1 Nayena Mwana Dimeme wutelama ha yulu mulandu wu Syoni ha kimosi na mafunda nkama na makumaya na ya (144000) ma bantu baba na nkumbu andi, mpe na nkumbu yi Tata andi zisonama ha mbunzu awu. 2 Nina yuwa ndinga yifuma ku yulu bonso lusuku lu mamba mamingi ma ntadi na bonso lusuku lu mumbamina wutendani, mpe nayuwa ndinga yiba bonso muningu wu bisiki bi lungoyingoyi, bedi sika bisikulu byawu. 3 Bayimbila mukunga wumoona ha ntadisi yi kyandu ki kintinu na ha ntadisi yi bihangu biya bimoyo na ha ntadisi yi binunu. Kuba na muntu ko wulenda mu longoka mukunga bewowo. Balenda mu longoka wo ni mafunda nkama na makumaya na ya (144000) ma bantu, yobobo babakuula ha luse lu butoto.

4 Bantu bebobo, ni yobobo balembolo sumuka na bakento, mu dyambu ti bavedila baba. Bakwe landanga Mwana Dimeme konso-konso ku kana kwenda, mpe babakuula ha kati di bantu mu ba bonso mimbutu mintete ku Nzambi na ku Mwana Dimeme. 5 Mu munwa awu, mwatotokidi misamu mi luvunu ko, mpe kuu na dyambu di balendi babakila kibila ko.

6 Nayena mbazi yihiika yedi kwe pidumuki ha kati-kati di yulu. Yiba na Musamu Wumbote wu mimvu ka mimvu we samuna ku bantu baa ha luse lu butoto, ku zinsi zimvimba, ku bifumba bimvimba, ku zindinga zimvimba na ku makanda mamvimba. 7 Yita mu ndinga yingolo ti: «Zitiseeno Nzambi, mpe mukembiseeno mu dyambu ti, ntangu yi kana fundisa yifweni. Sambileeno ha ntadisi yi yondowo wuhidika yulu, butoto, mubu na zinto zi mamba!»

8 Mbazi yinzole yilanda yintete yita ti: «Yibwidi, yibwidi, mbanza yiyinene yi Babiloni! Yinwikisi zinsi zimvimba vinu di mankesi ma kindumba kyandi!»

9 Ku manima ma mbazi zole zintete, mbazi yitatu yilanda na yizonza mu ndinga yingolo ti: «Tala ti muntu sambidi kibulu na kiteki kyandi, mpe tambudi kidimbu ha mbunzu hoti ha kooko kwandi, 10 yandi mpe waanwa vinu di mankesi ma Nzambi, dibabulumuni dilembolo vwatusu na kima mu mbungu yi mankesi ma Nzambi! Mpe waakwamusu mu kati di tiya na sufele, ha ntadisi yi zimbazi zilongo na yi Mwana Dimeme! 11 Mwisi wu mpasi zawu, wuna tomboka mimvu ka mimvu. Baahuma ko mpimpa na mwini, yobobo bakwe sambilanga kibulu na kiteki kyandi, mpe yobobo bamvimba batambudi kidimbu kyandi.»

12 Yi ni ntangu yi mvibudulu yi bantu bavwihulu ku Nzambi, bakwe kebanga mina mi Nzambi na kiminu mu Yesu.

13 Mboki nayuwa ndinga yimosi ku mazulu yita ti: «Sonika: "Kyese ku bantu bana fwa bwabu mu Mfumu mu ntangu beyiyi!" "Ninga, Mpeve yiteedi ti: Bika bahuma mu bisalu byawu, mu dyambu ti mavanga mawu mana balanda !"»

14 Meno nayena tuti dimosi dimpembe na muntu wuba wuzakala ha yulu tuti, wufwanakana na Mwana Muntu. Wuba na mpu yi kintinu yi wola ha yulu mutu na ha kooko kwandi, wuba na mbele yikondama yimeeno. 15 Mbazi yihiika yiduuka mu nzo-Nzambi, yilooka mu ndinga yingolo ku yondowo wuba wuzakala ha yulu tuti ti: «Simba mbele aku yikondama na yonzika mbutu, ntangu yifweni ye yonzika zo, mu dyambu ti mbutu zii ha luse lu butoto ziyedidi!» 16 Ni hahoho, yondowo wuba wuzakala ha yulu tuti, wulosa mbele andi yikondama ha luse lu butoto na wuyonzika mbutu zimvimba zii ha luse lu butoto.

17 Mbazi yihiika yiduuka mu nzo-Nzambi yii ku mazulu. Yiba yawu mpe na mbele yikondama yimeeno.

18 Mbazi yihiika yiba na lulendo lwe yaala tiya, yiduuka ha ziku di bakwe yokilanga minkayulu. Yilooka mu ndinga yingolo ku yondowo wuba na mbele yikondama yimeeno ti: «Simba mbele aku yikondama yimeeno na yonzika bikanka bi mbutu zi muti wu vinu zii ha luse lu butoto, mu dyambu ti ziyedidi.» 19 Mbazi yilosa mbele andi yikondama ha luse lu butoto. Yiyonzika mbutu zi muti wu vinu zii ha luse lu butoto, mpe yilosa mbutu zikayonzika mu kikamununu kikinene ki mankesi ma Nzambi. 20 Bakamuna mbutu mu kikamununu ku mbazi yi mbanza, menga ni maduuka momo na mafuluka natee mu kitezo ki minwa mi zimpunda, mpe mamwangana mu zikilometele nkama tatu (300).