ኪቴዳዋንቱ ኦሱዋ 18

ጳዉሎስ ቆሮንቶሳ ቤዳ

1 ሄዋፐ ጉይያን፥ ጳዉሎስ አቴናፐ ከሲደ፥ ቆሮንቶሳ ቤዳ። 2 ሄዋን አቂላ ግያ እት አይሁዳ ብታንያ ደሜዳ፤ አቂላይ ጳንጾሳን የለቴዳ፤ አይሁዳ አሳይ ኡባይ ሮመፐ ከሳና ማላ፥ ቃላዉደዮስ አዛዜዳ ድራዉ፥ አማሬዳ ዎድያፐ ካሰ፥ እ ባረ ማቻት ጵርስቂላና ጻልያፐ ዬዳ፤ ጳዉሎስ ኡንቱንቱና ጋከታናዉ ቤዳ። 3 አ ኦሱነ ኡንቱንቱ ኦሱ እት ማላ ዱንካንያ ስካ ግድያ ድራዉ፥ ኡንቱንቱና ኡቲደ፥ እትፐ ኦዳ። 4 ጳዉሎስ ሳምባታ ኡባን አይሁዳቱዋና ግሪካቱዋ አማንናዉ አይሁዳ ዎሳ ጎልያን ፓሉመቴ።

5 ስላሰነ ጽሞቶሰ ማቅዶንያፐ ዬዳ ዎደ፥ ጳዉሎስ አይሁዳቶ የሱስ ባረ ሁጰዉ ክርስቶሳ ግዴዳዎ ቃላ ኦዱዋ ቶሌዳ። 6 ሽን ኡንቱንቱ ጳዉሎሳ ሃሳያ ጳልቂናነ አ ቦርና፥ ጳዉሎስ ባረ ማዩዋፐ ባና ቆቆፊደ፥*18:6 ማዩዋፐ ባና ቆቆፊደ፦ ሀዋ ጉሳይ ገድያፐ ባና ቆቆፍያዋና እታ። "ህንተንቱ ኢታተይ ህንተንታ ኦይቆ፤ ታን ሄዋን ገልከ፤ ሀዋፐ ህን ባጋን ታን አይሁዳ ግደና አሳኮ ባይ" ያጌዳ።

7 ሄዋፐ ከሲደ፥ ጾሳዉ ጎይንያ ዮስጾሳ ግያ ብታንያ ሶይ ቤዳ፤ ዮስጾሳ ጎሊ አይሁዳ ዎሳ ጎልያ ማታን ደኤ። 8 አይሁዳ ዎሳ ጎለ ካፑ ቃርስጶስ ባረ ሶይ አሳ ኡባና ጎዳ አማኔዳ፤ ቆሮንቶሳ አሳቱዋፐካ ጮራቱ ጾሳ ቃላ ስሴዳ ዎደ፥ አማኒደ ጻማቀቴድኖ።

9,10 ጎዳይ እት ቃማ ሳጻን ጳዉሎሳ፥ "ያዮፓ፤ ኦዳ፤ ጮኡ ጎፓ። ታን ኔናና ደእያ ድራዉ፥ ኔና ቆሀናዉ ኢታባን የጋና አሳይ ኦንነ ባዋ፤ አያዉ ጎፐ፥ ታዉ ሀ ካታማን ጮራ አሳይ ደኤ" ያጌዳ። 11 ጳዉሎስ ጾሳ ቃላ አሳ ታማርሲደ፥ እት ላይነ ኡሱፑን አገና ኡንቱንቱና ኡቴዳ።

12 ጋልዮሰ አካይያ ጋድያ ሞድያ ዎደ፥ አይሁዳቱ እትፐ ጳዉሎሳ ቦላ ደንዲደ፥ ፕርዳ ጎለ አ አፊደ፥ 13 "ሀ ብታኒ ሙሴ ህግያ እጺደ፥ አሳይ ጾሳዉ ጎይናና ማላ ጭሜ" ያጌድኖ።

14 ጳዉሎስ ሃሳያና ሀንሽን፥ ጋልዮሰ አይሁዳቱዋ፥ "አይሁዳቶ፥ ሄዌ ባላ ኦሱዋ ዎይ ኢታ ናቆ ግዶፐ፥ ታን ህንተንቱባ ዳንዳያደ ስሳናዉ በሴ። 15 ሽን ቃላዉ ሱንዉነ ህንተ ሁጰ ህግያዉ ህንተንቱ ፓሉመቶፐ፥ ህንተ ሁጰዉ ኤርተ፤ ሀዋ ታን ፕርድከ" ያጌዳ። 16 ፕርዳ ጎልያፐ ካረዉ ኡንቱንታ ከሴዳ። 17 ሄዋፐ ጉይያን፥ ግሪከ አሳይ ኡባይ አይሁዳ ዎሳ ጎለ ካፑዋ ሶስተኒሳ ኦይቂደ፥ ፕርዳ ጎልያ ስንን ሾጬድኖ፤ ሽን ጋልዮሳ ሄዌ አይነ መትቤና።

ጳዉሎስ አንጾክያ ቤዳ

18 ጳዉሎስ ዳሮ ዎድያ ቆሮንቶሳን ኡቴዳዋፐ ጉይያን፥ እሻቱዋ ሳሮቲደ፥ ጵርስቂልናነ አቂላና ማርካብያን ሶርያ ቤዳ፤ ባረዉ ሺቄዳ ጋሱ ደእያ ድራዉ፥ ክንክርያ ካታማን ባረ ሁጲያ ሜደቴዳ።*18:18 ሁጲያ ሜደቴዳ፦ ጳዉሎስ ጉ ዎድያዉ "ዱማታና" ጊደ ጫቄዳ። ሀዋ ጉሳይ፥ ባረ ሁጲያካ ሜደተና፤ ዎይንያካ ኡሸና ጉሳ። ሽን እ ጫቄዳ ዎዲ ዉሮደ፥ ባረ ሁጲያ ሜደቲደ ጾሳዉ ያርሹዋ ያርሻናዉ በሴ ጉሳ።✝18:18 ፓይ. 6:18 19 ኡንቱንቱ ኤፈሶነ ጋኬዳ ዎደ፥ ጳዉሎስ ጵርስቂሎነ አቂላ ያን የግ ዬዳ፤ ሽን ባረዉ አይሁዳ ዎሳ ጎለ ገሊደ፥ አይሁዳቱዋና ፓሉመቴዳ። 20 ኡንቱንቱ ባረንቱና ዳሮ ዎድያ ኡታና ማላ ጳዉሎሳ ዎስና እ እጼዳ። 21 ሽን ኡንቱንቱፐ ሻከቲደ፥ "ጾሳይ ጎፐ፥ ላኤንዋ ህንተንቱኮ ስማና" ያጊደ ኤፈሶናፐ ማርካብያን ቤዳ። 22 ቂሳርያ ጋኬዳ ዎደ የሩሳላመ ቢደ፥ አማንያ አሳ ሳሮቴዳዋፐ ጉይያን፥ አንጾክያ ዎዳ።

23 ያን አማሬዳ ዎድያ ጋምኢደ ቤዳ፤ ካልያዋንታ ኡባ ምንሲደ፥ ጋላትያናነ ፕርግያና አዳ።

አጲሎስ ኤፈሶናነ ቆሮንቶሳ ቤዳ

24 እስክንድርያን የለቴዳ አይሁዳ አሳ እት አጲሎሳ ግያ ሎኦ ሃሳይያዌ ኤፈሶነ ቤዳ፤ ጾሳ ማጻፋቱዋ እ ዳርስ ኤርያ አሳ። 25 ጎዳ ኦግያካ ታማሬዳ አሳ፤ ዮሃንሳ ጽንቃታ ጻላላ ኤሪደ፥ አያናን ባረ ጋርሳን ኤጸቲደ፥ የሱሳባ ሱርሲደ ሃሳዬዳነ ታማርሴዳ። 26 ያቲደ አይሁዳ ዎሳ ጎልያን ያየናን ሃሳያ ዶሜዳ። ጵርስቂላይነ አቂላይ እ ኦድያዋ ስሴዳ ዎደ፥ ባረንቱና ሶይ አ አፊደ፥ ጾሳ ኦግያ ካሰፐ ሱርሲደ፥ አዉ ጌሽ ኦዴድኖ።

27 አጲሎስ አካይያ ፕናና ኮይና፥ እሻቱ አ ምንሲደ፥ አካይያን ደእያ ካልያዋንቱ አ ሞካና ማላ፥ ኡንቱንቶ ዳብዳቢያ ጻፌድኖ፤ እ ያ ጋኪደ፥ ጾሳ አ ኬካተን አማንያዋንታ ዳሮ ማዴዳ። 28 አያዉ ጎፐ፥ የሱስ ባረ ሁጰዉ ክርስቶሳ ግዴዳዋ አይሁዳቶ ጾሳ ማጻፋቱዋፐ ቆንጭሲደ፥ አሳ ስንን ምንሲደ ኦዴዳ።