1 Bwabu nayena yulu dimoona na butoto bumoona, mu dyambu ti yulu dintete na butoto buntete bizimbala, na mubu wuba dyaka ko. 2 Nayena mbanza yilongo, Yelusalemi yimoona yifuma ku mazulu, yifidusu ku Nzambi, yikubama bonso mukento wukwela wutomisi nitu andi mu dyambu di mulumi andi. 3 Nayuwa ndinga yingolo yiduuka ha kyandu ki kintinu, yita ti: «Tala, bwabu Nzambi zakadi ha kati-kati di bantu! Waazakala ha kimosi nawu, mpe baaba bantu bandi. Nzambi yandi bende waaba nawu, mpe waaba Nzambi awu. 4 Mbo kakusuna manswela mamvimba ma meso mawu. Lufwa lwaabwesa ba ko, kwaabwesa ba kifwidi ko, milooko ko na mpasi ko, mu dyambu ti bima bintete bizimbadi.»

5 Yondowo wuba wuzakala ha kyandu ki kintinu wuta ti: «Nsidi bwabu bima bimvimba bimoona.» Mboki wunteela ti: «Sonika, mu dyambu ti mpova zani zikedika na zikwikama zidi.»

6 Wubwesa ta ti: «Bulungidi! Meno nidi alafa na omega, mbadukulu na nsukunu. Yondowo wuu na mpwila, mbo namuhaana mamba mampamba ma nto yi luzingu. 7 Wonso muntu waanunga, waatambula kuu meno fwa bedyodyo, naaba Nzambi andi, mpe yandi waaba mwana ani. 8 Kansi ku bantu baa na bunkuta, bakwe lembolo kwikilanga, baa na bifu nkatika bimbi, mimpondi, bakwe sadilanga kindumba, zindoki, bakwe sambilanga biteki na bantu bamvimba baa na luvunu, dyanga di tiya tu sufele dyaaba ni musendo awu: lo ni lufwa lunzole.»

9 Mboki, yimosi mu zimbazi nsambwadi wusimba mbungu nsambwadi zifuluka mu mayeela nsambwadi mamanunu, wuyiza zonza naani. Wunteela ti: «Yiza, mbo nakulonka mukento wukwela, mukazi wu Mwana dimeme.»

10 Mpeve yi ndwata na mbazi yintwadisa ha nsongi yi mulandu wutoma zangama, ni kandonka mbanza yilongo, Yelusalemi yifuma ku mazulu, yifidusu ku Nzambi, 11 mpe yifuluka mu nkembo wu Nzambi. Mbanza yedi lezima bonso tadi dintalu, tadi di zape dii bonso tadi dikwe yenikisanga bima bii ku kinima. 12 Yiba yizungudulu mu bibaka bibinene na bizangama, mpe ha myelo kumi na myole haba na mbazi kumi na zole. Ha yulu myelo bemyomyo, basonika nkumbu zi bifumba kumi na byole bi bisi-Isaeli: 13 ku esete myelo mitatu, ku node myelo mitatu, ku sude myelo mitatu na ku wesete myelo mitatu. 14 Bibaka bi mbanza biba bitungu mu matadi kumi na mole mu lufulu. Mu lufulu belolo, musonama nkumbu zi zintumwa kumi na zole zi Mwana Dimeme.

15 Yondowo wedi zonzanga naani, wuba na kitezolo, dyadya dimosi di wola dye tezila mbanza na myelo myandi, mpe na bibaka byandi. 16 Mbanza yiba na bibaka biya, bula na bukufi bwandi buba kitezo kimosi. Mbazi wuteza mbanza mu dyadya dyandi: wubaka mafunda kumi na mole (12000) ma zimetele mu bula, mu bukufi na mu kuzangama. Biba bimvimba kitezo kimosi. 17 Wuteza bibaka: wutanga makuminsambwadi na zole (72) yi zi metele*, mpe kitezolo kikwe sadilanga mbazi kiba bonso kitezolo kikwe sadilanga muntu. 18 Bibaka biba bitungu mu matadi ma zape, mpe mbanza yawu bende yiba yitungu mu wola divedila, yiba nakyenzikyenzi bonso tadi dikwe yenikisanga bima bii ku kinima. 19 Lufulu lu bibaka bi mbanza, batomilo mu matadi mantalu ma mumpila-mumpila: lufulu luntete lutungu mu matadi ma zape, lunzole mu matadi ma safile, lutatu mu matadi ma kalasedoni, luya mu matadi ma emelode, 20 lutanu mu matadi ma saladoni, lusambanu mu matadi ma saladwani, lunsambwadi mu matadi ma klisolite, lunana mu matadi ma belili, luvwa mu matadi ma topazi, lukumi mu matadi ma klisopalasi, lukumi na mosi mu matadi ma yasinte, lukumi na zole mu matadi ma ametisite. 21 Myelo kumi na myole miba, ni palata kumi na zole, kadi mwelo wuba wuhiduku mu palata dimosi kaka. Nzila yiyinene yi mbanza yihiduku mu wola divedila, yiba napekipeki bonso tadi dikwe yenikisanga bima bii ku kinima.

22 Kansi, nayena nzo-Nzambi mu mbanza beyoyo ko, mu dyambu ti nzo-Nzambi andi ni Nzambi, Mfumu yi lulendo lumvimba na Mwana dimeme. 23 Mbanza yii na nsatu yi ntangu ko, yi ngonda ko mu kyenzola yo, mu dyambu ti nkembo wu Nzambi wuna kyenzola yo, mpe Mwana dimeme ni mwinda andi. 24 Zinsi zaadyata mu kya kwandi, mpe zintinu zii ha luse lu butoto zaamunatina bimvwama byawu. 25 Myelo myandi myaakangama mu mwini ko, mu dyambu ti mpimpa yaabwesa ba hoho ko. 26 Baanata kuuna nkembo na nzitusu yi zinsi. 27 Mwaakota nakani kima ki busafu ko, kani muntu kwe sadilanga bifu bi nkatika bimbi hoti bi luvunu ko, kansi ni yobobo kaka badi na nkumbu zisonama mu buuku di luzingu di Mwana dimeme.