1 Ni hahoho, yimosi mu zimbazi nsambwadi yisimba mbungu nsambwadi bezozo, yiyiza moka naani mu nteela ti: «Yiza, mbo nakulonka bwedi bwabela mfundusu yi mukento wu kindumba kihyokidi kitezo, wuu wuzakala ha kumu di mamba mamanene.» 2 Ntinu zii ha luse lu butoto, zisadila kindumba nandi, mpe bantu baa ha luse lu butoto, bakolo vinu di kindumba kyandi.

3 Buna Mpeve yi ndwata na mbazi yintwadisa ku nsi yinkatu. Kuuna nayena mukento wumosi wuzakala ha yulu kibulu kimbwaki. Nitu yi kibulu bekyokyo yiba yifuluka mu nkumbu ze safudila Nzambi, mpe kiba na mitu nsambwadi na masiki kumi. 4 Mukento bewowo, wuba wulwata milele mintalu mimbwaki yina lezima, misanga mi wola, mi matadi mantalu na mi palata. Wusimba mu kooko kwandi mbungu yi wola yifuluka mu misamu minsisi na mu busafu bu kindumba kyandi. 5 Ha mbunzu andi haba hasonama, nkumbu yi mansweki: «Mbanza yiyinene yi Babiloni, ngudi yi bakento bakwe sadilanga kindumba na misamu minsisi mii ha luse lu butoto.» 6 Nayena mukento bewowo wukolo mu menga ma bantu bavwihulu ku Nzambi na mu menga ma zimbangi zi Yesu. Bu namuyena, ni natumbu yituku bubwingi.

7 Mbazi yinteela ti: «Bila nki wuna yitukulu e? Meno, mbo nakuteela mansweki ma mukento na ma kibulu ki nakwe munati, kibulu bekyokyo kii na mitu nsambwadi na masiki kumi. 8 Kibulu kiyeeni, kiba kimoyo, kansi kisaala dyaka ko. Kyaatomboka mu bulu dinsisi na kyaazimbala. Bantu ha luse lu butoto, yobobo balembolo ba na nkumbu yisonama mu mukanda wumoyo tuuka mbadukulu yi nza, baayituku bu baayena kibulu, mu dyambu ti kiba, kansi kisaala ko, mpe kyaabwesa yenika dyaka.

9 Ehaha, hana lomba madyela na ndwenga. Mitu nsambwadi ni milandu nsambwadi mizakadi mukento, midi mpe ni ntinu nsambwadi. 10 Ntinu zitanu ha kati dyawu zibwa, yimosi yisambanu yina yaala ntangu beyiyi, mpe yi nsambwadi yayizidi ko. Bu yaakwiza, mwa ntangu yifyoti kwandi yaazinga. 11 Kibulu kiba kimoyo, kansi kisaala dyaka ko, kidi kyabende ntinu yinana. Kidi mpe kimosi mu zintinu nsambwadi na kyaazimbala.

12 Masiki kumi ma wuyeni, ni zintinu kumi zilembolo tona mu yaala, kansi zaatambula mu kilokola kimosi, lulendo mu yaala ha kimosi na kibulu. 13 Yawu kumi bamvimba, makani mamosi badi: mu tuula lulendo lwawu na ngolo zawu mu kibulu. 14 Baanwanisa Mwana Dimeme, mpe yandi waababedisa, mu dyambu ti Mfumu yi zimfumu na Ntinu yi zintinu kadi. Mpe yobobo baanunga ha kimosi nandi, ni babatumisa, babasoola na baba bakwikama.»

15 Mbazi yinteela dyaka ti: «Mamba mo ma wuyeni, ha zakala mukento wu kindumba, ni mikangu, mpumbu zi bantu, zinsi na zindinga. 16 Masiki kumi ma wuyeni na kibulu, baanyafuna mukento wu kindumba, baamubonga bima bimvimba na baamusa mpene yimungwa, baadya misunya myandi na baamuyoka ku tiya. 17 Mu dyambu ti Nzambi wutuula mu mitima myawu luzolo mu lungisa nsilulu andi. Masiki kumi, mpila mosi ti zintinu kumi zaayuwasana mu haana ku kibulu kintinu kyawu, natee Mambu ma Nzambi bu mana lunga.

18 Mukento wu wuyeni, ni mbanza yiyinene yina yaala ntinu zii ha luse lu butoto.»