1 እት እት አሳይ ዉርሰ ዎድያን አማኑዋ አጋናዋ ጌሻ አያናይ ቆንጭያን ኦዴዳ። ኡንቱንቱ ዎርዶ አያናቶ አዛዘታና፤ ቃይ ጻላሀቱዋ ትምርትያ ካላና። 2 ሀዋ ማላ ትምርቲ፥ ትላ ዎዛና ታማን ቦንቄዳ ብራታን ጉዴዳዋዳን ዶንጭሌዳ ዎርዶ አሳቱዋ ባጋና ዬዳ።

3 ሀዋንቱ ማላ አሳቱ አክያዋነ ገልያዋ ቃይ እት እት ቆሞ ካ ምያዋ ድጊኖ። ሽን አማንያዋንቱነ ቱማተ ኤርያዋንቱ ጾሳ ጋላቴዳዋፐ ጉይያን ማና ማላ፥ ጾሳይ ካ መዳ። 4 አያዉ ጎፐ፥ ጾሳይ መዳባይ ኡባባይካ ሎአ። ጾሳ ጋላቲደ አኮፐ፥ ኦለትያዌ አያይነ ባዋ። 5 አያዉ ጎፐ፥ ሄ ኡባባይ ጾሳ ቃላንነ ዎሳን አንጀቴዳዋ።

6 ሄዋ ድራዉ፥ ኔን እሻቱዋ ሄዋ ሀሳይስያዋ ግዶፐ፥ አማኑዋነ ኔን ካሌዳ ሎኦ ትምርትያ ቃላን ኤቆፐ ኔን ክርስቶስ የሱሳዉ ሎኦ ኦሳንቻ ግዳናሳ። 7 ሽን አማንያ አሳዉ ሎኤና ሃሳያፐነ ቃይ ጭማ ማጫ አሳ ቶሳፐ ባቃታ። ቃይ ጾሳ ማላትያዋን ኔና ሎህሳ። 8 አያዉ ጎፐ፥ አሳይ ባረ ቦላ ምንስያዌ ላፋ ጎኤ። ሽን ጾሳ ማላትያዋን ሎህስያዌ ሀእካ ስንፐካ ደኡዋ እማና ግያ ድራዉ፥ ኡባባዉካ ጎኤ። 9 ሀ ሃሳያይ አሳይ ኡባይ አካናዉ በስያ ቱሙ ሃሳያ። 10 ኑን ሄዋ ደማናዉ ዳቡሬቶነ ሎይ ኦቶ፤ ሄዎ ኑን ህዶታ ዎዳዌ አሳ ኡባ፥ ኡባፐ አደ፥ አማንያዋንታ አሽያ ደኡዋ ጾሳ።

11 ሀዋ አዛዛነ ታማርሳ። 12 ኔን ያላጋ ግድያ ድራዉ፥ ኔና ኦንነ ካፖ። ሽን አማንያዋንቶ ነ ሃሳያን፥ ሀኖተን፥ ሲቁዋን፥ አማኑዋንነ ጌሻተን ሌምሱዋ ግዳ። 13 ታን ያና ጋካናዉ አሳዉ ጾሳ ማጻፋ ናባብያዋን፥ ጾሳ ቃላ ኦድያዋንነ ታማርስያዋን ምና። 14 ትምቢትያ ኦድያዋንቱ ሃሳይናነ ጭማቱ ባረንቱ ኩሽያ ነ ቦላ ዎና፥ ኔን አኬዳ፥ ኔናን ደእያ ጌሻ አያና እሙዋ ቶቾፓ።

15 ነ ድቻይ አሳ ኡባዉ ቆንጫና ማላ፥ ሄዋ ምንሳ ቆፓ። ሀዋ ኡባ ዎደ ኦ። 16 ነ ሁጲያነ ነ ትምርትያ ናጋ። ኔን ሄዋ ኦፐ፥ ኔናነ ኔን ግያዋ ስስያዋንታ አሽያ ድራዉ፥ አገናን ኦ።