አምኤቱዋ ዞሬዳ ዞርያ
1 ጭማ አሳ ነ አባ ቦንችያዋዳን ቦንቻፐ አትን፥ ቶቾፓ። ያላጋቱዋ ነ እሻዳን፥ 2 ቃይ ጭማ ማጫ አሳ ነ አቲዳን፥ ያላጋ ማጫ አሳ ነ ምቻቲዳን፥ ኩመን ጌሻተን ቦንቻ።
3 ባረ ጻላላ ግዴዳ ቱሙ አምኤቱዋ ቦንቻ። 4 ሽን አምአትዉ ናናይ ዎይ ናና ናናይ ደኦፐ፥ ሄ ናናይ ጾሳ ማላትያዋ ባረንቱ ሶይ አሳ በስያዋንነ ቃይ ሄዋ ኦያዋን ባረንታ የሌዳዋንቱ ኩሽያ ዛርያዋ ታማርኖ። አያዉ ጎፐ፥ ሄዌ ጾሳ ናሸችያዋ።
5 አያ ማዱካ ባይና ባረ ደእያ ቱሙ አምአታ ጾሳይ እማና ጋደ ናሸቻን ናጋ ኡታዱ። ቃይ ጋላስነ ቃማ ጾሳይ እዞ ማዳና ማላ፥ ዎሳዉነ ኦቻዉ። 6 ሽን ባረና እሻልስያ አምአታ ፓጻ ደኦፐካ፥ እዛ ሀይቃድጋዱ። 7 ቃይ ኦንነ ኡንቱንታ ቦረና ማላ፥ ሀ አዛዙዋ እማ። 8 ሽን ባረንቱዎ ቃይ ኡባፐ አደ፥ ባረ ሶይ አሳዉ ቆፐና ኡራይ ኦናነ ግዶፐ፥ ሄዌ ባረ አማኑዋ ካዴዳዋ። አማነና አሳፐካ አደ አዉ ኢታ።
9 ኡሱፑን ታሙ ላይይ ኩምቤና አምአት ሱን ማዝጎብያን ጻፎፓ። ሄዋ ቦላን ቃይ እዛ እት አስናፐ ሀራ ገላቤናዉኖ ግዳናዉ ኮሼ። 10 ናና ድችያዋን፥ እማ ሞክያዋን፥ ጌሻቱዋ ገድያ ሜጭያዋን፥ ዋየቴዳ አሳ ማድያዋን፥ ሎኦ ኦሱዋ ኡባ ካልያዋን፥ ሀ ሎኦ ኪታ ኪተትያዋን ኤረቴዳዉኖ ግዳናዉ በሴ።
11 ሽን ያላጋ አምኤቱዋ የኮንቱ ሱንና ጋ ጻፎፓ። አያዉ ጎፐ፥ ኡንቱንቱ ባረንታ፥ አስና ገላ ገላ ግያ ዎደ፥ ክርስቶሳ አጋናዋንታ። 12 ኮይሮ አማኑዋ ካዳ ድራዉ፥ ኡንቱንቱ ፕርደታና። 13 ሄዌ ባይናን ኦሱዋ ዪደ እት ጎልያፐ ሀራ ጎልያ ዩዪደ፥ ሀመትያዋ ሳላላ ግደናን፥ ባረንቶ በሰናባ ሃሳዪደ፥ ዝግርሳነ የዉዋን ጮ ገልያዋ ታማሪኖ። 14 ሄዋ ድራዉ፥ ኑ ሞርከቱ ኑ ቦላ ሃሳይያ ኢታባ ደመና ማላ፥ ያላጋ አምአቱ አስና ገሊደ፥ ናኣ የሊደ፥ ባረንቱ ጎልያ አይሳና ማላ ዞራይ። 15 አያዉ ጎፐ፥ ሀዋፐ ካሰ አማሬዳ አምአቱ ሴጻና ካላናዉ አጊደ ጉየ ስሜድኖ።
16 አማንያ ምሽራትዉ ሀቃንካ ዳቦ አምአቱ ደኦፐ፥ እዛ ኡንቱንታ ማዳናዉ በሴ። አማንያ አሳቱ ማዱ በስያ ቱሙ አምኤቱዋ ማዳና ማላ፥ ኡንቱንቱ አማንያዋንቶ ቶኮ ግዶፕኖ።
17 ሎይ ሄምያ ጭማቱ፥ ቃይ ኡባፐ አደ፥ ቃላ ኦድያዋንነ ታማርስያዋን ዳቡርያዋንቱ፥ ዳኮ ቦንቹዋ አካናዉ በሲኖ። 18 አያዉ ጎፐ፥ ጾሳ ማጻፋይ፥ "ኡዱማን ካ የያ ቦራ ዶና ቃቾፓ" ቃይ፥ "ኦሳንቻይ ባረ ድርጉዋ አካናዉ በሴ" ያጌ።5:18 ዛረ. 25:4፤ ማቶሳ 10:10፤ ሉቃሳ 10:7
19 ላኡ ዎይ ሄዙ ማርካይ ባይናን፥ ዎሳ ጎልያ ጭማ ሞትያዋ ስሶፓ።5:19 ዛረ. 17:6፤ 19:15 20 ሀራቱ ያያና ማላ፥ ናጋራ ኦያ ኡባቱዋ አሳ ኡባ ስንን ሴራ።
21 ኔን አይነ አሳ ዴሙዋ ጼለናን፥ እቱዋ እቱዋፐ ዱማየናን ሀ አዛዙዋ ናጋና ማላ፥ ጾሳንነ የሱስ ክርስቶሳን ዶረቴዳ ኪታንቻቱዋ ስንን ኔና ታን ዞራይ። 22 ኦ ቦላንነ ኤሌላደ ነ ኩሽያ ዎፓ። ሀራቱዋ ናጋራን ገሎፓ። ኔና ጌሻተን ናጋ።
23 ኔን ኡባ ዎደ ሳከትያ ድራዉነ ነ ኡሉዋ ድራዉ፥ ጉ ዎይንያ ኤሳ ኡሻፐ አትን፥ ሃ ጻላላ ኡሾፓ።
24 እት እት አሳቱዋ ናጋራይ በአናዉ ቆንጨ፤ ኡንቱንቱ ናጋራይ ኡንቱንታ ፕርዳናዉ ኡንቱንቱፐ ስንዉ አ። ሽን ሀራቱ ናጋራይ ጉየፐ ቆንጬ። 25 ሄዋዳንካ፥ ሎኦ ኦሱካ ቆንጬ። ቆንጭቤናባ ግዶፐነ፥ ጌማናዉ ዳንዳየና።