1 Nayuwa mu nzo-Nzambi ndinga yizonza mu ngolo na yita ku mbazi nsambwadi ti: «Yendeeno na mwangiseeno ha luse lu butoto, mbungu nsambwadi zi mankesi ma Nzambi!»

2 Mbazi yintete yiyenda na yimwangisa mbungu andi ha luse lu butoto. Buna mputa zimyangala zedi zikutinanga zizibuka mu bantu bebobo baba na kidimbu ki kibulu, mpe basambila kiteki.

3 Mbazi yizole yimwangisa mbungu andi mu mubu. Mamba makituka menga bonso ma mvumbi na bimvimba biba bimoyo mu mubu bimana fwa.

4 Mbazi yitatu yimwangisa mbungu andi mu zinzadi na mu zinto zi mamba, mamba mamvimba makituka menga. 5 Nayuwa mbazi yikwe yaalanga mamba yita ti: «Ngeye wulongo, wudi na wuba, wulunungu wudi mu fundisila bobo. 6 Bantu batengodi menga ma bantu bavwihulu ku Nzambi na ma mimbikudi, mpe wubaheeni menga banwa, bwabobo bufwanakani ku yawu!» 7 Mboki, nayuwa ndinga yifuma ku ziku diba kwe yokilanga minkayulu yita ti: «Ninga, Mfumu yi lulendo lumvimba, mfundusulu zaku zikedika na zilunungu zidi!»

8 Mbazi yiya yimwangisa mbungu andi ha ntangu. Ni bamuhaana luve mu yoka bantu mu tiya twandi. 9 Mpe bantu bahya mu mbangasi yingitukulu. Basafula nkumbu Nzambi wuu na lulendo mu mayeela bebobo, kansi babisa kwawu mu viluka na mu mukembila.

10 Mbazi yitanu yimwangisa mbungu andi ha kyandu ki kintinu ki kibulu, mpe kimfumu kyandi ni kikota ku nsye kitombe. Bantu bakitatika ludimi mu myangala, 11 basafula Nzambi yi mazulu mu dyambu di myangala myawu na mputa zawu. Kansi, babisa mu bika mavanga mawu.

12 Mbazi yisambanu yimwangisa mbungu andi mu nzadi yiyinene yii nkumbu Efalata. Nzadi ni yiyuma, mwanki yihaana nzila ku zintinu zifumini ku ndambusu yikwe duukilanga ntangu. 13 Mboki, nayena mpeve zitatu zilembolo ba zivedila zifwanakana na mahono, zedi duuka. Yimosi mu munwa wu Ndalango, yimosi mu munwa wu kibulu, mpe yimosi mu munwa wu mumbikudi wuluvunu. 14 Zozozo ni mpeve zimbi zina sa bidimbu bingitukulu. Zina kwenda ku zintinu zi nza yimvimba, mu bakutikisa mu nwana mvita yi kilumbu kikinene ki Nzambi, Mfumu yi lulendo lumvimba.

15 Mfumu ebu kateedi: «Tala, nina kwiza bonso mwivi. Kyese ku yondowo wuna kaya meso na wuna keba binkutu byandi, mwanki kalembolo dyata mpene, mpe kalembolo yena nsoni ha meso ma bantu.»

16 Mpeve zimbi zikutikisa zintinu ha kibuka kibakwe tumisinanga mu ndinga yi kihebeleo ti Halamangendoni.

17 Mbazi yi nsambwadi yimwangisa mbungu andi mu yulu. Ndinga yingolo yiyuwakana ha kyandu ki kintinu kii mu nzo-Nzambi, yita ti: «Bulungidi!» 18 Buna mpedamu ziyenika, ndinga ziyuwakana, mimbamina mitendana na butoto buzakama mu ngolo. Twayeni kuzakama ku bobo ko tuka bantu bu baa ha luse lu butoto. 19 Mbanza yiyinene yikabuka mu ndambu zitatu. Mbanza zi zinsi zimvimba zibwa. Nzambi wubambukila moyo mbanza yiyinene yi Babiloni, bu kamunwikisa mbungu yi vinu di nganzi zandi. 20 Bizanga bimvimba bidyama na milandu mizimbala. 21 Mvula yi matadi mazita yifuma ku yulu yinokono bantu. Mpe bantu basafula Nzambi, mu dyambu diyeela di mvula yi matadi, mu dyambu ti diba yeela dihyokidi ngolo.