ኪቴዳዋንቱ ኦሱዋ 24

ጳዉሎሳ አይሁዳቱ ሞቴድኖ

1 እቼሹ ጋላሳፐ ጉይያን፥ ቄሳቱዋ ኡባቱዋ ካፑ፥ ሀናንያ፥ ጭማቱዋናኔ ጻርጻሉሳ ግያ እት ጻባቃና ዱገ ቂሳርያ ዎዳ፤ ኡንቱንቱ ጋድያ ሞድያዋ ቦላ ጳዉሎሳ ሞቴድኖ። 2,3 ጳዉሎስ ጼሰቴዳ ዎደ፥ ጻርጻሉሰ አ ሀዋዳን ያጊደ፥ ሞቱዋ ዶሜዳ።

"ቦንቼቴዳ ፍልክሳ፥ ኑን ነ ባጋና ዳሮ ሳሮተ ደሜዶሽን፥ ነ ቆፋን ሀ ጋድያዉ ኡባባን ኡባሳንካ ሎኦ ላሚ ቤትያዎ ኔና ሎይ ጋላቲደ፥ ሀዋ አኬቶ። 4 ሽን ታን ኔና ጋምኤናን፥ ዶያ ግዴዳ ነ ኬካተን ኑባ ኔን ቃንን ስሳና ማላ፥ ኔና ዎሳይ። 5 አያዉ ጎፐ፥ ሀ ብታኒ ቦ ግዲደ፥ ሳኣ ኡባን ደእያ አይሁዳቱዋ ግዶን ዋላሳ ደንዳ፥ ናዝራዋቱ ባጋ አሳ ካለያዋ ግዴዳዋ ኤሬዶ። 6 ሀራይ አቶ ጌሻ ጎልያካ ቱንሳናዉ ኮይሽን አ ኦይቂደ፥ ኑ ህግያዳን፥ አ ቦላ ፕርዳናዉ ቆፔዶ፤ 7 ሽን ኦላ ካፑዋ ሉስዮስ ዪደ፥ ዎልቃን ኑ ኩሽያፐ አ ዎ አኬዳ። 8 አ ሞትያዋንቱካ ኔኮ ያና ማላ አዛዜዳ፤ ኔን ነ ሁጰዉ ሀ ብታንያ ብዳደ፥ ኑን አ ሞትያ የዉዋ ኡባ ኤራናዉ ዳንዳያ" ያጌዳ።

9 አይሁዳቱካ ቃይ፥ "ሀ የዉ ቱማ" ጊደ፥ አ ቆፋ አኬድኖ።

ጳዉሎስ ፍልክሳ ስንን ሞቶ ዛሩዋ እሜዳ

10 ጋድያ ሞድያዌ ጳዉሎሳ ያናዳን ዉትና፥ እ ሀዋዳን ያጊደ ዛሬዳ፤ "ኔን ዳሮ ዎድያፐ ዶማደ፥ ሀ አሳዉ ፕርዳደ ደእያዋ ታን ኤራደ፥ ታ የዉዋ ናሸቻን ዛራይ። 11 ታን የሩሳላመ ጎይናናዉ ከሶደፐ ታማነ ላኡ ጋላሳፐ ዳረናዋ ኔን ነ ሁጰዉ ኤራና ዳንዳያ። 12 አይሁዳቱ ታና ጌሻ ጎልያን ግድና፥ አይሁዳ ዎሳ ጎለን ግድና፥ ካታማን ግድና፥ ኦናናነ ፓሉመትሽን ዎይ አሳ ሺሻደ ማቂሽን፥ እት ኡራናነ በእበይክኖ። 13 ኡንቱንቱ ሀእካ ታና ሞትያዋ ሻትማናዉ ዳንዳይክኖ።

14 "ሽን ታን ሀዋ ነዉ ኦዳይ፤ ታን ሙሴ ህግያን ደእያዋነ ናባቱ ጻፌዳ ኡባባ አማናናዳን፥ ኑ አዎቱዋ ጾሳዉ ኡንቱንቱ ዎርዶ ግያ ኦግያን ጎሸታይ። 15 ሀዋንቱ ባረንቱ ሁጰዉ፥ ‘አሳይ ኡባይ፥ ዎርዱካ ጽሉካ ሀይቁዋፐ ደንዳናዋንታ’ ግያዋዳን፥ ታንካ ኡንቱንቱ ደንድያዋ ጾሳን ህዶታ ዎደ አሙዋን ናጋይ። 16 ሄዋ ድራዉ፥ ታን ቃይ፥ ጾሳ ስንንነ አሳ ስንን ኡባ ዎደ፥ ፖኩ ባይና ትላ ዎዛናይ ታዉ ደአና ማላ ምናይ።

17 "ታን የሩሳላመፐ ከሶደፐ ጮራ ላይፐ ጉይያን፥ ታ ጋደ ህዬሳዉ ሚሻ እማናዉነ ያርሹዋ ያርሻናዉ የሩሳላመ ባድ። 18 ሄዋ ኦሽን፥ አሳይ ሺቀናን፥ ዋላሳይ ደንደናን፥ ታን ጌሻ ጎልያን ጌይሽን፥ ኡንቱንቱ ታና ደሜድኖ። 19 ሽን ኢስያፐ ዬዳ እት እት አይሁዳቱ ሄዋን ደኢኖ፤ ኡንቱንቱ ታ ቦላ የዉዋ ኮዮፐ፥ ዪደ ታና ነ ቦላን ሞታናዉ በሴ። 20,21 ዎይ ታን ኡንቱንቱ ግዶን ኤቃደ፥ ‘ሀይቄዳዋንቱ ደንዳናዋ አማንያ ድራዉ፥ ሀቼ ህንተ ስንን ታ ቦላ ፕርዲኖ’ ጋደ ሃ ቂሳደ ሃሳዬዳ እት ቃላፐ አትን፥ ሺቁዋ ስንን ኤቂሽን፥ ታ ቦላ እት ባይዙዋ ደሜዳዋ ግዶፐ፥ ሀዋንቱ ባረንቱ ሁጰዉ ሀዋን ኦዳናዋንታ" ያጌዳ።

22 ሽን ፍልክሰ ጾሳ ኦግያባ ጌሽ ኤሬዳ ድራዉ፥ "ታን ህንተ የዉዋ ኦላ ካፑዋ ሉስዮስ ይያ ዎደ ኦግያ ኦይና" ያጊደ፥ ፕርድያ ዎድያ ስንዉ ኬሬዳ። 23 ፍልክሰ ቃይ ጳዉሎሳ ቃቼናን ናጋና ማላነ አ ዳባቱዋፐ ኦንነ አዉ ኦሽን፥ ዎይ አኮ ዪሽን ድገና ማላ፥ ጼታቱዋ ካፑዋ አዛዜዳ።

ጳዉሎስ ፍልክሳነ ድሩስላ ስን ሺቄዳ

24 አማሬዳ ጋላሳፐ ጉይያን፥ ፍልክሰ አይሁዳ አሳ ዛረ ግዴዳ ባረ ማቻት ድሩስልና ዪደ፥ ጳዉሎሳ ኪት አህሲደ፥ የሱስ ክርስቶሳን አማንያ ኦግያ እ ሃሳይሽን ስሴዳ። 25 ጳዉሎስ ጽሎተባ፥ ባረ ሁጲያ ናጉዋባነ ያና ፕርዳባ ሃሳይሽን፥ ፍልክሰ ያዪደ፥ "ኔን ሀእዉ ባ፤ ታዉ ሚኬዳ ዎደ፥ ኔና ኪታደ ጼግሳና" ያጌዳ። 26 ሄ ዎደ ቃይ ጳዉሎስ ብለታናዉ፥ ባረዉ ማጋንጻ እማንዴሻ ጊደ ቆፔዳ፤ ሄዋ ድራዉ፥ ዳሮ ዎደ አ አህስ አህሲደ፥ አናና ሃሳዬ።

27 ላኡ ላይ ኩሜዳዋፐ ጉይያን፥ ፍልክሳ ኮታ ጶርቂዮሳ ፕስጾስ አኬዳ። ፍልክሰ አይሁዳቱዋ ናሸቻናዉ ኮዪደ፥ ቃሾ ጎለን ጳዉሎሳ ባሽ አጌዳ።