1 Timóteo 6

አይለቶ እመቴዳ ዞርያ

1 ጾሳ ሱንይነ ኑ ትምርቲ ቦረተና ማላ፥ አይለተ ሞርገ ም ግዶን ደእያዋንቱ ባረና ሞድያ ጎዳቶ ቦንቹ በስያዋ ኤርኖ። 2 አማንያ አሳ አይልያ ግዴዳዋንቶ ኡንቱንቱ ጎዳቱ ኡንቱንቶ እሻ ግድያ ድራዉ፥ ኡንቱንታ ካፕኖ። ሽን ባረንቱ ኪታን ጎኤትያዋንቱ ኡንቱንቱ ሲቅያ አማንያዋንታ ግድያ ድራዉ፥ ኡንቱንቱ ካሰዋፐ አደ ኦናዉ በሴ።

ዎርዶ ትምርትያነ ቱሙ ዱረተ

ኔን ሀ የዋቱዋ ታማርሳናዉነ ኦዳናዉ በሴ። 3,4 ኦንነ ዱማ ትምርትያ ታማርስያዋ ግዶፐ፥ ቃይ ኑ ጎዳ የሱስ ክርስቶሳ ቱሙ ቃላናነ ኑ አማኑዋ ትምርትያና ጋከተና ኡራይ ዳሮ ኦቶረቴ፤ አይነ ኤረና። ቃይ ቃላ ቦላን ፓሉመታናዉነ ዋላቀታናዉ ኡንቱንቶ ጊገና ቆፋይ ደኤ። ሄዌ ቃናትያ፥ ፓሉማ፥ ቦርያ፥ ኢታ ስያ ካለ። 5 ቃይ ኡንቱንቱ ሁጲ ኦና። ቱማተይ ባይና አሳቱዋናካ ፓሉማ ካለ። ኡንቱንቱ ጾሳ ማላትያዋን ዱረታና ጊደ ቆፒኖ። ኔን ሄ አሳቱዋፐ ሻከታ።

6 ሽን ታዉ ደእያባይ ታዉ ግዳና ግያ ኡራ ጾሳ ማላትያዌ ዱረዬ። 7 አያዉ ጎፐ፥ ኑን ሀ አላምያ አይነ አህበይኮ፤ ቃይ አፐ አይነ አፎኮ። 8 ሽን ምያባይነ ማይያባይ ደኦፐ፥ ሄዌ ኑዉ ግዳናዋ። 9 ሽን ዱረታናዉ ኮይያዋንቱ ፓጭያንነ ጲርያን ገሊኖ፤ ቃይ ዳሮ አሳ ባሻዉነ ዮ ጎች አፍያ ዳሮ ኤያነ ቆህያ አሙዋን ኩንዲኖ። 10 አያዉ ጎፐ፥ ሻሉዋ ሲቅያዌ ኢታተ ኡባዉ ፑልቱዋ። እቱ እቱ ሄዋ አሞቲደ፥ አማኑዋፐ ባለቲደ፥ ዳሮ መቱዋን ባረንታ ቆሄድኖ።

ጳዉሎስ ጽሞቶሳ ዞሬዳ ዞርያነ አዛዜዳ አዛዙዋ

11 ሽን ኔኖ፥ ጾሳ አሳዉ፥ ሄዋፐ ባቃታ። ጽሎተ፥ ጾሳ ማላትያዋ፥ አማኑዋ፥ ሲቁዋ፥ ዳንዳያነ አሽከተ ካላ። 12 አማኑዋ ባጽያ ሎይ ባጸታ። ዳሮ አሳ ስንን ሎኦ ማርካ ማርካታደ፥ ኔና ጾሳይ ጼሴዳ መና ደኡዋ ኦይቃ። 13 ኡባባዉ ደኡዋ እምያ ጾሳ ስንንነ፥ ቃይ ጰንጼናውያ ጵላጾሳ ጌተትያ ጋድያ ሞድያዋ ስንን ሎኦ ማርካ ማርካቴዳ ክርስቶስ የሱሳ ስንን ታን ኔና ሀዋ አዛዛይ።✝6:13 ዮሃ. 18:37 14 ኑ ጎዳ የሱስ ክርስቶስ ቆንጫና ጋካናዉ፥ ቅታይ ባይናንነ ቦሪ ባይናን ሄ አዛዙዋ ናጋ። 15 አ ቆንጨ፥ እት ሱንይ ደእያ አንጀቴዳ ጾሳይ፥ ካታቱዋ ካቲ፥ ጎዳቱዋ ጎዳይ፥ ባረ በስያ ዎድያን በሳና። 16 ሀይቀናዌ እት አ ጻላላ። ኦንነ አኮ ሺቃናዉ ዳንዳየና ፖኡዋን ደኤ። ኦንነ አ በእቤና፤ ቃይ በአናዉካ ዳንዳየና። ቦንቹነ መና ዎልቃይ አዉ ግዶ። አመንእ።

17 ሀእ ሀ ዎድያን ዱረ ግድያዋንቱ ኦቶረተናዳንነ ቃይ ኑን ናሸታናዳን፥ ኡባባ ፓላህሲደ ኑዉ እምያ ደኡዋ ጾሳን አማነታናዋፐ አትን፥ አያ ዱረተን ኡንቱንቱ አማነተናዳን፥ ኡንቱንታ አዛዛ። 18 ኡንቱንቱ ሎኦባ ኦናዳን፥ ሎኦ ኪታን ዱረታናዳን፥ ኬክያዋንታነ ሀራቱዋና ሻክ አክያዋንታ ግዳናዳን አዛዛ። 19 ሄዋ ያትያዋን ኡንቱንቱ ስንዉ ባረንቶ ምኖ ባሶ ግድያ ሻሉዋ ባረንቶ ሺሽኖ። ሄዋፐ ጉይያን፥ ኡንቱንቱ ቱሙ ደኡዋ አካና።

20 ጽሞቶሳ፥ እት እት አሳይ ባላን ኤራተ ግያ ኤያ ፓሉምያፐነ መላ ሃሳያፐ ባቃታደ፥ ነዉ እመቴዳ ሀዳራ ናጋ። 21 አያዉ ጎፐ፥ እቱ እቱ ኑዉ ኤራተይ ደኤ ያጊደ፥ አማኑዋ ባሌድኖ።

ጾሳ አ ኬካተይ ህንተናና ኡባና ግዶ።