1 ስም ታ ናአዉ፥ ክርስቶስ የሱሳን ደእያ አ ኬካተን ምና። 2 ቃይ ዳሮ ማርካቱ ደእያ ሳን ታፐ ኔን ስሴዳ የዋቱዋ ሀራቱዋ ታማርሳናዉ ዳንዳይያ አማነቴዳ አሳቶ ሀዳራ እማ።

3 ክርስቶሳ የሱሳዉ አማነቴዳ ዎታዳራዳን፥ ታናና ዋየታ። 4 ኦላ ብያ ዎታዳራይ ባረ ካፑዋ ናሸቻናዉ፥ ዎታዳራ ግደና አሳይ ኦያ ኪታን ዋላከተና። 5 ቃይ ዎን ኬሰትያ ኡራይካ ዎጋዳን ዎጻና ዮፐ፥ ዎይታ አከና። 6 ዳሮ ዳቡሪደ ኦዳ ቢታ ጎሽያ ብታኒ ሺቄዳ ካፐ ባረና ጋክያዋ ኮይሮ አካናዉ በሴ። 7 ኔን ኡባባ አኬካናዳን፥ ጎዳይ ኔና ዳንዳይሳና ድራዉ፥ ታን ግያዋ ቆፓ።

8 ታን ዎንጋላ ምሽራቹዋ ኦድያዋዳን፥ ሀይቁዋፐ ደንዴዳ ዳዊተ ዛርያ የሱስ ክርስቶሳ ቆፓ። 9 ታን ዎንጋላ ምሽራቹዋ ኦድያ ድራዉ፥ ኢታባ ኦዳዋዳን፥ ሀራይ አቶ ቃሸታና ጋካናዉ ዋየታይ። ሽን ጾሳ ቃላይ ቃሸተና። 10 ሄዋ ድራዉ፥ ታን ጾሳይ ዶሬዳ አሳቱካ ክርስቶስ የሱሳን ደእያ አቶተ መና ቦንቹዋና ደማናዳን፥ ኡንቱንቱ ድራዉ፥ ታን ኡባባን ዋየታይ።

11 ሀዌ፥

"ኑን አናና እትፐ ሀይቄዳዋ ግዶፐ፥

አናና እትፐ ደአና።

12 ኑን ገንጮፐ፥

አናና እትፐ ካተታና።

ኑን አ ካዶፐ፥

እካ ኑና ካዳና።

13 ኑን አማነተናን አጎፐካ፥

እ አማነትያዋ ግዲደ ደአናዋ።

አያዉ ጎፐ፥ እ ባረና ባረ ሁጰዉ

ኤርከ ጋናዉ ዳንዳየና"

ግያዌ ቱሙ ሃሳያ።

14 ኔን ነ አሳ ሀዋ ሀሳይሳ፤ ኡንቱንቱ ቃላን ፓሉመተና ማላ፥ ጾሳ ስንን ዞራ። ሄዌ ስስያ አሳ ባይዝያዋፐ አትን፥ አይነ ጎኤና። 15 ኔን ጾሳ ቱማተ ቃላ ሱረተን ኦድያዋነ ቃይ አ ኦሶ ዬላተና ኦሳንቻ ግዳደ፥ ጾሳይ ሳቢያ አሳዳን፥ ነ ሁጲያ ጾሳዉ እማናዉ ምና። 16 ሽን ሀ ሳአዉ እንጀትያ ማደና ሃሳያፐ ኔና ናጋ። አያዉ ጎፐ፥ ሄዌ ጾሳፐ አሳ ሃሴ። 17 ቃይ ኡንቱንቱ ታማርስያዌ ቦላ ጭቱዋዳን ኡባሳ ጋካናሳ። ሄ ታማርስያዋንቱፐ ላአቱ ሄመነዮሳነ ፕሊጾሳ። 18 ኡንቱንቱ ቱሙዋ ኦግያ አጊደ፥ "ሀይቁዋፐ ደንድያዌ ካሰ አድጌዳ" ያጊደ አማሬዳ አማንያ አሳቱዋ አማኑዋ ባይዚኖ።

19 ግዶፐካ፥ ጾሳይ ኤሴዳ ምኖ ቱሳይ ቃጻና ዳንዳየና። ቃይ አ ቦላን፥ "ጎዳይ ባረዋንታ ኤሬ"፤ ቃይ "ጎዳዋ ግድያ ኦንነ ኢታ ኦሱዋ አጎ" ያግያ ቃላቱ ጻፈቴድኖ።✝

20 እት ዎልቃማ ጎለን ዎርቃፐነ ብራፐ መቴዳ ሚሻ ጻላላ ግደናን፥ ምፐነ ኡርቃፐ መቴዳ ሚሻቱካ ደኢኖ። ሄዋንቱፐ ባጋቱ ቦንቾ ኦሱዋ ኡንቱንቱን ኦናዉ፥ ቃይ ባጋቱ ቶሸትያባ ኡንቱንቱን ኦናዉ መቴድኖ። 21 ሄዋ ድራዉ፥ ኦንነ ሀ ኢታባ ኡባፐ ባረና ጌሾፐ፥ እ ባረ ጎዳ ጎእያ ኦሱዋ ኦናዉ ባረና እሜዳ ድራዉ፥ ቦንቾ ኦሱዋ ኦያ ሚሻ ግዳናዋ። ቃይ ሎኦ ኦሱዋ ኡባ ኦናዉ ጊገቴዳዋ ግዳናዋ።

22 ሽን ኔን ኢታ ዎዳላተ አሙዋፐ ባቃታ። ባረንታ ማዳናዉ ጌሻ ዎዛናፐ ጎዳ ጼስስያዋንቱና እትፐ፥ ጽሎተ፥ አማኑዋ፥ ሲቆተነ ሳሮተ ምንሳደ ካላ።

23 ሽን ኤያቱዋ ፓሉሚነ አይነ ኤረናዋንቱ ፓሉሚ ዋላሳ ካለያዋ ኤራደ አፐ ባቃታ። 24 ጎዳ ቆማይ ኡባዉ ኬክያዋ፥ ሎይ ታማርስያዋነ ዳንዳያንቻ ግዳናዉ በሴፐ አትን፥ ዋላቀታናዉ በሰና። 25 ቃይ እ ባረና እጽያዋንታ አሽከተን ሴርያዋ ግዳናዉ በሴ። ኡንቱንቱ ባረንቱ ናጋራፐ ስሚደ፥ ቱማተ ኤራናዳን ጾሳይ ኦነንቶ፥ ኦን ኤር። 26 ቃይ ኡንቱንቱ ባረንቱ ዎዛና ቆፋዉ ስሚደ፥ ኡንቱንታ ባረ ኮዬዳባዉ አዛዘታና ማላ ኦይቄዳ ጻላህያ ካፑዋ ዳባፐ ከስ አካና።