1 ታናዳን አማንያዋንቶ፥ ጌሻ አያና እሞታባ ህንተ ኤራናዉ ኮያይ። 2 ህንተንቱ ጾሳ አማነና ዎደ፥ ኡባ ዎደ ካልያዋዳንካ፥ ሃሳየና ኤቃቱዋኮ ህንተ ቤዳዋ ኤሪታ። 3 ሄዋ ድራዉ፥ ጾሳ አያናይ ካለያ አሳይ ኦንነ፥ "የሱስ ሸቀቶ" ያጊደ ሃሳየናዋነ ቃይ ጌሻ አያናይ ካለፐፐ አትን፥ ሀራይ አቶ እት አሳይነ፥ "የሱስ ጎዳ" ጋናዉ ዳንዳየናዋ ታን ህንተንታ ኤርሳይ።

4 አያና እሞታይ ዱማ ዱማ፤ ሽን እምያ አያናይ እቱዋ።✝ 5 ቃይ ኦያ ኦሱ ዱማ ዱማ፤ ሽን ጎዳይ እቱዋ። 6 ኦሱዋ ኦናዉ ዱማ ዱማ ኦጊ ደእሽን፥ ሄ ኦያ ኦግያ ኡባ አሳ ኡባዉ ቆንጭስያ ጾሳይ እቱዋ። 7 ሽን አሳ ኡባ ማዳናዉ፥ ጌሻ አያና ቆንጭስያ ዎልቃይ ኡባዉ ሁጲያን ሁጲያን እመቴዳ።

8 አያዉ ጎፐ፥ ጌሻ አያናይ እቶ አ ኤራተ ሃሳያ እሜዳ፤ ቃይ እቶ ኤራተ ሃሳያ እሜዳ። 9 ሄ ጌሻ አያናይ እቶ አማኑዋ እሚደ፥ የኮ ሀርጋንቻ ፓያ ዎልቃ እሜዳ። 10 ጌሻ አያናይ እቶ ማላታ ኦያ ዎልቃ እሚደ፥ እቶ ትምቢትያ ኦድያ ዎልቃ እሜዳ። እቶ አያናቱዋ ግዱዋን ደእያ ዱማተ ኤርያ ዎልቃ እሚደ፥ እቶ ዱማ ዱማ ቃላን ሃሳይያ ዎልቃ እሜዳ። ቃይ እቶ ዱማ ዱማ ቃላን ሃሳዬዳዋ ብልያ ዎልቃ እሜዳ 11 ሽን ሀ ኡባባ ኦያዌ ሄ እት ጌሻ አያና። አሳ ኡባዉ እ ባረ ኮይያዋዳን፥ ዱማ ዱማ እሞታ ሻክ ሻኪደ እሜዳ።

12 ክርስቶስ ጮራ አሳተቱ ደእያ እት ቦላ ማላ። ቦላይ ጮራ አሳተቱዋፐ መቴዳዋ ግዶፐካ፥ እት ቦላ።✝ 13 አያዉ ጎፐ፥ ኑን አይሁዳ አሳ ግዶፐነ ዎይ ግሪከ አሳ ግዶፐ፥ ዎይ አይለ ግዶፐነ ዎይ ዎማኖ ግዶፐ፥ ኡባይ እት ጌሻ አያናን እት ቦላ ግዳናዉ ጻማቀቴዶ። ቃይ ኑን ኡባይ እት ጌሻ አያና ኡሼዶ።

14 አያዉ ጎፐ፥ ቦላዉ አሳተይ ጮራ ግድያዋፐ አትን፥ እቱዋ ግደና። 15 ገዲ፥ "ታን ኩሽያ ግደና ድራዉ፥ ቦላ ቆሞ ግድከ" ጎፐ፥ እ ሄዋ ግያዌ ቦላ ቆሞ ግድያዋ ድጋኔ? 16 ሀይይካ፥ "ታን አይፍያ ግደና ድራዉ፥ ቦላ ቆሞ ግድከ" ጎፐ፥ እ ሄዋ ግያዌ ቦላ ቆሞ ግድያዋ ድጋኔ? 17 ቦላይ ኡባይ አይፍያ ጻላላ ግድንቶ፥ ዎቲደ ስሳናዉ ዳንዳዪ? ቃይ ቦላይ ኡባይ ሀይ ጻላላ ግድንቶ፥ ዎቲደ ስንጋናዉ ዳንዳዪ?

18 ሽን ጾሳይ ባረ ኮዬዳዋዳን፥ ቦላ አሳተቱዋ እቱዋ እቱዋ ቦላን ዎዳ። 19 ኡባይ እት ቆሞ ግድንቶ፥ ቦላይ ሀቃን ደአኔ? 20 ሽን አሳተቱ ጮራ ግዶፐካ፥ ቦላይ እቱዋ።

21 አይፊ ኩሽያ፥ "ኔን ታና ኮሻካ" ጋናዉ ዳንዳየና። ዎይ ቃይ ሁጲ ገዳቱዋ፥ "ህንተንቱ ታና ኮሽክታ" ጋናዉ ዳንዳየና። 22 ሽን ላፋ ማላትያ ቦላ አሳተቱ ሎይ ኮሽያዋንታ። 23 ቦላ አሳተቱዋፐ ቦንቼተናዋንታ ኑዉ ማላትያዋንታ ኑን ሎይ ቦንቼቶ። ቃይ ኑና ዬላይያ ቦላ አሳተቱዋካ ሎይ ቦንቼቶ። 24 ኑ ቦላፐ ቤትያ ባጋዉ ማዩ ኮሸና፤ ሽን ፖክያ ባጋ አሳተቱዋ ሎይ ማይዛናዳን፥ ጾሳይ አሳተ እትፐ ጋዳ። 25 ቦላ አሳተቱ እቱ እቶ እት ማላ ቆፋ ቆፓናፐ አትን፥ ቦላን ዱማተይ ደአናዉ በሰና። 26 ቦላ አሳተቱዋፐ እቱ ሴለቶፐ፥ ቦላ አሳተቱ ኡባይካ አናና ሴለቲኖ፤ ቦላ አሳተቱዋፐ እቱ ቦንቼቶፐ፥ ቦላ አሳተቱ ኡባይ አናና ናሸቲኖ።

27 ህንተንቱ ኡባይ ክርስቶሳ ቦላ፤ ቃይ ሁጲያን ሁጲያን ህንተ ኡባይካ አ ቦላ አሳተቱዋ። 28 ጾሳይ ዎሳ ጎለን እት እት አሳቱዋ፥ ኮይሩዋን የሱስ ኪቴዳዋንታ፥ ላኤንዋን ናባቱዋ፥ ሄዘንዋን ታማርስያዋንታ፥ ሄዋፐ ጉይያን፥ ማላታ ኦያዋንታ፥ ሄዋፐ ጉይያን፥ ፓያ ዎልቃይ ደእያዋንታ፥ ማድያዋንታ፥ ዎሳ ጎልያ አይስያዋንታ ዱማ ዱማ ቃላን ሃሳይያዋንታ ኦዳ።✝ 29 ኡባቱ የሱስ ኪቴዳዋንቴ? ኡባቱ ናባቴ? ኡባቱ ታማርስያዋንቴ? ኡባቱ ማላታ ኦኖ? 30 ኡባዉ ፓያ ዎልቃይ ደኢ? ኡባቱ ዱማ ዱማ ቃላን ሃሳዪኖ? ቃይ ዱማ ዱማ ቃላን ሃሳዬዳዋ ኡባቱ ብሊኖ? 31 ሽን ኡባፐ አያ እሞታ ሎይ ኮይተ።

ቃይ ኡባፐ ሎይ አያ ኦግያ ታን ህንተንታ በሳና።