1 Babambula moyo ti bafweti tumimina zimfumu na minyadi, batumama, na baba bakubama mu sala bisalu bimvimba bimbote. 2 Babiika mu toola nakani muntu, babiika bikindu, baba bantu ba kizunu mpe balonka lembami ku bantu bamvimba. 3 Mu dyambu ti, yeto mpe mu ntama tuba bantu balembolo madyela, ba bukolo, bazimbala, mindongo mi zinzinunu na byese bi mumpila mumpila. Twedi zinganga mu nsadulu na mu mpwila zimbi, bedi tubelanga na twedi belasananga yeto na yeto. 4 Kansi bumbote bu Nzambi Muvuukisi eto na luzolo lwandi mu bantu bu luyiza zabakana, 5 Nzambi wutuvuukisa. Ka mu dyambu di misamu mimbote mi tukwe hidikanga ko, kansi mu dyambu di nkenda andi. Wutuvuukisa mu mbotokolo yi mbutuka yimoona na mu luzingu lumoona lutuhaana Mpeve Yilongo. 6 Mpeve Yilongo beyoyo yi kadukula bubwingi mu yeto mu lusadusu lu Yesu-Klisto Muvuukisi eto. 7 Mu mulemvo andi, wutusa bantu ba lunungu, mwanki tubyadila fwa bonso budi kivuvu kyeto mu luzingu lu mimvu ka mimvu. 8 Mambu bemama makedika madi, ntiidi ti wutoma nyema misamu bemyomyo.

Mwanki bamvimba bebobo bakwikidi mu Nzambi batatamana mu sala bisalu bimbote. Bwabobo budi bumbote na mfunu ku bantu. 9 Kansi, tina nzonzolo zi buzengi, misamu mi kinkulu, mayuma, mbakani mu dyambu di Misiku. Mu dyambu ti bii mfunu na kisalu ko. 10 Tala ti muntu wuna twala nkabani, mukebisa nkumbu yintete, mboki yi nzole. Ku manima, mutatula. 11 Zaba ti muntu wubobo wuzimbala kadi, na kwe holanga masumu, mpe kwe kibedisanga yandi bende.

12 Bu naakutambika Atemase hoti Tisiki, toma sa muswalu mu kwiza mbwana ku mbanza yi Nikopolise, mu dyambu ti kwakoko mbongidi nzengolo mu hyokisila nsungi yi kyozi kingolo. 13 Sa manzaki mu bakisa Zenase, wu mulongisi wu Misiku, na Apolose mu nzyetolo awu, mwanki nakani kima kilembolo bakondo. 14 Bufwanakani ti bantu bayeto bende balongoka mu sanga misamu mimbote, mu haana lusadusu mu nsatu zivudi mfunu, mwanki baba bantu baabuta mimbutu.

15 Bantu bamvimba baa naani kintwadi, mbote bakutambikidi. Ngeye mpe kokoko ku wudi, haana mbote ku yobobo batutiidi mu kiminu.

Bika lusakumunu lu Nzambi luba ku yeno bamvimba!