1 Meno ni Pawuli, mundongo wu Nzambi mpe ntumwa yi Yesu-Klisto.

Nzambi wumpaana kiyeko mu nata bantu bebobo ba kasoola baba na kiminu, mpe mu banata ku nzayilu yi kikedika kifwanakani mu ba wukangama mu Nzambi, 2 na mu kivuvu ki luzingu lu mimvu ka mimvu. Nzambi yikwe lembolo hunanga, wutuhaana nsilulu yi luzingu lu mimvu ka mimvu, 3 mu ntangu yi kakubika, wuzabikisa mambu mandi mu ndongolo yi kampaana mu ntumunu yi Nzambi wudi mvulusi eto.

4 Meno nsonikini mukanda bewuwu ku ngeye, Tito, mwana ani wukedika mu kiminu kii neto ntwadi. Bika Nzambi Tata na Mfumu eto Yesu-Klisto, mvulusi eto, kakusakumuna mpe kakuhaana kiyenge!

5 Nakusiisa ku mbanza yi Kelete, mwanki wumanisa mu kubika misamu bemyomyo misala mu hidika, mpe wuzakisa bakuluntu ba dibundu mu kadi mbanza, bonso nsikudukusu zi nakuhaana. 6 Mukuluntu wu dibundu wufweni ba wusungama, na kaba bakala di mukento wumosi kaka. Baala bandi bafweti ba minsambidi, ka babandi na bukolo, mpe na nkadulu yimbi ko yilendi bafundila bantu. 7 Mu dyambu ti, mukuluntu wu dibundu fweti ba na nkadulu yimbote, mu dyambu ti yandi ni munkebi wumvwilu yi Nzambi: Kalendi ba muntu wuu na mayama ko, wuu na mankesi ko, ka kinkolo mbungu ko, ka muntu wutiidi bikindu ko, mpe kabandi muntu kwe sosanga mbongo mu nzila zimbi ko. 8 Kansi yandi fweti toma zaba mu bwananga banzenza, mpe fweti ba muntu wuzebi mu hidika misamu mimbote. Yandi fweti ba muntu wuu na mabanza mambote, wuludedomo, wuvedila, mpe muntu wukwe kiyaalanga. 9 Fweti ba wukangama mu ndongosolo yi mambu ma Nzambi makedika bonso bu baalongila mo. Bwabobo kaabela na ngolo mu syamisa bahiika mu ndongosolo yikedika, mpe mu lonka luvunu ku yobobo bana mubangisa.

10 Mu dyambu ti, kuu na bantu babingi bakwe lembolo tumamanga, mpe bakwe tanga misamu milembolo fwanakana na bakwe hunanga banawu na sungula ha kati di yobobo baa Bayudayo. 11 Lufweti bakangisanga minwa, mu dyambu ti bakwe bunganga makanda mamingi mu ndongosolo yi misamu mi luvunu, mpe mu baka mbongo mu nzila zimbi. 12 Wumosi mu mimbikudi mi yawu bende wuta ti: «Bisi-Kelete tuka ntama, bantu ba luvunu badi, bibulu binsisi bidi, na bilenga bimpamba mpe kibazebi kaka ni kudya.» 13 Kimbangi bekiki nkatika ki makedika kidi. Ni hahoho, basembila mu kibakala, mwanki baba na kiminu kivedila. 14 Ka babandi bakangama mu bimpa bi Bayudayo, mpe mu ntumunu zikwe tukisanga bantu bakwe bisanga kikedika. 15 Bimvimba bivedila bidi ku yobobo badi bavedila, kansi kunaani kima kivedila ku yobobo badi basumuka na balembolo ba na kiminu, mu dyambu ti madyela mawu na mpisulu zawu zisumuka zidi. 16 Bakwe tanga ti yawu bazebi Nzambi, kansi bakwe mubisanga mu ndyatulu awu. Badi nkatika bantu bambi, batiidi mu nangumukanga mpe balendanga mu sala kisalu kimbote ko.