1 ኑና አሽያ ጾሳይነ ኑን በአና ጊደ ናሸቻን ናግያ የሱስ ክርስቶስ አዛዜዳ አዛዙዋዳን፥ የሱስ ክርስቶስ ኪቴዳዋ ግዴዳ ታን ጳዉሎስ፥ 2 አማኑዋ ባጋና ታ ቱሙ ናአዉ፥ ጽሞቶሳዉ ሀ ዳብዳቢያ ጻፋይ።

ጾሳ ኑ አዉዋፐነ ኑ ጎዳ ክርስቶሳ የሱሳፐ አ ኬካተይ፥ ማሮተይነ ሳሮተይ ነዉ ግዶ።

3 ታን ማቅዶንያ ባደ ነዉ ጌዳዋዳን፥ ኔን ኤፈሶነን ጋምአና ማላ ኮያድ። እት እት አሳቱ ዎርዱዋ ትምርትያ ታማርሲኖ፤ ሄዋንቱ ታማርሰና ማላ፥ አግተ ጋደ ኦዳ። 4 ኡንቱንቱ ቶሳ ኦድያዋነ ባረንቱ ዛርያ ጋይርያዋ አጋናዳን ኦዳ። አያዉ ጎፐ፥ ሄዋ ማላባይ ፓሉማ ካለ፤ ቃይ ጾሳ ቆፋ አማኑዋን ኤረትያዋ ኦክኖ። 5 ሀ አዛዞ ዋና ቆፋይ ጌሻ ዎዛናፐ፥ ሎኦ ሱረ ዎዛናፐ፥ አሳይ በኦ ግያባይ ባይና አማኑዋፐ ቤትያ ሲቁዋ ደንናሳ። 6 እት እት አሳቱ ሀዋ አጊደ፥ ማደና ሃሳያኮ ስሜድኖ። 7 ኡንቱንቱ አያ ሃሳይንቶነ ዎይ ባረንቱን አማነቲደ ኦድያባይ አየንቶ ኤርክኖ፤ ሽን ጾሳ ህግያ ታማርስያዋንታ ግዳናዉ ኮዪኖ።

8 አሳይ በስያዋዳን ህግያን ጎኤቶፐ፥ ህጊ ሎአ ግድያዋ ኑን ኤሬቶ። 9 እትባ አኬካናዉ ኮሼ። ህጊ ሎኦ አሳዉ መትቤና። ሽን ህግያ መንያዋንቶ፥ አዛዘተናዋንቶ፥ ማካላንቻቶ፥ ናጋራንቻቶ፥ ጌሻተይ ባይናዋንቶ፥ ቱናቶ፥ ባረንቱ ዳዮ ዎይ አባ ዎያዋንቶ፥ ሸምፑዋ ዎያዋንቶ፥ 10 ዎሹማናዉ ካጄልያዋንቶ፥ አቱማ አሳይ አቱማ አሳና ዎሹምያዋንቶ፥ አሳ ዛልእያዋንቶ፥ ዎርዳንቻቶነ ዎርዱዋን ጫቂያዋንቶ፥ ዎይ ቱሙ ትምርትያና ጋከተና አይ ኦሱዋ ግድናካ ኦያዋንቶ ከሴዳ። 11 ሄ ቱሞ ትምርቲ አንጀቴዳ ጾሳይ ታን አዋያና ማላ፥ ታዉ ሀዳራ እሜዳ ቦንቾ ዎንጋላ ግዱዋን ደኤ።

12 ታን ኦያ ኪታን ታዉ ዎልቃ እሜዳ ኑ ጎዳ ክርስቶሳ የሱሳ ጋላታይ። ታና ባረ ኦሳንቻ ሱንደ፥ ታና ሄ ኦሶ በስያ አማነቶዋ ጊደ ፓይዴዳ ድራዉካ አ ጋላታይ። 13 ታን ሀዋፐ ካሰ አ ቦርያዋ፥ አ የደርስያዋነ ቱጋይያዋ ግዶፐነ፥ ታዉ ሀዋ እ ኦዳ። ሽን ታን ኤረናን ኦዳ ድራዉነ አማናቤና ድራዉ፥ ጾሳይ ታና ማሬዳ። 14 ቃይ ኑ ጎዳይ ዛዋይ ባይና ባረ አ ኬካተ ታ ቦላን ጉሲደ፥ ክርስቶሳ የሱሳ ባጋና ኑባ ግዴዳ አማኑዋነ ሲቁዋ ታዉ እሜዳ።

15 ክርስቶሳ የሱስ ናጋራንቻቱዋ አሻናዉ ሀ ሳኣ ዬዳ ግያ ሃሳያይ አማነቴዳዋነ አሳይ ኡባይ ቱማ ጊደ አካናዉ በስያዋ። ኡባፐ አያ ናጋራንቻይ ታና። 16 ሽን መና ደኡዋ አካናዉ አን አማናናዉ በስያ አሳዉ ታን ሌምሱዋ ግዳናዳን፥ ኡባፐ አያ ናጋራንቻዉ ታዉ የሱስ ክርስቶሳ ዳሮ ዳንዳያዳን፥ ጾሳይ ታና ማሬዳ። 17 አይፍያን ቤተና መና ጾሳዉ እቶ፥ መና ካተዉ፥ መናፐ መና ጋካናዉ ጋላታይነ ቦንቹ ግዶ። አመንእ!

18 ታ ናኣ ጽሞቶሳ፥ ካሰ ነባ ትምቢትያ ኦዴዳዋዳን፥ ሄ ኦዴዳዋዳን ሎኦ ኦላ ኔን ኦለታና ማላ፥ ሀ አዛዙዋ ነዉ ሀዳራ እማይ። 19 አማኑነ ሎኦ ሱረ ዎዛናይ ነዉ ደኦ። እቱ እቱ ባረንቱ ሱረ ዎዛና የግ አጊደ፥ ላግያዌ ባይና ማርካቢ ባይያዋዳን፥ ባረንቱ አማኑዋ ባይዜድኖ። 20 ጾሳ ቦርያዋ አጋና ማላ፥ ሄዋ ታማራናዉ ታን ሴጻናዉ አ እሜዳ ሄመነዮስነ እስክንድር ኡንቱንቱ ግዶን ደኢኖ።