ኪቴዳዋንቱ ኦሱዋ 22

1 "ታናዳን አማንያዋንቶ፥ ታ አዋቶ፥ ታን ሀእ ህንተንቶ ኦድያ የዉዋ ስስተ!" 2 ጳዉሎስ ኡንቱንቶ እብራይስጸ ቃላን ሃሳይያዋ ስሲደ፥ ካሰፐ ሎይ ጮኡ ጊና እ ሀዋዳን ያጌዳ።

3 "ታን ክልቂያን ደእያ ጸርሴሰን የለታደ፥ ሀ ካታማን ጋማልያል ታና ታማርስና ድጫደ፥ ኑ አዎቱዋ ህግያካ ምንሳ ታማራደ፥ ሀቼ ህንተ ኡባይ ሀንያዋዳንካ፥ ታን ጾሳ የዎ ሴለትያ አይሁዳ አሳ። 4 ታን ማጫ አሳነ አቱማ አሳ ኦይቃ ኦይቃደ ቃሾ ጎለን የጌዳ አሳነ፥ ሀ ኦግያ ካልያ አሳ ዎሳና ጋካናዉ መቶዳ አሳ። 5 ሀዋዳንካ፥ ቃይ፥ ቄሳቱዋ ኡባቱዋ ካፑነ ጭማ ኡባ ሺቁ ታዋ ማርካታናዉ ዳንዳዬ፤ ታን ዳማስቆን ደእያ ኡንቱንቱ እሻቱዋ አይሁዳቶ፥ ኡንቱንቱፐ ዳብዳቢያ አካደ፥ ሄዋን ደእያ አሳቱ ቆሄቲደ ሙረታናዳን፥ የሩሳላመ ኡንቱንታ አሀናዉ ያ ባድ።

ጳዉሎስ ክርስቶሳኮ ስሜዳ ባረ ስማባ ኦዴዳ

6 "ታን ባደ ዳማስቆ ማቴዳ ዎደ፥ ሴታ ጋላሳ ግድሽን፥ ቆፐናን ሳሉዋፐ ዎልቃማ ፖኡ ታ ማታን ዩይ አደ ፖኤዳ። 7 ታን ሳኣን ኩንዳ ኡታደ፥ ‘ሳኦላ፥ ሳኦላ፥ ታና አያዉ የደርሳይ?’ ግያ ቃላ ስሳድ።

8 "ታን ዛራደ፥ ‘ታ ጎዳዉ፥ ኔን ኦኔ?’ ያጋድ።

"ሄዋፐ ጉየ፥ ‘ታን ኔን የደርስያ ናዝሬትያ የሱሳ’ ያጌዳ። 9 ታናና እትፐ ደእያዋንቱ ፖኡዋ በኢደ ያዬድኖ፤ ሽን ታዉ ሃሳይያዋ ቃላ ስስበይክኖ።

10 " ‘ታ ጎዳዉ፥ ታን አያ ኦ?’ ያጋድ።

"ጎዳይ ታና፥ ‘ደንዳደ ዳማስቆ ባ። ኔን ኦናዉ ጾሳይ ቆፔዳ ኡባባይ ነዉ ያን ኦደታናዋ’ ያጌዳ። 11 ሄ ዎልቃማ ፖኡዋ ድራዉ፥ ታ አይፊ ቆቅና፥ ታናና ደእያ አሳቱ ታ ኩሽያ ኦይቂደ፥ ታና ጎችና፥ ዳማስቆ ጋካድ።

12 "ዳማስቆን ደእያ አይሁዳ ኡባይ ሎይ ቦንችያ እት ሀናንያ ግያ ብታኒ፥ ኑ ህግያዉ አዛዘቲደ፥ ጾሳዉ እመቴዳ አሳ። 13 ሀናኒ ታኮ ዪደ፥ ታ ማታን ኤቂደ ታና፥ ‘ታ እሻዉ ሳኦላ፥ ጼላ’ ያጌዳ። ታን ሄ ዎደ ሄ ማንእያን አኮ ጼላ አጋድ።

14 "እ ታና ሀዋዳን ያጌዳ፤ ‘ኑ አዎቱዋ ጾሳይ ኔን አ ቆፋ ኤራናዉ፥ አ ጽሎ ናኣ በአናዉነ አ ዶናፐካ ሃሳያ ስሳናዉ ኔና ካሰና ዶሬዳ። 15 አያዉ ጎፐ፥ ኔን በኤዳባነ ስሴዳባ አሳ ኡባ ስንን አዉ ማርካታናሳ። 16 ሀእካ አያዉ ጋምአይ? ደንዳደ ጻማቀታ፤ አ ሱን ጼሳደ፥ ነ ናጋራፐካ ሜጨታ’ ያጌዳ።

17 "ታን ጉየ የሩሳላመ ስማደ ጌሻ ጎልያን ዎስሽን፥ ታ አያናን ግዳድ። 18 ጎዳይ ታና፥ ‘ኤሌላደ፥ የሩሳላመ ከሳ አያዉ ጎፐ፥ ኔን ታዉ ሀዋን ማርካትያዋ አሳይ አከና’ ያግሽን ታን አ በኣድ።

19 "ታን፥ ‘ታ ጎዳዉ፥ አይሁዳ ዎሳ ጎልያ ኡባን ኔና አማንያዋንታ ኦይቃደ ዋዳዋነ ቃሾ ጎልያን የጌዳዋ ኡንቱንቱ ኤሪኖ። 20 ኡንቱንቱ ነ ማርካ እስጽፋኖሳ ዎያ ዎደ፥ ታን ሄ የዉዋ ኤኖ ጋድ። ቃይ ኡንቱንቱ ምይያን ኤቃደ፥ አ ዎያዋንቱ ማዩዋ ናጋይ’ ያጌዳ።

21 "ጎዳይ ታና፥ ‘ታን ኔና አይሁዳ ግደና አሳኮ ሃኮ ሳ ኪትያ ድራዉ ባ’ ጌዳ" ያጌዳ።

ጳዉሎስ ሮመ አሳ ግድያዋ ቆንጭሴዳ

22 ጳዉሎስ ሄ ቃላ ሃሳያና ጋካናዉ አሳይ እ ግያዋ ስሴ፤ ሄዋፐ ጉይያን፥ ባረንቱ ኮሻ ቁ ኦደ፥ "ሀዋ ጋድያፐ ይሳ፤ እ ደአናዉ በሰና" ያጌድኖ።

23,24 ኡንቱንቱ ዋስሽን፥ ባረንቱ ማዩዋ ቦላዉ ኦልሺንነ ባና ጫርኩዋን ላልሽን፥ ኦላ ካፑ ዎታዳራቱ ጳዉሎሳ ባረንቱ ደኢያሳ አፋና ማላ አዛዜዳ። ቃይ አሳይ አያዉ ሄዋዳን አ ቦላ ዋሴድኖንቶ ኤራናዉ፥ ጳዉሎሳ ልሱዋን ሾጫና ማላ፥ ኡንቱንታ አዛዜዳ። 25 ሽን ዎታዳራቱ ጳዉሎሳ ዳፉዋን ምንስ ቃቼዳ ዎደ፥ ጳዉሎስ ባረ ማታን ኤቄዳ ጼታቱዋ ካፑዋ፥ "ሮመ ጋድያ አሳ ፕርዳይ ባይናን ሾጭያዌ ህንተንቶ ዎጌ?" ያጌዳ።

26 ሄዋ ጼታቱዋ ካፑ ስሴዳ ዎደ፥ ኦላ ካፑዋኮ ቢደ፥ "ሀ ብታኒ ሮመ አሳ። ኔን አያ ኦና ቆፓይ?" ያጊደ ኦቼዳ።

27 ኦላ ካፑ ጳዉሎሳኮ ሺቂደ፥ "ኔን ሮመ አሴ? ታዉ ኦዳ" ያጌዳ።

ጳዉሎስ፥ "ኤ" ያጌዳ።

28 ኦላ ካፑ ጳዉሎሳዉ ዛሪደ፥ "ታን ሀ ዛረተ ዳሮ ሚሻን ሻማድ" ያጌዳ።

ሽን ጳዉሎስ፥ "ታን ሄ ዘረፐ የለታድ" ያጌዳ።

29 ሄዋ ድራዉ፥ ጳዉሎሳ ብዳናዉ ቆፔዳዋንቱ ኤለካ አፐ ሻከት አጌድኖ። ኦላ ካፑካ ጳዉሎስ ሮመ አሳ ግዴዳዋ ኤሬዳ ዎደ ያዬዳ፤ አያዉ ጎፐ፥ ሳንላታን አ ቃሽስ ዎዳ።

ጳዉሎስ አይሁዳቱዋ ሻንጋቱዋኮ ሺቄዳ

30 ዎንተ ጋላስ ኦላ ካፑ፥ አይሁዳቱ ጳዉሎሳ አያዉ ሞቴድኖንቶነ ጌሺደ ኤራናዉ ኮዪደ፥ ጳዉሎሳ ብሌዳ። ያቲደ ቄሳቱዋ ካፓቱነ አሳይ ኡባይ ሺቃና ማላ አዛዜዳ፤ ቃይ ጳዉሎሳ ዱገ ዎደ፥ ኡንቱንቱ ስንን ኤሴዳ።