1 Nayena dyaka ku yulu kidimbu kihiika kikinene na kingitukulu: mbazi nsambwadi zisimba mu moko mayeela nsambwadi mamanunu, mu dyambu ti mu mayeela bemomo mankesi ma Nzambi malungila.

2 Nayena bonso mubu wuu nakyenzikyenzi wufwanakana na tadi dikwe yenikisanga bima bii ku kinima, wuvwatana na tiya. Bantu bamvimba bebobo babedisa kibulu, kiteki kyandi na lutangu lufwanakana na nkumbu andi, baba batelama ha yulu mubu bewowo wuu nakyenzikyenzi wufwanakana na tadi dikwe yenikisanga bima bii ku kinima. Baba na lungoyingoyi mu moko bibahaana Nzambi. 3 Bayimbila mukunga wu Mose kisadi ki Nzambi, na mukunga wu Mwana Dimeme ti:

«Mfumu Nzambi, Mfumu yi lulendo lumvimba,

bisalu byaku biba bibinene na bingitukulu!

Nzila zaku zilunungu na zikedika zidi,

ntinu yi zinsi wudi.

4 Mfumu, nani walembolo kuzitisa na walembolo kembila nkumbu aku e?

Kadi ngeye kaka wudi wulongo,

mu dyambu ti, zinsi zimvimba zaakwiza

na zaasambila ha ntadisi aku,

mu dyambu ti nzengolo zaku ziyenikini.»

5 Ku manima, nayena nzo-Nzambi yizibuka mu mazulu na mu kati muba na nzo yi kikapu yi luwawanu lu Nzambi. 6 Mbazi nsambwadi zisimba mayeela nsambwadi, zitotoka mu Nzo-Nzambi. Ziba zilwata binkutu bilino biba navekoveko, mpe zilwata melika zi wola zizungidila ntulu. 7 Kimosi mu bihangu biya bimoyo, kihaana ku mbazi nsambwadi, mbungu nsambwadi zi wola, zifuluka mu mankesi ma Nzambi kwe zinganga mimvu ka mimvu. 8 Nzo-Nzambi yifuluka mu mwisi mu dyambu di nkembo na lulendo lu Nzambi. Kuu muntu ko wulenda kota mu nzo-Nzambi, natee mayeela nsambwadi ma zimbazi nsambwadi bu maalunga.