1 ታን ጳዉሎስ፥ ጾሳይ እማና ጌዳ ክርስቶስ የሱሳና ኑዉ ደእያ ደኡዋባ ኦዳናዉ፥ ጾሳይ ጌዳዋዳን፥ ክርስቶስ የሱስ ኪቴዳዌ፥ 2 ታ ሲቆ ናኣ ጽሞቶሳዉ ሀ ዳብዳቢያ ጻፋይ።

ጾሳ አዉዋፐነ ኑ ጎዳ ክርስቶስ የሱሳፐ፥ አ ኬካተይ፥ ማሮተይነ ሳሮተይ ነዉ ግዶ።

3 ታ ዛራቱ ኦዳዋዳን፥ ታንካ ታና ዞርያ ጌሻ ዎዛናፐ ኦያ ጾሳ ቃማነ ጋላስ ዎስያ ዎሳን ኡባ ዎደ ኔና ሀሳይያ ድራዉ፥ አ ጋላታይ። 4 ታን ነ አፎ ሀሳያ ሀሳያደ ናሸታና ማላ፥ ኔና በአናዉ ዳሮ ላሞታይ።

5 ኔናን ደእያ ዎርዶ ባይና አማኑዋ ሀሳያይ። ሄ አማኑ በን ነ ዳይ ዳይ ሎይድንነ ነ ዳይ ኤዉኒቅን ደእያ አማኑዋ ማላ፤ ቃይ ኔናንካ ሄዌ ደእያዋ ኤራድ። 6 ሄዋ ድራዉ፥ ታን ታ ኩሽያ ላኡዋ ነ ቦላ ዎዳ ዎደ፥*1:6 ታን ታ ኩሽያ ላኡዋ ነ ቦላ ዎዳ ዎደ፦ ሀዌ በስያዌ፥ አማንያ አሳ ካለናዳን ጌሻ አያናይ ኦሶ ዶርና ቱማተን ካለያዋንቱ ቃላ ኦዳናዉ ዎይ ታማርሳናዉ ጾሳይ ኦኬዳዋንቱ ቦላን ባረንቱ ኩሽያ ዎደ ዎስያዋ በሴ። 1 ጽም። 1:4 ጼልተ። ጾሳይ ነዉ እሜዳ እሙዋ ኔን ዶሽሰና ማላ፥ ኔና ሀሳይሳይ። 7 አያዉ ጎፐ፥ ጾሳይ ኑዉ ዎልቃ፥ ሲቁዋነ ኑ ሁጲያ ናግያዋ እምያ ጌሻ አያና እሜዳፐ አትን፥ ያሻ አያና እምቤና።

8 ስም፥ ኑ ጎዳዉ ማርካትያዋን ዎይ አ ድራዉ ቃሹዋን ደእያ ታዋንካ ዬላቶፓ። ሽን ጾሳይ ነዉ እምያ ዎልቃ ኬናን ታናና ምሽራቹዋ ቃላዉ ዋየታ። 9 ጾሳይ ባረ ቆፋንነ ባረ አ ኬካተን ኑና አሺደ፥ ባረ አሳ ኦናዉ ጼሶዋፐ አትን፥ ኑን ኦዳ ኦሱዋ ድራዉ ግደና። እ ሀ አ ኬካተ ክርስቶስ የሱሳ ባጋና ዎዲ ዶመታናፐ ካሰ ኑዉ እሜዳ። 10 ሽን ሀእ ሀ አ ኬካተይ ኑና አሽያ ክርስቶስ የሱሳ ዩሳን ኑዉ ቆንጬዳ። ቃይ ሀይቁዋ ዎልቃካ እ ይሴዳ። ዎንጋላ ምሽራቹዋ ባጋና ባየና ደኡዋ ኑዉ ቆንጭሴዳ።

11 ታን የሱስ ኪቴዳዋነ አይሁዳ ግደና አሳ ታማርስያዋ ግዳደ፥ ዎንጋላ ምሽራቹዋ ኦዳና ማላ፥ ጾሳይ ታና ዶሬዳ። 12 ቃይ ታን ሀ መቱዋ አክያዌ ሄዋ ድራሳ። ሽን ታን አማኔዳዋ ኤርያ ድራዉ፥ ዬላትከ። ቃይ እ ታዉ እሜዳ ሀዳራ ሄ ጋላሳይ ጋካናዉ፥ እ ናጋናዉ ዳንዳይያዋ ኤራይ።

13 ታን ኔና ታማርሴዳ ቱሙ ቃላ ሌምሱዋ ኡዳ ኦይቃደ፥ ክርስቶስ የሱሳን ኑዉ ደእያ አማኑዋንነ ሲቁዋን ደአ። 14 ኑ ግዶን ደእያ ጌሻ አያና ባጋና ነዉ ሀዳራ እሜዳ ሎኦባ ናጋ።

15 ኢስያ ግያ ቢታን ደእያ ኡባቱ ታፐ ባቃቴዳዋ ኤራሳ፤ ኡንቱንቱ ግዶን ፕገሉስነ ሄርሞገኔስ ደኢኖ።

16 ሄነስፎሩ ታና ዳሮ ዎደ መንዳ ድራዉ፥ ጎዳይ አ ሶይ አሳዉ ማሮተ እሞ። ቃይ ታን ቃሾ ጎለን ደእያዋ እ ዬላትቤና። 17 ሽን ሮመ ግያ ካታማ ጋኬዳሳና ታና ሎይ ኮዪደ ደሜዳ። 18 ሄ ጋላስ ጎዳፐ ማሮተ ደማናዳን፥ ጎዳይ አዉ እሞ። ቃይ ኤፈሶና ግያ ካታማን እ ታና አይ ኬና ማዴደንቶነ ኔን ሎይ ኤራሳ።