1 ሽን ዉርሰ ጋላስ ዋይስያ ዎዲ ያናዋ አኬካ። 2 አያዉ ጎፐ፥ አሳይ ባረና ሲቅያዋንታ፥ ሻሉዋ ሲቅያዋንታ፥ ጬቀትያዋንታ፥ አይያዋንታ፥ ቦርያዋንታ፥ ባረና የሌዳዋንቶ አዛዘተናዋንታ፥ ጋላተናዋንታ፥ ጌሻተይ ባይናዋንታ፥ 3 ሲቁ ባይናዋንታ፥ ስገተናዋንታ፥ ዝግርሳንቻቱዋ፥ ባረና ናገናዋንታ፥ ኬከናዋንታ፥ ሎኦባ ዶሰናዋንታ፥ 4 ኡባ ኤርከ ግያዋንታ፥ ድርቢያዋንታ፥ ኦቶሩዋን ሱገትያዋንታ፥ ቃይ ጾሳፐ አደ፥ እሻሉዋ ዶስያዋንታ ግዳና። 5 ኡንቱንቱ ጾሳዉ ጎይንያዋ ማላቲኖ፤ ሽን አ ዎልቃ ካዴድኖ። ሄዋንቱ ማላ አሳቱዋኮ ሺቆፓ።

6,7 አያዉ ጎፐ፥ ኡንቱንቱፐ እቱ እቱ አሳ ጎልያ ገሊደ፥ ናጋራይ ዴጼዳዋንታ፥ ዱማ ዱማ አሙዋን ሱገትያዋንታ፥ ኡባ ዎደ ታማሪደ፥ ቱማተ ኤራ አካናዉ ሙለ ዳንዳይቤና ዳቡራንቻ ማጫዋንታ ባለኖ። 8 ያኔስነ ያምባሬስ* ሙሴ የዉዋ ጳልቆዋዳን፥ ሄዋዳን ቃይ ሀዋንቱ፥ ሱረ ቆፋይ ባይናዋንታ አማኑዋን ኩንዴዳዋንቱ፥ ቱማተባ ጳልቂኖ።✝ 9 ሽን ያኔሳ ኤያተይነ ያምባሬሳ ኤያተይ ቃይ ቆንጬዳዋዳን፥ ኡንቱንቱ ኤያተይካ አሳ ኡባዉ ቆንጫና ድራዉ፥ ኡንቱንቱ ካሰዋፐ አደ ድጭክኖ።

10 ሽን ኔን ታ ትምርትያ፥ ታ ሀኖታነ ታ ቆፋ፥ ታ አማኑዋነ ታ ዳንዳያ፥ ታ ሲቁዋነ ታ ገንጩዋ፥ 11 ታ የደሳነ ታ ዋይያ በኣዳ። አንጾክያነ፥ እቆንዮነነ ልስጽራ ግያ ካታማቱዋን ታና ጋኬዳባነ ታን ዳንዳዬዳ የደሳ ኤራሳ። ጎዳይ ታና ሄ ኡባፐ አሼዳ። 12 ቱማተን ክርስቶስ የሱሳን ጾሳ ማላቲደ ደአናዉ ዶስያ ኡባይ የደርሰታና። 13 ሽን ኢታ አሳቱነ ባለያዋንቱ ሀራቱዋ ባለደነ ባረንቱ ሁጰዉ ባሊደ፥ ካሰፐ ኢት ኢት ቢኖ።

14 ሽን ኔን ሄ ቱማተ ኦፐ ታማሬደንቶነ ኤራደ፥ ኔን ታማሬዳዋንነ ኤሬዳዋን ምናደ ደአ። 15 ኔን ጉ ናአተፐ ዶማደ ክርስቶስ የሱሳ አማናደ፥ አቶተይ ቤትያ አዳ ኤራ እማናዉ ዳንዳይያ ጌሻ ማጻፋቱዋ ኤራዳ። 16,17 ጾሳ ማጻፋ ኡባን ጾሳ አያናይ ደኤ። ቃይ ሄ ማጻፋቱ ጾሳዉ ኦያ አሳይ ኩመንነ ሎኦ ኦሱዋ ኡባዉ ጊጌዳዋ ግዳና ማላ፥ ቱማተ ታማርሳናዉ፥ ባላ ሴራናዉ፥ ባይዙዋ ሱርሳናዉነ ጽሎተ ደኦ ዞርያ እማናዉ ማዲኖ።