1 «Sonika ku mbazi yi dibundu dii mbanza yi Saledesi: "Yondowo wuu na mpeve nsambwadi zi Nzambi na mbwetete nsambwadi, ebu kateedi:

Nzebi nsadulu zaku, mpe nzebi ti kikumu kyaku kimwangana ti wumoyo wudi, nsyongono wufwa kwaku wudi. 2 Kaya meso na syamisa yobobo basidi beka lukufi mu fwa. Mu dyambu ti nyeni nsadulu zaku zidi zilunga ko ha ntadisi yi Nzambi ani. 3 Bambuka moyo bwedi wutambudila na wuyuwila Mambu ma Nzambi. Keba mo na viluka. Tala ti wuna kaya meso ko, mbo niza bonso mwivi, mpe waazaba ko nkye ntangu naakwiza kubatikisa. 4 Kansi, mwa ndambu yi bantu baku baa mu dibundu di mbanza yi Saledesi balembolo sumuna binkutu byawu. Baadyata ha kimosi naani na baalwata binkutu bimpembe, mu dyambu ti yawu bafwanakana (balunga) badi.

5 Yondowo wunungini, waalwata binkutu bimpembe. Naakatula nkumbu andi mu mukanda wumoyo ko. Mbo namuzaba ha ntadisi yi Tata ani na zimbazi zandi.

6 Yondowo wuu na makutu, kayuwa misamu bemyomyo mina ta Mpeve ku mabundu!"»

7 «Sonika ku mbazi yi dibundu dii ku mbanza yi Filadelefi : "Wulongo, Wukedika, yondowo wuu na nsabi yi ntinu Davidi, tala ti zibudi, kuu na muntu ko wulenda kanga, mpe tala ti kengi, kuu na muntu ko wulenda zibula, ebu kateedi: 8 Nzebi nsadulu zaku. Tala, nzibudi ha ntadisi aku mwelo, kuu muntu ko wulenda kanga wo, mu dyambu ti wuu na lulendo lu lwingi ko, mpe wukebidi Mambu mani na wunyafuni nkumbu ani ko. 9 Tala, nina kuhaana bantu baa mu kimvuka ki Satana, yobobo bakwe tanga ti yawu Bayudayo badi, kansi badi awu bo ko. Kuhuna kwawu bana sa. Tala, mbo nasa ti biza bafukama ha malu maku, na bazaba ti meno nakutiidi. 10 Mu dyambu ti wukebidi Mambu mani mamvibudulu, meno mpe naakukeba mu ntangu yi ntontolo zina kwiza mu nza yimvimba, mu tonta bantu ba ha luse lu butoto. 11 Mwa ntangu yifyoti kwandi yisidi, nina kwiza. Kangama nakekete mu byo bii naku, mwanki nakani muntu kabongandi mpu aku yi nungunu.

12 Ku muntu bewowo nungini, mbo namukitula kunzi mu kati di nzo-Nzambi ani, mpe kabwesa duuka dyaka ku mbazi ko. Mbo nasonika nkumbu yi Nzambi ani, yoyoyo yi mbanza yi Nzambi ani mpe na nkumbu ani yimoona mu yondowo waanunga. Nkumbu yi mbanza beyoyo, ni Yelusalemi yimoona yifumini ku yulu, ku Nzambi ani.

13 Yondowo wuu na makutu, kayuwa misamu bemyomyo mina ta Mpeve ku mabundu!"»

14 «Sonika ku mbazi yi dibundu dii ku mbanza yi Lawodise: "Yondowo wu bakwe tumisinanga Ameni, mbangi yikwikama na yikedika, wudi mbadukulu yi bima bimvimba bihiidika Nzambi, ebu kateedi: 15 Nzebi nsadulu zaku. Nzebi bumbote ti wudi kyozi ko na wudi tiya ko. Tala ti wuba kwandi kyozi hoti tiya! 16 Kansi mu dyambu ti nalalangani wudi, wudi kyozi ko na wudi tiya ko. Ni bwabobo naakulukila. 17 Ngeye wuna ta ti: Mvwama nidi, nakivwamisi, mpe nii na nsatu yi kima ko." Kansi zebi ko ti mu mpasi na mu kyadi wudi! Mputu, mpene na mpofo wudi. 18 Ni hahoho, nina kuhaana malongi wusumba ku meno wola disukulu ku tiya, mwanki wukituka nkatika mvwama. Sumba mpe binkutu bimpembe mu lwata na mu lembolo yena nsoni yi mpene. Sumba mpe bilongo bi wasadisila meso, mwanki wuyena. 19 Meno nakwe baminanga mpe nakwe sembanga bamvimba bebobo ba natiidi. Bwabu, fweti ba na vema, mpe viluka. 20 Tala, meno ntelamani ha mwelo mpe nkonkoti. Tala ti muntu yudi ndinga ani na zibudi mwelo, nina kota mu nzo andi, nina dya ha kimosi nandi mpe yandi na meno.

21 Ku muntu bewowo nungini, mbo namuhaana luve lwe zakala naani ha kyandu ki kintinu kyani, bonso mebende bu nanunga na bu nazakadi na Tata ani ha kyandu ki kintinu kyandi.

22 Yondowo wuu na makutu, kayuwa misamu bemyomyo mina ta Mpeve ku mabundu!»