ኪቴዳዋንቱ ኦሱዋ 2

የሱሳ ካልያዋንቱ ቦላ ጌሻ አያና ዎ

1 ጰንጸቆስተ*2:1 ጰንጸቆስተ፦ አይሁድያ አሳይ ፓስጋ ባላ ቦንቾደፐ እሻታሙ ጋላሳይ አ ስምና ቦንቼትያ ዛርጋ ቆይቻ ባላ ጌተትያዋ። ግያ ጋላሳይ ጋኬዳ ዎደ፥ አማንያዋንቱ ኡባቱ እትፐ ግዲደ፥ እትሳ ሺቅ ደእሽን፥✝2:1 ዎጋ 23:15-21፤ ዛረ. 16:9-11 2 ዎልቃማ ጎቱዋዳን ጉምያ ጉንይ ዎዛና አናን ሳሉዋፐ ዪደ፥ ኡንቱንቱ ኡቴዳ ጎልያ ኡባ ኩሜዳ። 3 ቃይ ታማ ላጩዋዳን ፖዱግያዌ ኡንቱንቶ ቤቲደ፥ ሻከት ሻከት፥ ኡንቱንቱ ኡባ ቦላ ዎዳ። 4 ኡንቱንቱ ኡባን ጌሻ አያናይ ኩሚደ፥ ዱማ ዱማ ቃላን ሃሳያና ማላ፥ ኡንቱንታ ዳንዳይስና፥ ሃሳያ ዶሜድኖ።

5 ሳኣን ደእያ አሳ ዘረ ኡባፐ ዪደ፥ ጾሳዉ ያይያ እትፐ ደእያ አይሁዳቱ የሩሳላመን ደኢኖ። 6 ሀ ጉን ስሴዳ ዎደ፥ አሳይ ኡባይ ሺቄዳ፤ ኡንቱንቱ ባረንቱ ቃላን ቃላን ሃሳይሽን ስሴዳ ድራዉ፥ ግያዋ ዬድኖ።

7 አሳይ ኡባይ ማላለቲደነ ሀዌ ኦራባ ጊደ፥ "በእተ፤ ሀ ሃሳይያዋንቱ ኡባቱ ጋሊላ አሳቱዋ ግድክኖ? 8 ያትና፥ ኑን ኑ የለቴዳ ጋደ ቃላን ኡንቱንቱ ሃሳይሽን ዋኒደ ስሴቶ? 9 ኑን ጳርተ አሳቱ፥ ሜዶነ አሳቱ፥ ኤላሜጸ አሳቱ፥ ላኡ ሻፋቱዋፐ ግዱዋን ደእያዋንቱ፥ ይሁዳን፥ ቃጳዶቅያን፥ ጳንጾሳን፥ ኢስያን፥ 10,11 ፕርግያን፥ ጵንፍልያን፥ ግብጼን፥ ቀሬና ባጋን ደእያ ሊብያ ዎራዳቱዋን ደእያዋንቱ፥ ሮመፐ ዬዳ እማቱ፥ አይሁዳቱ፥ አይሁዳተዉ ላመቴዳ ኑፐ አማሬዳዋንቱ፥ ቃርጼሰ አሳቱነ፥ አራብያ አሳቱ፥ ጾሳይ ኦዳ ዎልቃማ ኦሱዋ ኑ ቃላን ኡንቱንቱ ሃሳይሽን ስሴዶ" ያጌድኖ። 12 ኡባይካ ማላለቲደ፥ የዉ ባረንቶ ገለናን እጽና ባረንቱ ግዶን፥ "ላ ሀዌ ዋግያዌ?" ያጌድኖ። 13 ሽን ሀራ አሳቱ አማንያዋንቱ ቦላን ቅሊጪደ፥ "ሀዋንቱ ኡሺደ ማቴድኖ" ያጌድኖ።

ጰጽሮሳ ሃሳያ

14 ሽን ጰጽሮስ፥ የሱስ ኪቴዳ ሀራ ታማነ እት ኪተቶዋንቱና ደንድ ኤቂደ፥ ባረ ኮሻ ቁ ኦደ፥ ኡንቱንቶ ሀዋዳን ያግ ኦዴዳ፤ "አይሁዳቶ፥ ቃይ የሩሳላመን ደእያ ኡባቶ፥ ታን ኦድያዋ ስስተ። ሀዌ ህንተንቶ ኤረቶ፤ ህንተንቱ ቆፕያዋዳን፥ ሀዋንቱ ማትበይክኖ። 15 አያዉ ጎፐ፥ ዎንታፐ ብሮ ሄዙ ሳተ ግዴ። 16 ሽን ሀዌ ናብያ ኢዩኤል ሃሳዬዳዋ።

17 "እ ሃሳዪደ፥ ‘ጾሳይ ሀዋዳን ያጌዳ፤

ዎድያ ዉርሰን ሀዋዳን ሀናናዋ።

ታን አሳ ኡባ ቦላን ታ አያና ጉሳና።

ህንተንቱ አቱማ ናናይነ ህንተንቱ ማጫ ናናይ

ትምቢትያ ኦዳናዋንታ።

ህንተንቱ ዎዳላ ናናይካ ሳፃ በአናዋንታ፤

ህንተንቱ ጭማቱካ አኩሙዋ አኩመታናዋንታ።✝2:17 ኢዩ. 2:28-32

18 ሄ ጋላሳቱን ታ አቱማ ቆማቱዋ ቦላንነ

ታ ማጫ ቆማቱዋ ቦላን

ታን ታ አያና ጉሳና።

ሄዋፐ ጉየ ኡንቱንቱ ትምቢትያ ኦዳናዋንታ።

19 ቃይ ታን ቦላ ሳሉዋን ኦራባ፥

ጋርሳ ሳንካ ማላታ በሳና።

ሱይ፥ ታማይነ ሻርያዳን፥

ካሜዳ ጩዋይ ደአና።

20 ዎልቃማነ ቦንቾ ግዴዳ ጎዳ ጋላሳይ፥

ጋካናፐ ካሰ አዋይ ማና፤

አገናይካ ሱ ማላታና።

21 ሄ ዎደ ሀዋዳን ሀናናዋ፤

ጎዳ ሱን ጼስያ ኦንነ አታና’

ያጌዳ።

22 "እስራኤልያ አሳቶ፥ ሀ ቃላ ስስተ፤ ናዝሬትያ የሱስ ህንተንቱ ግዶን ጾሳይ ባረናን ኦዳ ዎልቃማ ኦሱዋን፥ ኦራባንነ ማላታን ህንተንቶ ሽሴዳ አሳ፤ ሄዋ ህንተንቱካ ኤሪታ። 23 የሱስ ህንተንቶ እመታና ማላ፥ ጾሳይ ካሰ ባረ ሸንያንነ ባረ ኤራን ባረ ቆፋ ቃች ዎዳ፤ ያትና፥ አ ህንተንቱ ናጋራንቻቱዋ ኩሽያን ማስቃልያ ቦላ ምስማርያን ሽሲደ፥ ካቅስ ዎሴድታ። 24 ሽን ሀይቁ የሱሳ ኦይቃናዉ ዳንዳይቤና ድራዉ፥ ጾሳይ ሀይቁዋ ሴላ አፐ ይሲደ፥ አ ደንዳ። 25 አያዉ ጎፐ፥ ዳዊተ የሱሳባ ሀዋዳን ያጌዳ፤

" ‘ታን መቶተናዳን፥

ጎዳይ ታ ኡሸቻን ደእያ ድራዉ፥

ታን ኡባ ዎደ ጎዳ ታ ማታን በአይ።✝2:25 ማዝ. 16:8-11

26 ሄዋ ድራዉ፥ ታ ዎዛናይ ናሸቴዳ፤

ታ እንጻርሳንካ ናሸቻይ ኩሜዳ።

ቃይ ታ ቦላይካ ሎኦ ደአና ጊደ፥

ናሸቻን ናጌ።

27 አያዉ ጎፐ፥ ታ ሸምፑዋ፥

ስኦልያን አጋካ።

ቃይ ነ ጌሻ ናኣ አሃካ ዎቀካ።

28 ኔን ታና ደኡዋ ኦግያ ኤርሳዳ።

ኔን ታናና ደእያዋን፥

ታን ዳሪ ናሸታይ’

ያጌዳ።

29 "እሻቶ፥ ኑ አዎቱዋ ካፑዋ ዳዊተባ ታን ህንተንቶ ጌሻደ ኦዳናዉ በሴ፤ ዳዊተ ሀይቂደ ሞገቴዳ፤ አ ዱፉ ሀቼ ጋካናዉካ ኑ ማታን ደኤ። 30 ዳዊተ ናብያ ግዴዳ ድራዉነ ጾሳይ አ ናና ዘረፐ እቱዋ አ ካዉተ ኦይድያን ኡትሳናዉ አዉ ጫቄዳዋ ኤሬዳ ድራዉ፥✝2:30 ማዝ. 132:11፤ 2 ሳሜላ 7:12-13 31 ክርስቶሳ ደንዱዋ ስንዉ ጼሊደ፥ ‘አ ሸምፑ ስኦልያን አትቤና፤ አ ቦላይካ ዎቂቤና’ ጊደ ኦዴዳ።

32 "ጾሳይ የሱሳ ሀይቁዋፐ ደንዳዎ ኑን ኡባይ ማርካ። 33 ሄዋ ድራዉ፥ ጾሳይ ባረፐ ኡሸቻ ባጋን*2:33 ኡሸቻ ባጋ፦ ጉሳይ ቦንቹዋነ ዎልቃ በስያ ሳኣ። አ ቁ ቁ ኦደ፥ አዉ ጌሻ አያና እማና ጌዳዋዳን፥ ጌሻ አያና አኪደ፥ ሀዋ ህንተንቱ ሀእ በእያዋነ ስስያዋ ኑ ቦላ ጉሴዳ።

34,35 "አያዉ ጎፐ፥ ዳዊተ ባረ ሁጰዉ ሳሉዋ ከስቤና፤ ሽን ያጌዳ፤

" ‘ጎዳይ ታ ጎዳ፤ "ታን ነ ሞርከቱዋ፥

ኔን ገድያን የ ኤቂያዋ ኦና ጋካናዉ

ሀዋን ታፐ ኡሸቻ ባጋና ኡታ" ጌዳ’

ያጌዳ።✝2:34-35 ማዝ. 110:1

36 "ሄዋ ድራዉ፥ ጾሳይ ማስቃልያ ቦላ ምስማርያን ሀ ህንተንቱ ሺደ ካቄዳ የሱሳ ጎዳነ ክርስቶሳ ኦዳዋ እስራኤልያ አሳ ዘረይ ኡባይ ቱሙፐ ኤሮ" ያጌዳ።

37 አሳይ ጰጽሮስ ጌዳዋ ስሴዳ ዎደ፥ አሳዉ ዎዛናይ ዳሮፐ ቦሸትና፥ ጰጽሮሳነ የሱስ ኪቴዳ ሀራቱዋ፥ "ኑ እሻቶ፥ ያትና ኑን አያ ኡዳኔ?" ያጌድኖ።

38 ጰጽሮስ ኡንቱንታ፥ "ህንተንቱ ናጋራይ አቶ ጌተታና ማላ፥ ናጋራፐ ስሚደ፥ ህንተንቱ ሁጲያን ሁጲያን የሱስ ክርስቶሳ ሱንን ጻማቀትተ። ጾሳይ እምያ ጌሻ አያና ህንተንቱ አካና። 39 አያዉ ጎፐ፥ ጾሳይ እማና ጌዳ ቃላይ ህንተንቱሳ፥ ህንተንቱ ናናቱዋሳነ ጎዳይ ኑ ጾሳይ ባረኮ ጼስያ ሃኩዋን ደእያዋንቱ ኡባሳ" ያጌዳ።

40 ጰጽሮስ ኡንቱንቶ ቃላ ሀራካ ጉጅ ማርካቲደ፥ "ሀ ዎድያ ጌላ አሳፐ ህንተንቱ ሁጲያ አሽተ" ያጊደ ዞሬዳ። 41 ጰጽሮስ ኦዴዳዋ አኬዳዋንቱ ጻማቀቴድኖ፤ ሄ ጋላስ ሄዙ ሻአ ግድያ አሳይ አማኔድኖ። 42 ኡንቱንቱ የሱስ ኪቴዳዋንቱ ትምርትያን፥ እትፐተን ኡክ መን ምያዋንነ ጾሳ ዎሳን ገንጪኖ።

አማንያ አሳይ እሻተንነ እትፐተን ደእያ ደኡዋ

43 የሱስ ኪቴዳዋንቱ ኩሽያን ዳሮ ኦራባይነ ማላታቱ ኦሰትና፥ አሳ ኡባ ያሻይ ኦይቄዳ። 44 አማኔዳ ኡባቱ እትፐ ደኢኖ፤ ቃይ ባረንቶ ደእያባ ኡባካ እትፐ ሻክ አኬድኖ። 45 ኡንቱንቱ ባረንቱ ጋድያነ ባረንቶ ደእያባ ዛልእ ዛልኢደ፥ ኦናነ ኮሼዳ ኬና ሚሻ ኡባዉ ሻኬድኖ። 46 ቃይ ኡባ ጋላስ፥ እት ዎዛና ግዲደ፥ ጌሻ ጎልያን ፓጨናን ጋከቲደ፥ ባረንቱ ጎለ ጎለ ጼሰቲደ ናሸቻንነ ፓሽካ ዎዛናን ቁማ ሚኖ። 47 ጾሳ ጋላቲደ፥ አሳ ኡባን ሳበቴድኖ። ቃይ ጎዳይ አማን አትያዋንታ ጋላስ ጋላስካ ኡንቱንቱ ቦላ ጉጄ።