1 Mboki, nayena mbazi yimosi yifuma ku yulu yedi kulumuka, yisimba ha kooko kwandi nsabi yi bulu dinsisi na musinga wuwunene wu kisengo. 2 Mbazi yisimba Ndalango na yibindika yo misinga, mwanki kaba wukangama funda di mimvu (1000). Ndalango beyoyo, ni nyoka yi ntama, yi bakwe tumisinanga ti Nkadyampemba na Satana. 3 Mbazi yimutuba mu bulu dinsisi. Mboki yikanga mwelo na yituula wo bikaku, mwanki Ndalango kalembolo bwesa huna mikangu natee funda di mimvu bu myahyoka. Ku manima, fweti nyangunu mu mwa ntangu yifyoti.

4 Nayena byandu bi kintinu. Yobobo baba bazakala momo, babahaana lulendo lwe fundisa. Nayena mpe myela mi yobobo babatabula mitu mu dyambu di kimbangi mu Yesu na mu Mambu ma Nzambi, na yobobo balembolo sambila kibulu na kiteki kyandi, mpe balembolo tambula kidimbu ha mbunzu na ha kooko kwawu. Bavutukila dyaka mu zinga na mu yaala na Klisto funda di mimvu. 5 Bantu bahiika bafwa, bavutukila dyaka mu zinga ko natee funda di mimvu bu dyaahwa. Yo ni mfulukulu mu bafwa yintete. 6 Kyese ku yobobo baafuluka mu mfulukulu yintete mu bafwa! Badi bantu bavwihulu ku Nzambi na lufwa lunzole lusidi dyaka na lulendo mu yawu ko. Baaba zinganga-Nzambi zi Nzambi na zi Klisto, mpe baayaala ha kimosi na Klisto funda di mimvu.

7 Funda di mimvu bu dyaahwa, Satana baamuduukisa mu boloko dyandi, 8 na mbo kenda kahuna Ngonge na Mangonge, ni zinsi zii ku ndambusu ziya zi nza. Mbo kabayonzika mu nwana mvita, mpe mbo baba babingi bonso munyenge wu kumu di mubu. 9 Bamwangana ha luse lu butoto lumvimba, ni bazunga kifulu ki bantu bavwihulu ku Nzambi na mbanza yizola yi Nzambi. Kansi, tiya tufuma ku yulu, tukulumuka na tubanyengisa. 10 Nkadyampemba wedi bahunanga, bamutuba mu dyanga di tiya tu sufele, mo mudi kibulu na mumbikudi wuluvunu. Baakwamusu momo mpimpa na mwini, mimvu ka mimvu.

11 Mboki, nayena kyandu kikinene kimpembe ki kintinu na yondowo wuba wuzakala hoho. Mazulu na butoto bitina ha ntadisi andi, mpe bibwesa yenika dyaka ko. 12 Nayena bantu bafwa, bantu bamfunu na ba bakwe tyakanga, batelama ha ntadisi yi kyandu ki kintinu. Mabuuku mazibulu. Buuku dihiika dizubulu, ni buuku di luzingu. Bantu bafwa bafundusu bonso bubela mavanga mawu, mpe bonso buwusonama mu mabuuku. 13 Mubu wuvutula bantu bafwa baba mu kati dyandi, lufwa na nsi yi bafwa bavutula mpe bantu bafwa baba ku yawu. Kadi muntu wufundusu bonso bubela mavanga mandi. 14 Batuba lufwa na nsi yi bafwa mu dyanga di tiya. Dyanga di tiya ni lufwa lunzole. 15 Wonso muntu walembolo yena nkumbu andi yisonama mu buuku di luzingu, watubu mu dyanga di tiya.