1 Ku manima ma misamu bemyomyo, nayena mbazi yimosi yihiika yifuma ku yulu yedi kulumuka, yiba na luyaalu lulunene, mpe nkembo andi yikyenzola luse lu butoto. 2 Yilooka mu ndinga yingolo ti: «Yibwidi, yibwidi, mbanza yiyinene yi Babiloni! Yeka kiswamunu ki zimpeve zimbi, kiswamunu ki kadi mpeve yilembolo ba yivedila, kiswamunu ki kadi nuni yilembolo ba yivedila, kiswamunu ki kadi kibulu kilembolo ba kivedila na ki balembolo tya. 3 Mikangu mimvimba minwini vinu di kindumba kyandi kingolo, mu dyambu ti zintinu zii ha luse lu butoto zisidi kindumba nandi, mpe minkiti mii ha luse lu butoto mivwemi mu lulendo lu bimvwama byandi bintalu.»

4 Nayuwa mu mazulu ndinga yihiika yita ti: «Duukeeno ha kati di mbanza, yeeno mukangu ani, mwanki lulembolo kota kintwadi na masumu mandi, mpe lulembolo yena mpasi ha kimosi nandi mayeela bu maamusemba. 5 Mu dyambu ti, masumu mandi matomini nyeka mpe matudidi natee ku mazulu, mpe Nzambi bambukidi moyo mambi mandi. 6 Muhidikileeno misamu bonso bu kahidikila myo bahiika, muvutudileeno nkumbu zole mambi ma kahidika. Fuluseeno nkumbu zole mbungu andi mu malamu mahyokidi ngolo na momo makanwikisa banandi. 7 Muvutudileeno mpasi na kyadi bifwanakani na nkembo na mayama ma bimvwama byandi bintalu. Mu dyambu ti, teedi ku nsye mutima andi ti: "Nzakadi ehaha bonso ntinu yi mukento, nidi foola ko mpe naasala kota mu kifwidi ko." 8 Ni hahoho, mayeela ma ba mukubikidi, maamubwidila mu kilumbu kimosi: lufwa, kifwidi na malema, mpe waanyenga ku tiya. Mu dyambu ti, Mfumu Nzambi wumufundisi, ngolo kadi.»

9 Ntinu zii ha luse lu butoto zisidi kindumba nandi na zikabudi kimvwama kyandi kikinene, zaadila na zaakota mu manyongo mu dyambu dyandi, bu zaayena mwisi wunkobo wu kana nyengina. 10 Zaaba kitatu, mu dyambu di bunkuta bu mpasi zandi na zaata ti: «Kyadi! Mpila kyadi! Ngeye Babiloni, mbanza yiyinene na yingolo! Mu kilokola kimosi kaka, mfundusu aku yitudidi.»

11 Minkiti mii ha luse lu butoto myaadila na myaakota mu kifwidi, mu dyambu ti ku muntu ko wuna bwesa sumba bima byawu: 12 Wola, kisengo kimpembe, matadi mantalu na palata, milele mintalu mi lino na milele mimbwaki na mii na ntinta yimbwaki yina lezima, milele mi swa na mabaya ma mumpila-mumpila maa mpasi mu yena, bima bi mumpila-mumpila bihiduku mu meeno ma nzawu, mu mabaya mantalu, mu nsongo, mu kisengo na mu matadi matoma lengomoka, 13 Bima bi mfuku yimbote bi mumpila mumpila na mananasi, mananasi ma mile, maaka mamfuku yimbote, vinu, mafuta, faline, bele, zingombe, mameme na zimpunda, makaalu ma mvita, mindongo na zinkole. 14 «Mbutu yedi tyanga mwela aku, yeka kitatu naku, bima byaku bimvimba bintoko na byedi lezimanga bizimbadi, mpe kulendi bwesa bye baka ko!» 15 Minkiti mivwama mu mumbungu mu mbanza beyoyo, myaatelama kukula mu dyambu di bunkuta bu mpasi zandi, myaadila na myaakota mu manyongo. 16 Myaata ti: «Kyadi! Mpila kyadi! Nge mbanza yiyinene yilweti milele mi lino, milele mintalu mimbwaki yina lezima, lweti misanga mi wola na mi matadi mantalu na mi palata! 17 Mu kilokola kimosi kwandi, bimvwama bimvimba bizimbadi!» Binati bimvimba bi masuwa na bisadi bi masuwa na yobobo bamvimba bakwe bakilanga luzingu lwawu mu mubu, baba batelama kitatu. 18 Bu bayena mwisi wedi nyenginanga mbanza, balookana ti: «Nani wuba wufwanakana na mbanza yiyinene!» 19 Batuba fundu-fundu ha yulu mitu myawu, badila, banyonga mpe bedi kwe lookani ti: «Kyadi! Mpila kyadi mbanza yiyinene! Mu dyambu di kimvwama kyandi, bamvimba bebobo baa na masuwa mu mubu, bamana vwama! Kansi mu kilokola kimosi kwandi, bimvimba bebyobyo bizimbadi!»

20 Nge yulu, yangalala mu mwangununu andi! Yeeno mpe bantu bavwihulu ku Nzambi, zintumwa na mimbikudi, yangalaleeno mu dyambu ti Nzambi wumufundisi mu misamu mimbi mikaluhidikidi.

21 Buna, mbazi yimosi yilulendo yibonga tadi dimosi difwanakani na tadi didinene di bakwe nikinanga mbutu, wulosa dyo mu mubu na wuta ti: «Ni bwabobo mpe Babiloni, mbanza yiyinene baabwisila yo mu ngolo, mpe yaabwesa yenika dyaka ko. 22 Ku ngeye, kwaabwesa yuwakana dyaka muningu wu bisiki bi lungoyingoyi na minyimbidi ko, muningu wu bisiki bi matuutu hoti kulumenta ko. Ku ngeye, kwaabwesa ba muntu wuzebi kadi kisalu ko, mpe kwaabwesa yuwakana lusuku lu tadi di bakwe nikinanga ko. 23 Kukya ku mwinda kwaabwesa lezima ko, mpe kwaabwesa yuwakana ndinga yi mukento na bakala bakwelani ko, mu dyambu ti minkiti myaku miba bantu bazangama ha luse lu butoto, mpe mu dyambu ti , zihukumuni bantu ba nsi zimvimba.»

24 Ku ngeye, bayena menga ma mimbikudi, ma bantu bavwihulu ku Nzambi na ma bamvimba bebobo babahonda ha luse lu butoto.