1 Ku manima, bampaana dyadya dimosi difwanakana na mwa muti mu tanga zimetele. Banteela ti: «Yenda tanga zimetele zii mu nzo-Nzambi na zii ziku di bakwe yokilanga minkayulu, mpe tanga yobobo bakwe sambilanga momo. 2 Kansi, kutangandi zimetele zii ku mbazi yi nzo-Nzambi, mu dyambu ti mbazi yabahaana ku balembolo ba Bayudayo. Yawu baamwangisa mbanza yilongo mu ngonda makumaya na zole. 3 Mbo nahaana lulendo lwe bikula ku zimbangi zani zole, zilweti nsaku mu lonka kifwidi, mu bilumbu funda dimosi na nkama zole na makumasambanu.»

4 Mbangi zole bezozo zidi bonso miti myole mi olive na bitentokolo byole bi minda bidi bitelama ha ntadisi yi Mfumu yi luse lu butoto✝. 5 Tala ti muntu wuna sosa mu bahidika misamu mimbi, tiya twaduuka mu minwa myawu na twanyengisa mitantu myawu. Tala ti muntu wuna kana mu bahidikila misamu mimbi, bwabobo kaafwila. 6 Baa na lulendo mu kanga mvula mu bilumbu bi mbikudulu awu. Mpe baa na lulendo mu kitula mamba menga na mu semba luse lu butoto mu mayeela ma mumpila-mumpila bonso bu batiidi.

7 Bu bamanisa mu ta kimbangi kyawu, kibulu kinatomboka mu bulu dinsisi, kyaabanwanisa, kyaababedisa na kyaabahonda. 8 Mvumbi zawu zaaba mu nzila yisadila yi mbanza yiyinene yi bakwe tumisinanga mu kifwani kii bonso mbanza yi Sodomo hoti nsi yi Ngipiti. Mu mbanza beyoyo yi bakomina Mfumu awu ha kulunsi. 9 Bantu ba makanda mamvimba, bifumba bimvimba, zindinga na zinsi zimvimba, baasa bilumbu bitatu na ndambu mu tala mvumbi zawu, mpe baabahaana luve ko mu ziika zimvumbi. 10 Bantu bana zinga ha luse lu butoto, baayangalala mu dyambu dyawu, baasa mukembo, baahaanasana yawu na yawu minkayulu, mu dyambu ti mimbikudi myole bemyomyo mitoma yenisa mpasi bantu baa ha luse lu butoto.

11 Ku manima ma bilumbu bitatu na ndambu, mpeve yimosi yifuma ku Nzambi, yikwe haananga luzingu, yikota mu yawu, mboki ni batelama. Bantu bebobo bedi batalanga, baabaka bunkuta bubwingi. 12 Bayuwa ndinga yimosi yingolo yifuma ku yulu, yibateela ti: «Tombokeeno eha!» Batomboka ku yulu mu kati di tuti, ha meso ma mitantu myawu. 13 Mu ntangu beyoyo kwandi, butoto buzakama mu ngolo, ndambu yimosi mu ndambu kumi yi mbanza yi mwangana. Mafunda nsambwadi ma bantu mahondo mu butoto bebobo buzakama. Bantu bahiika babaka kintekoto na bakembisa Nzambi yi mazulu.

14 Mpasi zinzole zihyokidi. Zitatu zina kwiza mu mwa bilumbu bifyoti.

15 Buna mbazi yinsambwadi yisika kulumenta. Ndinga zizinene ziyuwakana ku yulu, zita ti: «Kintinu ki nza kyeka bwabu mu moko ma Mfumu eto na Klisto andi, mpe waayaala mimvu ka mimvu✝!» 16 Zinkuluntu makumole na ziya ziba zizakala mu byandu byawu bi kintinu ha ntadisi yi Nzambi, zidongama luse ha nsi, mpe zisambila Nzambi. 17 Zita ebu:

«Matondo tuna kuvutudila,

Mfumu Nzambi yi lulendo lumvimba,

Mfumu yi bima bimvimba,

Ngeye wudi na wuba,

mu dyambu ti wulonkidi bunene bu lulendo lwaku,

wutungidi Kimfumu kyaku.

18 Nsi zimeni nangumuka mu mankesi mu dyambu dyaku,

kansi bwabu ni mankesi maku mana yenika.

Ntangu ye fundisa bafwa yifweni,

ntangu yi waasendila mimbikudi bisadi byaku,

bamvimba bebobo bavwihulu ku Nzambi

na bazitisi kimfumu kyaku,

bantu bamfunu hoti ba bakwe tyakanga.

Ntangu yifweni ye mwangisa yobobo bana mwangisa nza✝!»

19 Nzo-Nzambi yizibuka mu mazulu, mpe nkela yi luwawanu lwandi yiyenika momo. Buna mpedamu ziyenika, ndinga ziyuwakana, mimbamina mitendana, butoto buzakama na mvula yi matadi yingolo yibwa.