1 ታን ክርስቶሳ ሌምሱዋ ካልያዋዳን፥ ህንተንቱካ ታዋ ካልተ።

2 ታናዳን አማንያዋንቶ፥ ህንተ ኡባባን ታና ሀሳይያ ድራዉነ፥ ዎጋ ታን ህንተንቶ እሜዳዋዳን፥ ህንተ ምንሲደ ናግያ ድራዉ፥ ህንተንታ ጋላታይ። 3 ሽን ክርስቶስ አቱማዋ ኡባዉ ሁጰ ግድያዋ፥ አቱማ አሳይ ማጫ አሳዉ ሁጰ ግድያዋነ ቃይ ጾሳይ ክርስቶሳዉ ሁጰ ግድያዋ ህንተ ኤራና ማላ ኮያይ። 4 ጾሳ ዎሲደ፥ ዎይ ትምቢትያ ኦዲደ፥ ባረ ሁጲያ ጎዝያ አቱማ አሳይ ኡባይ ክርስቶሳ ቶቼ። 5 ቃይ ጾሳ ዎሳደ ዎይ ትምቢትያ ኦዳደ፥ ባረ ሁጲያ ጎዘና ማጫዉና ባረ አስና ቶቻዉ፤ አያዉ ጎፐ፥ እዛ ባረ ሁጲያ ሜደታ ድጎንና እት ማላ።

6 ማጫዉና ባረ ሁጲያ ጎዛና ዮፐ፥ ቃንጽሱ። ሽን እዛ ባረ ሁጲያ ቃንጽሳናዌ ዎይ ሜድሳናዌ ፖኮፐ፥ ባረ ሁጲያ ጎዙ። 7 አቱማዌ ጾሳ ሌምሱዋነ ቦንቹዋ ግድያ ድራዉ፥ ባረ ሁጲያ ጎዛናዉ በሰና፤ ሽን ማጫዉና አቱማዎ ቦንቾ።✝ 8 አያዉ ጎፐ፥ ማጫዉና አቱማዋፐ ቤታዱፐ አትን፥ አቱማዌ ማጫዉንፐ ቤትቤና።✝ 9 አያዉ ጎፐ፥ ማጫዉና አቱማዋ ድራዉ መታዱፐ አትን፥ አቱማዌ ማጫዉን ድራዉ መትቤና። 10 ሄዋ ድራዉ፥ ማጫዉና ባረ አስና አይሱዋፐ ጋርሳና ደእያዋ ኤርሳናዉነ ኪታንቻቱዋ ድራዉ፥ እዝ ሁጲያን ጎዝያባይ ደአናዉ በሴ።

11 ሽን ጎዳን ማጫዉና አቱማዌ ባይናን ደኡኩ፤ አቱማዌካ ማጫዉና ባይናን ደኤና። 12 አያዉ ጎፐ፥ ማጫዉና አቱማዋፐ መቴዳዋዳን፥ ቃይ አቱማዌካ ማጫዉንፐ የለቴዳ። ቃይ ኡባባይካ ጾሳፐ ዬ።

13 ህንተንቱ ህንተ ሁጰዉ ፕርድተ። ማጫዉና ባረ ሁጲያ ጎዘናን ጾሳ ዎሳናዉ በሲ? 14,15 አቱማዌ ባረ ሁጲያ ድቾፐ፥ አዉ ፖኮ። ሽን ማጫዉና ባረ ሁጲያ ድቾፐ፥ እዝዉ ቦንቾ ግድያዋ ሀራይ አቶ፥ መተንቶነ ህንተንታ ታማርሰኔ? አያዉ ጎፐ፥ ማጫዉን ሁጲ እዞ ካማናዉ እዝዉ እመቴዳ። 16 ሽን ኦንነ ሀ የዉዋን ፓሉመታናዉ ኮዮፐ፥ ኑዉ ግድና ዎይ ጾሳ አማንያዋንቶ ግድናካ፥ ሀዋፐ ሀራ ዎጋይ ባዋ።

17 ህንተ ሺቅያዌ ኢታባሳፐ አትን፥ ሎኦባሳ ግደና ድራዉ፥ ታን ሀ አዛዙዋ እማደ ህንተንታ ጋላትከ። 18 ሽን ህንተ ዎሳ ጎለን ሺቅያ ዎደ፥ ህንተ ግዶን ጳልቀይ ደእያዋ ታን ስሳይ። ቃይ ሄዌ እት ባጋና ቱማ ግድያዋ አማናይ። 19 አያዉ ጎፐ፥ ህንተ ማታን አማነቴዳዋንቱ ቆንጭ ኤረታና ማላ፥ ህንተ ግዶንካ ቃይ ሻኩ ደአናዉ በሴ። 20 ሄዋ ድራዉ፥ ህንተ እትፐ ሺቅያ ዎደ፥ ህንተ ሺቁ ጎዳ ካዉዋ ማናሳ ግደና። 21 አያዉ ጎፐ፥ ህንተ ቁማ ምያ ዎደ፥ ኡባይ ሁጲያን ሁጲያን ባረዋ ባረዋ ምያ ድራዉ፥ እቱ ኮሻቴ፤ እቱ ቃይ ማቴ። 22 ማናዉነ ኡሻናዉ ህንተንቶ ጎሊ ባዌ? ዎይ ጾሳ ዎሳ ጎልያ ካቴ? ቃይ አይነ ባይናዋንታ ዬላዪቴ? ታን ህንተንታ ዋጎ? ሀ የዉዋን ታን ህንተንታ ጋላቶ? ጋላትከ።

23 አያዉ ጎፐ፥ ታን ቃይ ህንተንቶ እሜዳ ትምርትያ ጎዳፐ አካድ። ጎዳ የሱስ ኡንቱንቱ አ አደ እሜዳ ቃማ ዳቡዋ አኪደ፥✝ 24 ጾሳ ጋላቴዳ፤ ዳቡዋ መንደ፥ "ሄይተ፤ ሚተ። ሀዌ ህንተ ግሻታዉ ባረና እሜዳ ታ አሹዋ። ሀዋን ታና ቆፕተ" ያጌዳ። 25 ሀዋዳንካ፥ ካዉዋ ሚደ ስምና፥ ጹኣ ቃይ አኪደ፥ "ሀዌ ጹአይ ታ ሱን ታን ጫቄዳ ኦራ ጫቁዋ። ህንተንቱ አፐ ኡሼዳ ዎደ ኡባን ሄዋን ታና ቆፕተ" ያጌዳ።✝ 26 አያዉ ጎፐ፥ ህንተ ሀ ዳቡዋ ሜዳ ዎደ ኡባንነ ሀ ጹኣፐ ኡሼዳ ዎደ ኡባን ጎዳይ ያና ጋካናዉካ፥ አ ሀይቁዋ ኦዲታ።

27 ሄዋ ድራዉ፥ በሰናን ደኢደ ጎዳ ዳቡዋ ምያዌ፥ ዎይ ጎዳ ጹኣፐ ኡሽያዌ ኦንነ አ አሹዋነ አ ሱ አጮቴ። 28 ሽን አሳይ ባረ ሁጲያ ፓጮ። ያቲደ ዳቡዋ ሞ። ጹኣፐካ ኡሾ። 29 አያዉ ጎፐ፥ ጎዳ አሹዋ ሻኪደ ኤረናን ዳቡዋ ምያዌነ ጹኣፐካ ኡሽያዌ ባረ ሁጰዋ ፕርዳ ሜኔ ኡሼ። 30 ሄዋ ድራዉ፥ ህንተ ግዶን ጮራቱ ዳቡራንቻነ ሀርጋንቻ ግዴድኖ፤ ቃይ ኡንደኔዳዋንቱ ሀይቄድኖ። 31 ሽን ኑን ኑ ሁጲያ ቱሙ ፓጬደንቶ፥ ጾሳይ ኑና ፕርደና። 32 ኑን ፕርደትያ ዎደ፥ ሀ አላምያና እትፐ ፕርደተና ማላ፥ ጎዳይ ኑና ሴሬ።

33 ሄዋ ድራዉ፥ ታናዳን አማንያዋንቶ፥ ጎዳ ካዉዋ ማናዉ ህንተ ሺቅያ ዎደ፥ እቱ እቱዋ ናግተ። 34 ኦንነ ኮሻቴዳዋ ግዶፐ፥ እትፐ ሺቅያ ዎደ ጾሳ ፕርዳን ህንተ ገለና ማላ፥ ባረ ሶይን ሞ።

አቴዳዋ ታን ያ ባደ ጊግሳና።