1 ቄሳቱዋ ኡባቱዋ ካፑ እስጽፋኖሳ፥ "ሀዌ ቱሜ?" ያጊደ ኦቼዳ።

2 እስጽፋኖስ፥ "ታናዳን አማንያዋንቶ፥ ታ አዋቶ፥ ስስተ! ኑ አዉዋ አብራሃሞ ብሮ ካራነ ባናፐ ካሰ ማስጰጾምያን ደእሽን፥ ቦንቾ ጾሳይ አዉ ቤቲደ፥✝7:2 ዶመ 12:1 3 ‘ነ ቢታፐነ ነ ዳባቱዋፐ ሻከታደ፥ ታን ኔና በስያ ጋድያ ባ’ ያጌዳ። 4 ሄ ዎደ አብራሃሞ ካላዳዋቱ ጋድያፐ ከሲደ፥ ካራነን ደአናዉ ቤዳ። አ አቡ ሀይቄዳዋፐ ጉይያን፥ ጾሳይ አ ሀ ጋደ ህንተ ሀእ ደኢያሳ አሄዳ።✝7:4 ዶመ 11:31፤ 12:4 5 እ ሀ ጋድያፐ ሀራይ አቶ፥ ገድያን የያ ሳኣካ አብራሃሞ እምቤና፤ ሽን አዉ ናአይ ዮፐካ፥ ጾሳይ አ፥ ‘ታን ነዉነ ኔፐ ጉይያን፥ ነ ዘረዉ ሀ ጋድያ ላታ ኦደ እማና’ ያጌዳ።✝7:5 ዶመ 12:7፤ 13:15፤ 15:18፤ 17:8 6 ጾሳይ አብራሃሞ፥ ‘ነ ዛራቱ ሀራ ጋድያን ደአና፤ ያን ኦይዱ ጼቱ ላይዉ ኡንቱንቱ አይለታናነ ናቀታና።✝7:6-7 ዶመ 15:13-14 7 ሽን ታን ነ ዘረ ሞድያ አሳ ቦላ ፕርዳና፤ ሄዋፐ ጉይያን፥ ኡንቱንቱ ሄ ጋድያፐ ከሲደ፥ ሀዋን ታዉ ጎይናና’ ያጌዳ።✝7:7 ከሳ 3:12 8 ጾሳይ አብራሃመ ዘረይ ቃጻረታና ማላ አናና ጫቂና፥ ይሳቃ እ የሊደ፥ ሆስፑን ጋላስ ቃጻሬዳ፤ ይሳቅ ያቆባ ቃጻርና፥ ቃይ ያቆብ ታማነ ላኡ አዎቱዋ ካፓቱዋ ቃጻሬዳ።✝7:8 ዶመ 17:10-14፤ 21:2-4፤ 25:26፤ 29:31—35:18

9 "አዎቱዋ ካፓቱ ዮሴፎ ቃናቲደ፥ ግብጼ ጋድያዉ አይለታናዳን፥ አ ዛልኤድኖ፤ ሽን ጾሳይ አናና እትፐ ደኤ።✝7:9 ዶመ 37:11፣ 28፤ 39:2፣ 21 10 ጾሳይ ዋይያ ኡባፐካ አ ከሴዳ፤ ቃይ ግብጼ ካትያ ስንንካ ናሹዋነ አ ኤራተ አዉ እሜዳ፤ ግብጼ ካቲ ዮሴፎዉ ግብጼ ጋድያነ ባረ ጎልያ ኡባ ሞዳናዳን፥ ሱንተ እሜዳ።✝7:10 ዶመ 41:39-41

11 "ግብጼ ጋድያንነ ካናነ ጋድያን ኡባን ኮሻይ ገሊደ፥ ጮራ አሳ መቶዳ፤ ሄ ጋሱዋን ኑ አዎቱ ቁማ ደምበይክኖ።✝7:11 ዶመ 42:1-2 12 ያቆብ ግብጼ ጋድያን ካይ ደእያዋ ስሲደ፥ ኑ አዎቱዋ ኮይሮ ያ የዴዳ። 13 ላኤንዋ ቡሳን ዮሴፎ ባረ እሻቶ ኤረቴዳ፤ ቃይ ግብጼ ካቲካ ዮሴፎ ዛርያ ኤሬዳ።✝7:13 ዶመ 45:1፣ 16 14 ዮሴፎ ባረ አዉዋ ያቆብነ ባረ ዳቡ ኡባይ ሙለካ ላፑን ታማነ እቼሹ አሳይ ባረኮ ያና ማላ፥ ኪቲደ ጼግሴዳ።✝7:14 ዶመ 45:9-10፣ 17-18፤ 46:27 15 ያቆብ ግብጼ ጋድያ ዎደ ሀይቄዳ፤ ኑ አዎቱካ ያን ሀይቄድኖ።✝7:15 ዶመ 46:1-7፤ 49:33 16 ኡንቱንቱ አሃይ ሄዋፐ ሰኬማ ጌተትያ ጋድያ ቶከቲደ፥ ያን አብራሃሞ ሀሞራ ናናፐ ዳሮ ብራን ሻሜዳ ዱፉዋን ሞገቴዳ።✝7:16 ዶመ 23:3-16፤ 33:19፤ 50:7-13፤ ኢያሳ 24:32

17,18 "ሽን ጾሳይ አብራሃሞ እማና ጌዳዌ ፖለትያ ዎዲ ጋካና ማትና፥ ዮሴፎ ኤረና ሀራ ካቲ ግብጼ ጋድያን ደንዳና ጋካናዉ፥ አሳይ ዳር ዳር ቤዳ።✝7:17-18 ከሳ 1:7-8 19 ሄ ካቲ ኑ ዛርያ ጭሚደ፥ ጉ ናናይ ሀይቃና ማላ፥ ካረ ኡንቱንታ ከስ ኦላናዳን፥ ኑ አዎቱዋ ኡንኤዳ።✝7:19 ከሳ 1:10-11፣ 22

20 "ሙሴ የለቴዳዌ ሄ ዎደ፤ ጾሳ ስንን እ ዳሮ ሎኦ ናኣ ግዴዳ፤ ባረ አዉዋ ጎልያን ሄዙ አገና ጋካናዉ ድጬዳ።✝7:20 ከሳ 2:2 21 ሙሴ ዎራ ኦለቴዳ ዎደ፥ ግብጼ ካትያ ናታ ደማደ ባረ ናኣዳን አ ድቻዱ።✝7:21 ከሳ 2:3-10 22 ሙሴ ግብጻቱዋ አ ኤራተ ኡባ ታማሪደ፥ ቃላንነ ኦሱዋን ዎልቃማ አሳ ግዴዳ።

23 "ሽን ሙሴዉ የለቶደፐ ላይይ ኦይታሙዋ ኩሜዳ ዎደ፥ ባረ እሻቱዋ፥ እስራኤልያ አሳቱዋ በአናዉ ባረ ዎዛናን ቆፔዳ።✝7:23-29 ከሳ 2:11-15 24 እስራኤላቱዋፐ እቱዋ ግብጼፐ እቱ ናቂሽን በኢደ፥ ሄ እስራኤልያ ማዴዳ፤ ሄ ናቄዳ ግብጼ ብታንያ ዎደ፥ አ ሀሉዋ ከሴዳ። 25 ሙሴ ባረ እሻቱዋ ባረ ባጋና ጾሳይ አሻና ሀንያዋ ኡንቱንቱ አኬኬድኖ ጊደ ቆፔዳ፤ ሽን ኡንቱንቱ አኬክበይክኖ።

26 "ዎንተ ጋላስ ላኡ እስራኤልያ አሳቱ እቱ እቱዋና ዋትያዋንታ ደሚደ፥ ኡንቱንታ ስገናዉ ኮዪደ፥ ‘አሳቶ፥ እሻቱ ህንተንቱ አያዉ እቱ እቱዋ ናቂቴ?’ ያጌዳ።

27 "ሽን ሄ ባረ ሾሩዋ ናቂያዌ ሙሳ፥ ‘ኔና ኑ ቦላ ሞድያዋነ ዳና ኦደ፥ ሱንዳዌ ኦኔ? 28 ኔን ዝኖ ግብጼ ብታንያ ዎዳዋዳን፥ ታናካ ዎናዉ ኮያይ?’ ያጊደ፥ ሙሳ ካረዉ ሱግ የጌዳ። 29 ሙሴ ሄዋ ስሴዳ ዎደ ግብጼፐ ከሲደ፥ ምድያማ ጋድያን በተ ግድ ደኢደ፥ ላኡ አቱማ ናና ያን የሌዳ።✝7:29 ከሳ 18:3-4

30 "ጎዳ ኪታንቻይ ኦይታሙ ላይፐ ጉይያን፥ ሲና ደርያ ማታን ደእያ ባዙዋ ቡራን ኤጽያ ታማ ላጩዋ ግዶን ሙሴዉ ቤቴዳ።✝7:30-34 ከሳ 3:1-10 31,32 ሙሴ ባረ በኤዳዎ ማላለቲደ፥ አኬክ ጼላናዉ ቡራ ማታን እ ሺቅ ደእሽን፥ ጎዳ ቃላይ፥ ‘ታን ነ አዎቱዋ ጾሳ፥ አብራሃመ ጾሳ፥ ይሳቃ ጾሳ፥ ያቆባ ጾሳ’ ያጊደ ሙሴኮ ዬዳ። ሙሴ ያሻ ኮኮሪደ፥ ጼላናዉ ጻልቤና።

33 "ጎዳይ ሙሳ፥ ‘ኔን ኤቄዳ ቢታይ ጌሻ ግድያ ድራዉ፥ ነ ገድያን ደእያ ጫማካ ከሳ። 34 ታን ግብጼን ደእያ ታ አሳ ዋይያ ጌሻ በኣደ፥ ቃይ ኡንቱንቱ ኦልያካ ስሳደ፥ ኡንቱንታ አሻናዉ ዎአድ። ሀእ ሃያ። ታን ኔና ግብጼ ኪታና’ ያጌዳ።

35 "ሄ ሙሳ እስራኤላቱ፤ ‘ኔና ኑና ሞድያዋነ ዳና ኦደ ሱንዳዌ ኦኔ?’ ያጊደ እጼድኖ፤ ቡራ ግዶን አዉ ቤቴዳ ኪታንቻን ሞድያዋነ አሽያዋ ግዳና ማላ፥ ጾሳይ አ ኪቴዳ።✝7:35 ከሳ 2:14 36 ሄ ሙሴ እስራኤላቱዋ ግብጼ ጋድያን ዞኦ አባንነ መላ ቢታን፥ ኦይታሙ ላይዉ ኦራባነ ማላታ ኦደ፥ ግብጼፐ ካለዳ።✝7:36 ከሳ 7:5፤ 14:21፤ ፓይ. 14:33

37 "እስራኤልያ አሳዉ፥ ‘ጾሳይ ታና ደንዳዋዳን፥ ህንተ ዛርያ ግዶፐ ታ ማላ ናብያ ህንተንቶ ደንናዋ’ ያጌዳዌ ሄ ሙሳ።✝7:37 ዛረ. 18:15፣ 18 38 እ እስራኤልያ አሳ ማባራና እትፐ መላ ቢታን ደኤዳዋ፤ እ ኑ አዎቱዋናነ ሲና ደርያ ቦላን ባረዉ ሃሳዬዳ ኪታንቻና እትፐ ደኤዳ። ያቲደ ጾሳፐ ደኡዋ ቃላ ኑዉ እማናዉ አኬዳ።✝7:38 ከሳ 19:1—20:17፤ ዛረ. 5:1-33

39 "ሙሴዉ ኑ አዎቱ አዛዘታናዉ ዶስበይክኖ፤ ሽን ገደ አ ሱግ ኦሊደ፥ ጉየ ግብጼ ስማናዉ አሞቴድኖ። 40 ቃይ አሮና፥ ‘ኑና ካለያ ጾሳቱዋ ኑዉ መ፤ አያዉ ጎፐ፥ ሀ ኑና ግብጼፐ አሄዳ ሙሴ ዋኔደንቶ ኑን ኤሮኮ’ ያጌድኖ።✝7:40 ከሳ 32:1 41 ሚዛ ማራ ማላትሲደ፥ ሄ ዎደ ኤቃ ኦድኖ፤ ሄ ኤቃዉ ያርሹዋ ያርሺደ፥ ባረንቱ ኩሺ ኦዳ ኦሱዋን ናሸቴድኖ።✝7:41 ከሳ 32:2-6 42 ሽን ጾሳይ ኡንቱንቶ ዞክያ ዛሬዳ፤ ኡንቱንቱ ሳሉዋ ጾልንትያዉ ጎይናናዳን፥ ኡንቱንታ አጌዳ፤ ናባቱዋ ማጻፋን፥

" ‘እስራኤልያ አሳቶ፥ ኦይታሙ ላይ፥

አሳይ ባይና ሳን ሹኬዳ መህያነ ያርሹዋ፥

ታዉ ያርሼድቴ?

43 ህንተንቱ ህንተንቶ ጎይናናዉ

ኦዳ ኤቃቱዋ፥ ሞሎካ ዱንካንያነ

ረፋና ግያ ህንተ ጾሳ ጾልንትያ ቶኬድታ።

ታን ህንተንታ ባብሎነፐ

ህን ባጋ የዳና’

ጌተቲደ ጻፈቴዳ።✝7:43 አሞጻ 5:25-27

44 "ሙሴ ባረ በኤዳዋ ማላትሲደ፥ ጎዳይ አዉ ኦዴዳዋዳን መዳ ማርካ ዱንካኒ ኑ አዋቶ መላ ቢታን ደኤ።✝7:44 ከሳ 25:9፣ 40 45 ቃይ ኑ አዎቱ ዱንካንያ ባረንቱ አዎቱዋፐ ካላን አኪደ፥ ጾሳይ ካሰ የደርሴዳ አይሁዳ ግደና አሳ ቢታ ኦይቄዳ ዎደ፥ ኢያሱና ገልሴድኖ፤ ሄ ዱንካኒ ዳዊተ ደእያ ዎዲ ጋካናዉካ ሄዋን ደኤዳ።✝7:45 ኢያሳ 3:14-17 46 ዳዊተ ጾሳን ሳበቴዳ፤ ቃይ ያቆባ፥ ጎዳይ ደአና ጎልያ ኬጻናዉ ጾሳ ዎሴዳ።✝7:46 2 ሳሜላ 7:1-16፤ 1 ኦዱዋ 17:1-14 47 ሽን አዉ ጎልያ ኬጼዳዌ ሶሎሞና።✝7:47 1 ካታ. 6:1-38፤ 2 ኦዱዋ 3:1-17

48-50 "ሽን ናቢ፥

" ‘ጎዳይ፥ "ሳሉ ታ ካዉተ ኦይድያ፤

ሳአይካ ታ ገዲ የያ ሳ።

ያትና፥ ታዉ አያ ማላ ጎልያ ኬጻንቴ?

ዎይ ታን ሸምፓናሳይ ሀቃኔ?

ሀ ኡባባ ታ ኩሽያን መበይክታ?" ያጌ’

ጌዳዋዳን፥ ኡባፐ ቦላ ጾሳይ አሳይ ኬጼዳ ጎልያን ደኤና።✝7:48-50 ኢሳ. 66:1-2

51 "ህንተንቱ አይበ ሞርጊ ምኖ አሴ? ህንተንቱ ዎዛናይ ጾሳ ቃላ አካናዉ አይበ ዳሜዳዌ? ህንተንቱ ሀይይካ ዋን ቱሌዴ? ኡባ ዎደ ጌሻ አያናዉ አዛዘተናን እጺታ።✝7:51 ኢሳ. 63:10 52,53 ናባቱዋን ህንተንቱ አዎቱ የደርስቤናዌ ኦኔ? ጾሳ ናአይ ጽሉ ያናዋ ካሰቲደ ኦዴዳዋንታካ ዎድኖ። ሀእ ህንተንቱካ ኪታንቻቱዋ ኩሽያፐ ጾሳ ህግያ አኪደ አዛዘትቤናዋንቱ፥ ጽሉዋ አ እሚደ ዎድታ" ያጌዳ።

54 ኡንቱንቱ ሄዋ ስሴዳ ዎደ፥ ባረንቱ ዎዛናን እስጽፋኖሳዉ ዳሮ ይሎቲደ፥ ባረንቱ መተርሻ ሳኢደ ናሴድኖ። 55 ሽን እስጽፋኖስ ባረናን ጌሻ አያናይ ኩምና፥ ሳሉዋ ፑደ ጫድ ጼሊደ፥ ጾሳ ቦንቹዋነ የሱስ ጾሳፐ ኡሸቻ ባጋን ኤቄዳዋ በኤዳ። 56 ያቲደ፥ "ጼልተ፥ ታን ሳሉ ዶየትና፥ አሳ ናአይ ጾሳፐ ኡሸቻ ባጋን ኤቄዳዋ በአይ" ያጌዳ።

57 ኮሻ ቁ ኦ ዋሲደ፥ ባረንቱ ሀይ ቱጪደ፥ እትፐ ግድ አኮ ዎጼድኖ። 58 ካታማፐ ጋጻ አ ከሲደ፥ ሹቻን ጫዴድኖ። ማርካቱካ ባረንቱ ማዩዋ ከሲደ፥ እት ሳኦላ ጌተትያ ዎዳላ ማታን ዎድኖ።

59 እስጽፋኖስ፥ "ታ ጎዳ የሱሳ፥ ታ ሸምፑዋ አካ" ያጊደ ጼግሽን፥ ኡንቱንቱ ሹቻን አ ደቺኖ። 60 ሄ ዎደ እ ጉልባቲደ፥ ባረ ኮሻ ቁ ኦደ፥ "ታ ጎዳዉ፥ ሀ ናጋራ ኡንቱንቶ አቶ ጋ" ያጌዳ። ሄዋ ጊነ ሀይቂ አጌዳ።