1 Mboki nayena mu kooko ku lubakala ku yondowo wuba wuzakala ha kyandu ki kintinu, buuku diba dizingama disonama ku kati na ku manima, dikangama mu misinga nsambwadi. 2 Mpe nayena mbazi yimosi yilulendo yedi zonza mu ndinga yingolo ti: «Nani wudi wulunga mu zibula buuku na mu nyanguna misinga e?»

3 Kansi kunaani muntu, ku yulu, ha luse lu butoto mpe ku nsye butoto, wulenda zibula buuku na wulenda tala bii ku kati. 4 Nadila bubwingi mu dyambu ti kuba na muntu ko wulunga mu zibula buuku na mu tala bii ku kati. 5 Buna, wumosi mu zinkuluntu wunteela ti: «Tala, kudilandi, nkosi yii mu kifumba ki Yuda, yondowo wuu mu nkuna yi ntinu Davidi, nungini. Yandi lenda nyanguna misinga nsambwadi na lenda zibula buuku.»

6 Mboki nayena ha kati di kyandu ki kintinu na bihangu biya bimoyo ha kati di zinkuluntu, Mwana Dimeme wutelama wuba bonso munkayulu we yoka. Wuba na masiki nsambwadi na meso nsambwadi. Meso bemomo ni mpeve nsambwadi zi Nzambi zifidusu mu nza yimvimba. 7 Mwana dimeme wuyiza na wutambula buuku mu kooko ku lubakala ku yondowo wuba wuzakala ha kyandu ki kintinu. 8 Bu katambula buuku, bihangu biya bebyobyo bimoyo na makumole na ya ma zinkuluntu bafukama ha ntadisi yi Mwana Dimeme, mpe wumosi-wumosi wusimba kisanzi kimosi na mbungu zi wola zifuluka mu maaka mamfuku yimbote, ni zinsambulu zi balongo. 9 Bayimbila mukunga wumosi wumoona ewu:

« Wulunga wudi mu tambula buuku,

mpe mu nyanguna misinga,

mu dyambu ti wuhaanu bonso munkayulu we yoka,

mpe mu menga maku wukuula, mu dyambu di Nzambi,

bantu ba bifumba bimvimba, ba zindinga zimvimba, ba makanda mamvimba na ba zinsi zimvimba.

10 Mpe wubasidi, bantu bakintinu kimosi na zinganga-Nzambi, mu dyambu di Nzambi eto,

mpe baayaala ha luse lu butoto.»

11 Bu nedi talanga, ni nayuwa ndinga yi zimbazi zizingi zizungidila kyandu ki kintinu na ndinga yi bihangu bimoyo mpe na yi zinkuluntu. Baba lutangu lu byazi na byazi, mafunda na mafunda ma bantu kuhyoka kitezo. 12 Mu ndinga yingolo bedi tanga ti:

«Mwana dimeme wuhaanu bonso munkayulu we yoka,

wulunga kadi mu tambula lulendo,

kimvwama, ndwenga na ngolo,

masiika, nkembo na lusakumunu!»

13 Mpe nayuwa bihangu bimvimba bihiduku ku yulu na ha luse lu butoto, ku nsye butoto na mu kati di mubu byedi ta ti:

« Ku yondowo wudi wuzakala ha kyandu ki kintinu na ku Mwana Dimeme,

bika nkembo, masiika, lusakumunu na lulendo luba mimvu ka mimvu!»

14 Bihangu biya bebyobyo bimoyo bivutula ti: «Ameni!» Zinkuluntu ni zifukama, mpe ni zidongama.