1 Mboki, mbazi yindonka nzadi yii na mamba ma luzingu, maa nakyenzikyenzi bonso tadi dikwe yenikisanga bima bii ku kinima, mpe medi duukanga ha kyandu ki kintinu ki Nzambi na Mwana dimeme, 2 mpe nzadi yedi kumbanga ha kati-kati di nzila yiyinene yi mbanza. Mu kadi kumu di nzadi, kuba na muti wu luzingu, wukwe butanga mbutu nkumbu kumi na zole (12) mu mumvu, mpe nkumbu yimosi mu kadi ngonda. Makaya ma muti makwe sadulungu mu nyakisa bantu baa mu zinsi. 3 Kwaabwesa ba nsingulu ko. Kyandu ki kintinu ki Nzambi na ki Mwana Dimeme, kyaaba mu mbanza, mpe bisadi byandi byaamusambila.
4 Baayena kiini kyandi, mpe nkumbu andi yaaba yisonama ha mbunzu zawu. 5 Mpimpa yaabwesa ba ko, mpe baabwesa ba na nsatu yi kya ku mwinda na ku ntangu ko, mu dyambu ti Mfumu Nzambi waabakyenzola. Mpe baayaala mimvu ka mimvu.
6 Mboki mbazi yinteela ti: «Mpova bezizi, zikedika na zikwikama zidi, Mfumu Nzambi yikwe sadilanga mu mpeve mimbikudi, tambikidi mbazi andi mu lonka ku bisadi byandi misamu myaakwiza mu muswalu.»
7 «Tala, nina kwiza mu muswalu. Kyese ku yondowo wuna keba mpova zi mbikudulu zi buuku bedidi!»
8 Meno ni Yoane, yondowo wuyuwa na wuyena misamu bemyomyo. Bu nayuwa na bu nayena myo, nabwa ha malu ma mbazi wundonka myo, mwanki namusambila. 9 Kansi wunteela ti: «Kusandi bobo! Mukundi aku wu kisalu nidi na wu zimpangi zaku mimbikudi, mpe na yobobo bamvimba bakwe kebanga mambu ma buuku bedidi. Ni Nzambi fweti sambila!»
10 Mboki wubwesa ta dyaka ti: «Kuswekandi mpova zimbikudulu zi buuku bedidi, mu dyambu ti ntangu yeka bela-bela 11 Yondowo wudi wumbi, bika katatamana mu ba wumbi, yondowo wusumuka katatamana mu ba wusumuka, yondowo wudi wulunungu, katatamana mu ba wulunungu, mpe yondowo wudi wulongo, katatamana mu ba wulongo.»
12 «Tala, nina kwiza mu nswalu, mufutu ani wuna kwiza ha kimosi naani, mwanki nasenda kadi muntu bonso budi mavanga mandi. 13 Meno nidi Alafa na Omega, wuntete na wumanunu, mbadukulu na nsukunu.»
14 Kyese ku yobobo basukudi mazwele mawu mamala, mwanki baba na luve mu dya mbutu zi muti wu luzingu na mu kota mu myelo mu mbanza. 15 Kansi ku mbazi yi mbanza, kuu na zimbwa, zindoki, bakwe sadilanga kindumba, mimpondi, bakwe sambilanga biteki na bantu bakwe tyanga luvunu na bakwe sadilanga luvunu!
16 Meno Yesu, ntambikidi mbazi ani mwanki kaluteela kimbangi mu misamu mitadidi Mabundu. Meno nidi mwanzi na kinama mu nkuna yi Davidi, mpe lubwetete lukwe lezimanga mu mene.
17 Mpeve na mukento wukwela bateedi ti: «Yiza!»
Bika yondowo wuna yuwa kata ti: «Yiza!»
Bika yondowo wuu na mpwila kiza, bika yondowo tiidi mamba ma luzingu, kabonga mo mampamba.
18 Meno nina ta kimbangi ku kadi muntu wuna yuwa mpova zi mbikudulu di buuku bedidi: tala ti muntu bwesidi mwa mpova momo, Nzambi waamubwesa mayeela ma basonikini mu buuku bedidi. 19 Mpe tala ti muntu katudi mpova zi mbikudulu zi buuku bedidi, Nzambi waakatula kikunku kyandi mu mbutu zi muti wu luzingu na mu mbanza yilongo bonso bu wudi wusonama mu buuku bedidi.
20 Yondowo wuna ta kimbangi ki misamu bemyomyo, teedi ti: «Ninga, nina kwiza mu muswalu!»
Ameni! Mfumu Yesu, yiza!
21 Bika Mfumu eto Yesu-KListo kalusakumuna yeno bamvimba!
/images/a/Tcg2NiV7ce24OT6kCIQGR)
/images/a/-h5KPk8ct3kLpCpYm9-g6)