1 ኦንነ ዎሳ ጎልያ ካለያዋ ግዳናዉ ኮዮፐ፥ ሎኦባ አሞቴዳ ግያ ሃሳያይ ቱማ። 2 ዎሳ ጎልያ ካለያ ኡራይ ቦርሰናዋ፥ እት ማቻት ጻላላይ ደእያዋ፥ ባረና ሞድያዋ፥ ባረና ናግያዋ፥ ባረዉ በስያዋ ኦያዋ፥ እማ ሞክያዋ፥ ታማርሳናዉ ዳንዳይያዋ፥✝ 3 ማተናዋ፥ አሽከተፐ አትን ዋላቀተናዋ፥ ፓሉመተናዋ፥ ሻሉዋ ሲቀናዋ፥ 4 ናናይ አዉ አዛዘትያዋነ ቦንችያዋ፥ ቃይ ባረ ጎልያ አይሳናዉ ዳንዳይያዋ ግዳናዉ በሴ። 5 አያዉ ጎፐ፥ እት ኡራይ ባረ ጎልያ አይሳናዉ ዳንዳየናዋ ግዶፐ፥ ጾሳ አማንያዋንታ ዎት አይሳናዉ ዳንዳዪ?

6 ኦቶሩዋን ሱገቲድ፥ ጻላህያ ካፑ ጾሳ ፕርዳን ኩንዴዳዋዳን ኩንደና ማላ፥ ኦራ አማኔዳ አሳ ግዳናዉ በሰና። 7 ጻላህያ ካፑዋ ቦርያንነ ጲርያን ገለና ማላ፥ ሄ ኡራይ ዎሳ ጎልያፐ ካረና ደእያ አሳን ናሸትያዋ ግዳናዉ በሴ።

8 ሄዋዳን ቃይ ዎሳ ጎልያ ማድያዋንቱ አሳይ ቦንችያዋንታ፥ ላኡ ዶና ሃሳየናዋንታ፥ ዳሮ ዎይንያ ኤሳ ኡሸናዋንታ፥ ሚሻዉ ያረተናዋንታ፥ 9 አማኑዋ ጹራ ጌሻ ዎዛና ቆፋን ናግያዋንታ ግዳናዉ በሴ። 10 ሄዋንቱ ካሰቲደ ፓጨታናዉ ኮሼ። ፓጭያ አዋፐ ጉይያን፥ ዎሳ ጎለን ኦያዋንታ ግዲደ ኦኖ።

11 ሄዋዳንካ ቃይ ኡንቱንቱ ማቻቱ አሳይ ቦንችያዋንታ፥ ዝግረናዋንታ፥ ባረና ሞድያዋንታ፥ ኡባባን አማነትያዋንታ ግዳናዉ በሴ።

12 ዎሳ ጎልያ ማድያዌ እት ማቻት ጻላላይ ደእያዋነ ቃይ ባረ ናናነ ባረ ጎልያ ሎይ አይስያዋ ግዳናዉ በሴ። 13 አያዉ ጎፐ፥ ዎሳ ጎልያ ማድያዋንታ ግዲደ፥ ሎኦ ኦሱዋ ኦያዋንቱ ባረንቱ ሁጰዉ ዎልቃማ ቦንቹዋ ደሚኖ፤ ቃይ ክርስቶሳ የሱሳን ባረንቶ ደእያ አማኑዋ ሎይ ጻሊደ ሃሳያናዉ ዳንዳዪኖ።

14 ታን ኔኮ ኤለካ ባና ጋደ ሀዋ ነዉ ጻፋይ። 15 ሽን ታን ቤናን ጋምኦፐ፥ ጾሳ ጎለን ኔን ዎታ ደአናዉ በስንቶ ኤራና ማላ ጻፋይ። ሄ ጎሊ ቱማተዉ ቱሳነ ባሶ ግድያ ደኡዋ ጾሳ ዎሳ ጎልያ። 16 ኑ አማኑዋ ጹራይ ዎልቃማ ግድያዋ ኦንነ ስናዉ ዳንዳየና።

ክርስቶስ አሹዋን ቆንጬዳ፤

እ ጽሉዋ ግድያዋ ጌሻ አያናይ ማርካቴዳ።

ኪታንቻቱካ አ በኤድኖ፤

አይሁዳ ግደና አሳይ አባ ኦድና ስሴዳ።

ሳኣን ደእያ አሳይ አ አማኔዳ፤

ቦንቹዋን እ ሳሉዋ ቤዳ።