1 ኑን ጾሳ ናናቱዋ ጌተቲደ ጼሰታና ማላ፥ ጾሳይ ኑና አይ ኬና ሲቄደንቶነ በእተ። ኑን ቱሙካ አ ናናቱዋ። ሀ አላሚ ጾሳ ኤረና ድራዉ፥ ኑናካ ኤረና።✝ 2 ታ ሲቃቶ፥ ሀእ ኑን ጾሳ ናናቱዋ፤ ኑን አያ ሀናነንቶ ብሮ ኤረትቤና፤ ሽን ክርስቶስ ቆንጭያ ዎደ፥ ኑን አ ማላታናዋ ኤሬቶ። አያዉ ጎፐ፥ እ ቱሙ አ ግድያዋ ኑን ኩመንን በአና። 3 ቃይ ክርስቶሳ በአና ጊደ ናሸቻን ናግያ ኦንነ ክርስቶስ ጌሻ ግዴዳዋዳን፥ ባረና ጌሼ።

4 ናጋራ ኦያ ኡባይ ጾሳ ህግያ መን፤ አያዉ ጎፐ፥ ናጋራይ ጾሳ ህግያ መንሳ። 5 ክርስቶስ አሳ ናጋራ ይሳናዉ ቆንጬዳዋ ህንተ ኤሪታ፤ አን ናጋራይ ባዋ።✝ 6 ክርስቶሳን ደእያ ኦንነ ናጋራ ኦደ ደኤና፤ ቃይ ናጋራ ኦደ ደእያ ኦንነ አ በእቤና ዎይ ኤርቤና።

7 ታ ናቶ፥ ኦንነ ህንተና ባለፖ። ክርስቶስ ጽሎ ግድያዋዳን፥ ጽሎባ ኦያ ኡራይ ጽሉዋ። 8 ጻላህያ ካፑ ኮይሩዋፐ ናጋራ ኦዳ ድራዉ፥ ናጋራ ኡባ ዎደ ኦያ ኡራይ ጻላህያ ካፑዋሳ፤ ሄዋ ድራዉ፥ ጾሳ ናአይ ጻላህያ ካፑዋ ኦሱዋ ይሳናዉ ቆንጬዳ። 9 ጾሳ ናናቱዋ ግድያ ኡባይ ጾሳ መታይ ኡንቱንቱን ደእያ ድራዉ፥ ናጋራ ኡባ ዎደ ኦክኖ፤ ቃይ ጾሳይ ኡንቱንቱ አዉዋ ግድያ ድራዉ፥ ናጋራ ኦናዉ ዳንዳይክኖ። 10 ጾሳ ናናቱ ግዱዋንነ ጻላህያ ካፑዋ ናናቱዋ ግዶን ደእያ ዱማተይ ሀዋን ኤረቴ፤ ጽሎባ ኦናዋንቱነ ዎይ ባረ እሻ ሲቀናዋንቱ ኦንነ ጾሳ ናናቱዋ ግድክኖ።

11 አያዉ ጎፐ፥ ኮይሩዋፐ ህንተ ስሴዳ ኪታይ፥ "እቱ እቱዋና ሲቀታናዉ በሴ" ያግያዋ።✝ 12 ኑን ቃዬላ ማላ ግዳናዉ በሰና። ቃዬል ጻላህያ ካፑዋሳ፤ ሄዋ ግዶ ድራዉ፥ ባረ እሻ ዎዳ። እ ባረ እሻ አያዉ ዎዴ? እ ኦዳ ኦሱ ኢታ ግድና፥ አ እሻይ ኦዳ ኦሱ ሎአ ግዴዳ ድራዉ ዎዳ።✝

13 ታናዳን ጾሳ ካልያዋንቶ፥ ሀ ሳኣ አሳይ ህንተና እጾፐ፥ ኦራባ ጎፕተ። 14 ኑን አማንያዋንታ ሲቅያ ድራዉ፥ ሀይቁዋፐ ደኦ ፕኔዳዋ ኤሬቶ፤ አማንያዋንታ ሲቀና ኡራይ ኦንነ ሀይቁዋ ግዶን ደኤ። 15 አማንያዋንታ እጽያ ኦንነ ሸምፑዋ ዎዳዋ፤ ቃይ ሸምፑዋ ዎዳዋን መና ደኡ ባይናዋ ህንተ ኤሪታ። 16 ክርስቶስ ባረ ሸምፑዋ ኑ ድራዉ አደ እሜዳዋን ሲቁ አየንቶ ኑን ኤሬዶ፤ ኑንካ አማንያዋንቱ ድራዉ፥ ኑ ሸምፑዋ አደ እማናዉ በሴ። 17 ሽን ዱረ አሳይ ኦንነ ባረ እሻይ መቶትያዋ በኢደ፥ አዉ ቃረተናን እጾፐ፥ ባረ ዎዛናን ጾሳ ሲቃይ ጋናዉ ዋን ዳንዳዪ? 18 ታ ናቶ፥ ኑን ኦሱዋንነ ቱማተን ሲቀቶይተፐ አትን፥ ጮ ሃሳያን ዎይ ቦላ ዶናን ሲቀታናዉ በሰና።

19,20 ኑን ቱሙዋ ባጋን ደእያዋ ሄዋን ኤራና፤ ቃይ ኑ ዎዛናይ ኑ ቦላ ፕርድያ ዎደ ኡባን፥ ጾሳ ስንን ቱማተ ኑና ሄዋን ኤርሴ። አያዉ ጎፐ፥ ጾሳይ ኑ ዎዛናፐ ዎልቃማ፤ ቃይ እ ኡባባ ኤሬ።

21 ታ ሲቃቶ፥ ኑ ዎዛናይ ኑ ቦላ ፕርደናዋ ግዶፐ፥ ኑን ጾሳ ስንን ያዮኮ። 22 ኑን አ አዛዙዋ ናግያ ድራዉነ አ ናሸችያባ ኦያ ድራዉ፥ ዎስያ ኡባባ አፐ አኬቶ። 23 ጾሳ አዛዙ ሀዋ: ክርስቶስ ኑና አዛዜዳዋዳንካ፥ ጾሳ ናኣ የሱስ ክርስቶሳ ሱንን ኑን አማናናዳንነ እቱ እቱዋና ሲቀታናዳን ጾሳይ ኑና አዛዜዳ። 24 ጾሳ አዛዙዋ ናግያ ኦንነ ጾሳ ግዶን ደኤ፤ ጾሳይካ አ ግዶን ደኤ፤ ጾሳይ ኑዉ እሜዳ አ አያና ባጋና እ ኑ ግዶን ደእያዋ ኑን ኤሬቶ።