ጳዉሎስ ማልታ ግያ ሃን ዶደቴዳ ሳኣ ቤዳ
1 ኑን ጋጻ ሳሮተን ከሴዳ ዎደ፥ ሄ ሃን ዶደቴዳ ሳአይ ማልታ ጌተትያዋ ኤሬዶ። 2 ሃን ዶደቴዳ ሳኣን ደእያ አሳቱ ኑዉ ዳሮ ኬካተ ኬኬድኖ፤ እራይ ቡካናዉ ዶሜዳ ድራዉነ ሜጉዋ ድራዉ፥ ታማ ኤደ፥ ኑና ኡባ ሞኬድኖ።
3 ጳዉሎስ ዳሮ ቃይጼርያ ም ምጺደ ታማን የግሽን፥ ማርዛማ ሾሻይ ሴላ ድራዉ ከሲደ፥ አ ኩሽያን ጻጸቲደ፥ አ ዱኬዳ። 4 ሃን ዶደቴዳ ሳኣን ደእያ አሳቱ ቅርጫንትያ ሾሻይ ጳዉሎሳ ኩሽያን ጻጸቴዳዋ በኤዳ ዎደ እቱ እቶ፥ "ቱሙ ሀ ብታኒ ሸምፑዋ ዎያ አሳ፤ ሀራይ አቶ አባፐ እ አትናካ ኑ ጾሳ ፕርዳይ አ ፓጻ ደኦ ግቤና" ያጌድኖ።
5 ሽን ጳዉሎስ ባረ ኩሽያፐ ቅርጫንትያ ሾሻ ዉጻኪደ፥ ታማን ኦሌዳ፤ አ አይነ ኦቤና። 6 ኡንቱንቱ፥ "አ ቦላይካ ጋፌ፤ ዎይ አኬከናን ኩንዲደ ሀዬ" ያጊደ አ ናጊኖ፤ ሽን ጮራ ዎድያ ናጊደ፥ አ ቦላን አይነ ዱማቴዳባይ ይና፥ "ሀዌ ጾሳ" ያጊደ ባረንቱ ቆፋ ባሽ አጌድኖ።
7 ሄዋ ሄራን ሃን ዶደት ኡቴዳ ሳኣ ካፑዋ ፑፕልዮሳ ግያዎ ጋዲ ደኤ፤ እ ኑና እማተ፥ ሄዙ ጋላሳ ሲቁዋን ሞክ ሞይዜዳ። 8 ፑፕልዮሳ አቡ ቆጹዋ፥ ሴላነ ኡሉዋ ካ ሳከት ግሲደ ደኤ፤ ጳዉሎስ አ ሶይ ገሊደ፥ አዉ ጾሳ ዎሴዳ፤ ባረ ኩሽያ አ ቦላ ዎደ፥ አ ፓዳ። 9 ሄዋፐ ጉይያን፥ ሄ ሃን ዶደቴዳ ሳኣን ሀርግያ ሀራ ኡባ አሳይካ ቃይ ዪደ ፓጼዳ። 10 ሄዋፐ ስምና ኑና ዳሮ ቦንቹዋ ቦንቼድኖ፤ ኑን ማርካብያን ባናዉ ደንዴዳ ዎደ፥ ኦገዉ ኑና ኮሽያባ ኑዉ እሜድኖ።
ጳዉሎስ ማልታፐ ሮመ ቤዳ
11 ሄዙ አገናፐ ጉይያን፥ ሃን ዶደቴዳ ሳኣን ባልጉዋ አደ፥ "ማንተ ጾሳ"28:11 ማንተ ጾሳ፦ ሀዋንቱ ላኡ አቱማ ናናቱ፥ ካስቶርነ ፓሎክሳ ጌተትያዋንቱ ዘዉሰ ናናቱዋ ግዲደ፥ ማርካብያን ደእያ አሳቱዋ ናግያ ጾሳቱዋ ጌተቲደ ጼሰቲኖ። ግያ እስክንድርያ ማርካብያን ባናዉ ደንዴዶ። 12 ኑን ስራኩሰ ግያ ካታማ ገሊደ፥ ያን ሄዙ ጋላሳ ኡቴዶ። 13 ሄዋፐ ዩዪደ፥ ረጊዩመ ግያ ካታማ ጋኬዶ። እት ጋላሳፐ ጉይያን፥ አዋይ ከስያሳ ጼልያ ዎደ ኡሸቻ ዱገሃ ባጋ ጫርኩ ጫርክና፥ ዎንትሳ ጋላስ ፑትያሉሳ ግያ ካታማ ዬዶ። 14 ሄዋን ኑን እት እት አማንያዋንታ ደምና፥ ባረንቱና ላፑ ጋላሳ ኡታና ማላ፥ ኑና ዎሴድኖ፤ ሄዋፐ ቃይ ሮመ ዬዶ።
15 ሮመን ደእያ አማንያዋንቱ ኑባ ስሲደ፥ አፍያሳ ገያነ "ሄዙ አቅያሳ ጌተትያሳ" ጋካናዉ ኑና ሞካናዉ ዬድኖ፤ ጳዉሎስ ኡንቱንታ በኤዳ ዎደ ጾሳ ጋላቲደ፥ ዎዛናን ምንሴዳ።
ጳዉሎስ ሮመን ታማርሴዳ
16 ኑን ሮመ ገሌዳ ዎደ፥ ጳዉሎስ ባረና ናግያ ዎታዳራና ባረካ ደአናዳን ኦሰቴዳ።
17 ሄዙ ጋላሳፐ ጉይያን፥ ጳዉሎስ አይሁዳቱዋ ካፓቱዋ ባረኮ ጼሴዳ፤ ኡንቱንቱ ሺቄዳ ዎደ፥ ኡንቱንታ ሀዋዳን ያጌዳ፤ "ታናዳን አማንያዋንቶ፥ ታን ኑ አሳ ዎይ ኑ አዎቱዋ ዎጋ ኢታባ አይነ ኦናን፥ ታና የሩሳላመን ቃቺደ፥ ሮመ አሳዉ አደ እሜድኖ። 18 ኡንቱንቱ ታና ብዴዳዋፐ ጉየ፥ ሀይቃናዉ በስያባይ ታ ቦላ አይነ ባይና ድራዉ፥ ታና ብላናዉ ኮዬድኖ። 19 ሽን ሄዋ አይሁዳቱ ኤኖ ጌናን እጼዳ ዎደ፥ ‘ታባ ቄሳረ ፕርዶ’ ጋናዌ ታና ኮሼዳፐ አትን፥ ታን ታ ዛርያ ሞትያባይ ታዉ ደእና ግደና። 20 ታን ህንተንቱና ጋከታናዉነ ሃሳያናዉ ህንተንታ ጼሴዳዌ ሄዋሳ፤ አያዉ ጎፐ፥ እስራኤልያ አሳይ ናሸቻን ናግያዋ ድራዉ ታን ሀ ሳንላታን ቃሸታድ" ያጌዳ።
21 አይሁዳ ጭማቱ ጳዉሎሳ፥ "ኑን ይሁዳፐ ነባዉ ዳብዳቢያ አክበይኮ። ኑ እሻቱዋፐካ ሀራይ አቶ፥ እቱካ ዪደ፥ ነባ ኦድቤና፤ ዎይ ነ ሱን ባይዚደ፥ ኑዉ ኦድቤና። 22 ሽን ሄ አሳ ሱን ኡባ ሳን አሳይ ባይዚደ ሃሳይያዋ ኑን ኤርያ ድራዉ፥ ነ ቆፋ ስሳናዉ ኮዬቶ" ያጌድኖ።
23 ኡንቱንቱ ባረንቱ ያና ጋላሳ ጳዉሎሳዉ ኬሪደ፥ ሄ ጋላስ ጮሪደ እ ደኢያሳ ዬድኖ፤ እካ ኡንቱንቶ ጾሳ ካዉተባ ማርካቴዳ። ቃይ ኡንቱንቱ የሱሳባ አማናና ማላ፥ ሙሴ ህግያፐነ ናባቱ ጻፌዳዋፐ አኪደ ኡንቱንታ ታማርሲደ፥ ዎንታፐ ኦማርስ ጋካናዉ ሎይ ኦዴዳ። 24 ባጋቱ ጳዉሎስ ጌዳዋ አማኔድኖ፤ ሽን ባጋቱ አማንበይክኖ። 25 ኡንቱንቱ ባረንቱ ግዶን የዉዋ ኤኖ ጌናን እጼዳ ዎደ፥ ጳዉሎስ እትባ ጌዳዋፐ ጉይያን ቤድኖ፤ እ ሀዋዳን ያጌዳ፤ "ጌሻ አያናይ ኑ አዋቶ ናብያ ኢስያሳ ማጻፋን፥
26 " ‘ኔን ሄ አሳኮ ባደ ሀዋዳን ጋ፤
"ህንተንቱ ስሳ ስሳና፥
ሽን ህንተንቶ ገለና፤
ህንተንቱ ጼላ ጼላና፥
ሽን በእክታ።
27 አያዉ ጎፐ፥ ሀ አሳ ዎዛናይ ጉዙሜዳ፤
ባረንቱ ሀይ ቱልሴድኖ፤
ባረንቱ አይፍያካ ጪሉሜድኖ።
ሄዌ ባዌንቶ፥ ባረንቱ አይፍያን በአና፤
ኡንቱንቱ ሀይይካ ስሳና፤
ኡንቱንቱ ዎዛናይካ አኬካና፤
ኡንቱንቱ ታኮ ጾሳኮ ስማና።
ቃይ ታንካ ኡንቱንታ ፓና"
ያጋ’ ያጌዳ።28:27 ኢሳ. 6:9-10
28 "ስም ሀዌ ጾሳ አቶተይ፥ አይሁዳ ግደናዋንቶ ኪተቴዳዌ ህንተንቶ ኤረቶ። ቃይ ኡንቱንቱካ ስሳና" ያጌዳ።
29 [ጳዉሎስ ሄዋ ጌዳዋፐ ጉይያን፥ አይሁዳቱ ባረንቱ ግዶን ዳሮ ፓሉመቲደ ቤድኖ።]28:29 ዱማ ዱማ ማጻፋቱ ሀዋ ጉጅያዌ፥ ጳዉሎስ ሀዋ ጌዳዋፐ ጉይያን ግያዋና።
30 ጳዉሎስ ክራ ጎልያን ላኡ ላይ ኩመን ደኢደ፥ ባረኮ ይያ ኡባ ሞኬ። 31 ባረና ኦንነ ድገናን ጾሳ ካዉተባነ ጎዳ የሱስ ክርስቶሳባ ኦዲደ፥ ያየናን ዳሪ ቆንጭሲደ ታማርሴዳ።