1 5 Ku manima ma misamu bemimi, nayena mbazi ziya zitelama mu makonzi maya ma luse lu butoto. Zikakidila bitembo biya bii ha luse lu butoto, mwanki kitembo kilembolo kukula ha luse lu butoto, mu mubu, hoti mu kadi muti. 2 Mpe nayena mbazi yimosi yihiika, yedi tomboka ku ndambusu yikwe totokilanga ntangu, yisimba kidimbu ki Nzambi yimoyo. Yilooka mu ndinga yingolo ku zimbazi ziya zitambula lulendo mu sa bubi ku butoto na ku mubu. Yita ti: 3 «Lusandi bubi ku butoto, ku mubu hoti ku miti ko, natee bu twaasa kidimbu ha mbunzu zi bisadi bi Nzambi eto.» 4 Mpe nina yuwa lutangu lu yobobo babasa kidimbu. Baba mafunda nkama na makumaya na ya mu kadi kifumba ki baala ba-Isaeli babasa kidimbu:

5 mu kifumba ki Yuda mafunda kumi na mole (12000)

babasa kidimbu, mu kifumba ki Lubeni mafunda kumi na mole (12000),

mu kifumba ki Ngadi mafunda kumi na mole (12000),

6 mu kifumba ki Aseli mafunda kumi na mole (12000),

mu kifumba ki Nefitali mafunda kumi na mole (12000),

mu kifumba ki Manase mafunda kumi na mole (12000),

7 mu kifumba ki Simeoni mafunda kumi na mole (12000),

mu kifumba ki Levi mafunda kumi na mole (12000),

mu kifumba ki Isakali mafunda kumi na mole (12000),

8 mu kifumba ki Zabuloni mafunda kumi na mole (12000),

mu kifumba ki Yosefi mafunda kumi na mole (12000),

mpe mu kifumba ki Benyami mafunda kumi na mole (12000) babasa kidimbu.

9 Ku manima ma misamu bemyomyo, nayena mpumbu yiyinene yi bantu, yo nakani muntu kazabila yo lutangu ko. Yifuma ku zinsi zimvimba, ku bifumba bimvimba, ku makanda mamvimba na ku zindinga zimvimba. Baba batelama ha ntadisi yi kyandu ki kintinu na ha ntadisi yi Mwana Dimeme. Balwata mazwele mamala mampembe na mandala mu moko. 10 Bedi looka mu ndinga yingolo ti: «Mpulusu yikwe fumanga ku Nzambi eto wudi wuzakala ha kyandu ki kintinu na ku Mwana Dimeme!» 11 Mboki, zimbazi zimvimba zizungidila kyandu ki kintinu, zinkuluntu na bihangu biya bimoyo, bamvimba bafulamana luse ha nsi ha ntadisi yi kyandu ki kintinu, bafukama na basambila Nzambi 12 ebu: «Ameni! Lusakumunu, nkembo, ndwenga, matondo, masiika, lulendo na ngolo ku Nzambi eto vwidi byo mimvu ka mimvu! Ameni!»

13 Mboki wumosi mu zinkuluntu wumfula ti: «Yobobo balweti mazwele mamala mampembe, banani badi e? Kwedi bafumini e?» 14 Ni namuvutudila ti: «Mfumu ani, ngeye wazebi!» Ni kanteela ti: «Ni yobobo babayenisi mpasi zizingi, basukudi mazwele mawu mamala, mpe bakitudi mo mampembe mu menga ma Mwana Dimeme. 15 Ni hahoho badi ha ntadisi yi kyandu ki kintinu ki Nzambi mu musambila mpimpa na mwini mu nzo-Nzambi andi. Yondowo wudi wuzakala ha kyandu ki kintinu, waabalunda mu nzo andi. 16 Baabwesa yena nsatu ko na baabwesa yena mpwila ko. Ntangu yaabwesa bayoka ko na mbangasi yaabwesa bayoka ko. 17 Mu dyambu ti, Mwana Dimeme wudi ha kati di kyandu ki kintinu, waaba munkengi awu na waabanata ku nto zi mamba ma luzingu, mpe Nzambi waakusuna manswela mu meso mawu.»