1 Mwana dimeme bu kazibula kikangulu kinsambwadi, ku yulu ku tumbu ba napii, kampe kati-kati di kilokola. 2 Mboki nayena mbazi nsambwadi zitelama ha ntadisi yi Nzambi. Babahaana makulumenta nsambwadi.

3 Mbazi yihiika yiyiza telama ha ntendo ziku di bakwe yokilanga mananasi ma mfuku yimbote, wusimba kuku di wola di bakwe yokilanga maaka mamfuku yimbote. Bamuhaana maaka mamingi mamfuku yimbote, mwanki kahaana mo, ha kimosi na zinsambulu zi balongo bamvimba, ha yulu ziku di wola di bakwe yokilanga mananasi ma mfuku yimbote, dii ha ntadisi yi kyandu ki kintinu. 4 Mwisi wu maaka mamfuku yimbote wedi tombokanga ha kooko ku mbazi, wutomboka ha kimosi na zinsambulu zi balongo, ha ntadisi yi Nzambi. 5 Mboki, mbazi wubonga kuku di wola, wufulusa dyo mu tiya tu ziku di bakwe yokilanga mananasi ma mfuku yimbote, ni kalosa dyo ku ndambusu yi luse lu butoto. Buna mimbamina mitendana, ndinga ziduma, mpedamu ziyenika na butoto buzakama.

6 Zimbazi nsambwadi zisimba makulumenta nsambwadi, zikubama mu sika mo.

7 Mbazi yintete yisika kulumenta. Mvula yi matadi na tiya tuvwatana na menga, bibwa ha luse lu butoto. Mwa ndambu yimosi mu ndambu zitatu yi butoto yihya, mwa ndambu yimosi mu ndambu zitatu zi miti yihya na bititi bimamba bimvimba bihya.

8 Mbazi yinzole yisika kulumenta. Kibaba ki butoto, kii bonso mulandu wuwunene wulema mu tiya, kibwa mu mubu. Mwa ndambu yimosi mu ndambu yitatu yi mubu yikituka menga. 9 Mwa ndambu yimosi mu ndambu zitatu yi bihangu bimvimba bikwe zinganga mu mubu yifwa, mpe mwa ndambu yimosi mu ndambu zitatu yi masuwa mamvimba yimwangana.

10 Mbazi yitatu yisika kulumenta. Lubwetete lumosi lulunene, lwedi kwe lemi bonso mulaka wu tiya, lufuma ku yulu lubwa. Lubwa mu mwa ndambu yimosi mu ndambu zitatu zi nzadi na mu zinto zi mamba. 11 Mpe nkumbu yi lubwetete belolo, yiba «Abisenti», mpila mosi ti muti wundudi. Mwa ndambu yimosi mu ndambu zitatu zi mamba yikituka ndudi mpe bantu babingi mu yobobo banwa mo, bafwa, mu dyambu ti maba ndudi.

12 Mbazi yiya yisika kulumenta. Mwa ndambu yimosi mu ndambu zitatu yi ntangu, mwa ndambu yimosi mu ndambu zitatu yi ngonda na mwa ndambu yimosi mu ndambu zitatu yi zimbwetete, yibaka nsembolo, mwanki mwa ndambu yimosi mu ndambu zitatu yikota mu tombe: kilumbu kizimbisa mwa ndambu yimosi mu ndambu zitatu yi kya kwandi, bumosi mpe mpimpa.

13 Bu natala dyaka, nayuwa mbemba yedi kwe pidumuki nkatika ku yulu ha mbata mutu, yita mu ndinga yingolo ti: «Nkatika kyadi! Nkatika kyadi! Nkatika kyadi ku bantu bazakadi ha luse lu butoto mu ntangu mbazi zitatu zihiika, bu zaasika makulumenta mawu!»