana nkembo na masiika, mpe kuvutula matondo ku yondowo zakadi ha kyandu ki kintinu, ku yondowo wuna zinga mimvu ka mimvu, 10 zinkuluntu makumole na ziya zaafukama ha ntadisi yi yondowo zakadi ha kyandu ki kintinu, zaadongimina yondowo wuna zinga mimvu ka mimvu, mpe bu zaalosa zimpu zawu zi kintinu ha ntadisi yi kyandu ki kintinu, mbo zita ti:

11 «Ngeye Mfumu eto na Nzambi eto, wulunga wudi mu tambula nkembo, masiika na lulendo.

Mu dyambu ti ngeye wuhidika bima bimvimba,

mu luzolo lwaku ni biba, mpe ni bihiduku.»