ጎዳ ዩሳ ጊጊደ ናግተ
1 ሽን ኑናዳን ጾሳ ካልያዋንቶ፥ ሀ የዋቱ አዉደ ሀናነንቶ፥ ዎድያነ አገና ህንተንቶ ጻፋናዉ ኮሸና። 2 አያዉ ጎፐ፥ ጎዳ ጋላሳይ ካይሱ ቃማ ይያዋዳን ያናዋ ህንተንቱ ሎይ ኤሪታ። 3 አሳይ፥ "ኡባባይ ሳራ፤ አያይካ ሀነና" ጊሽን፥ ማጫ አሳ የሉ ኦይቂያዋዳን፥ ባሻይ ኡንቱንቱ ቆፐናን ኡንቱንቱ ቦላ ያና። ኡንቱንቱ ሙለካ ከስ አክክኖ።
4 ሽን ኑናዳን ጾሳ ካልያዋንቶ፥ ሄ ጋላሳይ ህንተንቶ ካይሱ ይያዋዳን ያናዉ ህንተንቱ ማን ደእክታ። 5 ህንተ ኡባይ ፖኡዋ አሳነ ጋላሳ አሳ፤ ኑን ቃማ አሳ ዎይ ማ አሳ ግዶኮ። 6 ሄዋ ድራዉ፥ ኑን ሀራቱ ገምእሽያዋዳን ገምእሻናዉ በሰና። ኑን ቤጎታናዉነ ዎጋን ደአናዉ በሴ። 7 አያዉ ጎፐ፥ ገምእሽያዋንቱ ቃማ ገምእሺኖ፤ ማትያዋንቱካ ቃማ ማቲኖ። 8 ሽን ኑን ጋላሳ አሳ ግድያዋንቱ ዎጋን ደአናዉ በሴ። ኑን አማኑዋነ ሲቁዋ ትራን ዎያ ኦላ ሚሻዳን ኦይቂደ፥ ኑን ህዶታን ናግያ አቶተ፥ ብራታ ቆብያዳን፥ ሁጲያን ዎናዉ በሴ።5:8 ኢሳ. 59:17፤ ኤፈ. 6:13-17 9 አያዉ ጎፐ፥ ጾሳይ ኑና ኑ ጎዳ የሱስ ክርስቶሳ ባጋና አቶተ ደማናዉ ዶሬዳዋፐ አትን፥ አ ሀንቁዋ አካናዉ ዶርቤና። 10 ኑን ፓጻ ግድና ዎይ ሀይቄዳዋንታ ግድና፥ ክርስቶሳና እትፐ ደአና ማላ፥ ክርስቶስ ኑ ድራዉ ሀይቄዳ። 11 ሄዋ ድራዉ፥ ህንተንቱ ቃይ ሀእ ኦያዋዳን፥ ሀራቱዋ መንተነ እቱ እቱዋ ድችተ።
ዉርሰ ዞርያነ ሳሮታ
12 ኑናዳን ጾሳ ካልያዋንቶ፥ ህንተንቱ ግዶን ኦያዋንታ፥ ህንተና አማኑዋ ኦግያን ካለያዋንታነ ዞርያዋንታ፥ ህንተንቱ ቦንቻና ማላ፥ ህንተና ዎሴቶ። 13 ኡንቱንቱ ኦያ ኦሱዋ ድራዉ፥ ኡንቱንታ ሎይ ቦንችተነ ሲቅተ። እቱ እቱዋና ሳሮተን ደእተ።
14 ኑናዳን ጾሳ ካልያዋንቶ፥ ኑን ህንተና ዞሬቶ፤ ማራይ ባይና ደኡዋ ደእያዋንታ ሴርተ። ያይያዋንታ መንተ። ዎልቂ ባይናዋንታ ማድተ። አሳ ኡባ ዳንዳይተ። 15 ኦንነ ኢታ ድራዉ ኢታ ዛረና ማላ ናገትተ፤ ሽን ኡባ ዎደ፥ እቱ እቶነ ቃይ አሳ ኡባዉ ሎኦባ ኦናዉ ምንተ።
16 ኡባ ዎደ ናሸትተ። 17 ኡባ ዎደ ቃንጸናን ጾሳ ዎስተ። 18 ኡባባን ጋላትተ። አያዉ ጎፐ፥ ክርስቶሳ የሱሳ ባጋና ጾሳይ ህንተፐ ኮይያዌ ሄዋ።
19 ጌሻ አያና ታማ ቶይሶፕተ። 20 ትምቢትያ ቃላ ካፕተ። 21 ኡባባካ ፓጭተ። ሎኦባ ኦይቂተ። 22 ኢታ ኦሱዋ ኡባፐ ሃክተ።
23 ሳሮተ ጾሳይ ባረ ሁጰዉ ህንተና ኡባባን ፖሎ ጌሾ፤ ቃይ ኑ ጎዳይ የሱስ ክርስቶስ ይያ ዎደ፥ ጾሳይ ህንተንቱ አያና፥ ሸምፑዋነ አሳተ እትፐ ቦረተናዋነ ፖሎ ኦደ ናጎ። 24 ህንተና ጼስያዌ አማነቴዳዋ፤ ቃይ ሄዋ እ ፖላና።
25 ኑናዳን ጾሳ ካልያዋንቶ፥ ኑዉ ጾሳ ዎስተ።
26 እሻቱዋ ኡባ ጌሻ የሩዋ የሪደ ሳሮትተ።
27 ህንተ ሀ ዳብዳቢያ ጌሻ እሻቱዋ ኡባዉ ናባባናዳን፥ ጎዳ ሱንን ህንተና ዎሳይ።
28 ኑ ጎዳ የሱስ ክርስቶሳ አ ኬካተይ ህንተናና እትፐ ግዶ።