1 ስም ጾሳይ ሲቅያ ናናቱዋዳን፥ አ ማላትተ። 2 ቃይ ክርስቶስ ኑና ሲቂደ፥ ባረ ሁጲያ ጾሳዉ ናሸችያ ያርሹዋዳንነ እሞታ ኦደ እሜዳዋዳን፥ ህንተካ ሲቁዋን ደአናዉ በሴ።✝

3 ሽን ጾሳ ናናዉ በስያዋዳን፥ ህንተ ግዶን ዎሹምያዌነ ቱናተ ኡባይ፥ ዎይ ሚሻ አሞትያዌ ሙለካ ስሰቶፖ። 4 ዬላይያዌነ ኤያ ሃሳያይ ዎይ ፓና ቅ ህንተንቶ በሰናዋ ግድያ ድራዉ፥ ህንተ ማታን ኡባካ ደኦፖ፤ ህንተ ሄዋ ኡባ አጊደ፥ ጾሳ ጋላታናዉ በሴ። 5 ሀዋ ኤርተ፤ ኦንነ ዎሹምያዋ ዎይ ቱናባ ኦያዋ፥ ዎይ ሚሻ አሞትያዋ ግዶፐ፥ ክርስቶሳ ካዉተነ ጾሳ ካዉተ ላታናዉ ዳንዳየና፤ ሚሻ አሞትያዌ ኤቃዉ ጎይንያዋፐ ዱማተና።

6 ህንተና ኦንነ ፓና ሃሳያን ጭሞፖ፤ አያዉ ጎፐ፥ ሀዋ ጋሱዋን ጾሳ ሀንቁ አዛዘተና አሳ ቦላ ያና። 7 ስም ሄዋ ማላ አሳና ዙፐቶፕተ። 8 አያዉ ጎፐ፥ ካሰ ህንተ ማን ደኤድታ፤ ሽን ጎዳ ባጋና ሀእ ፖኡዋን ደኢታ፤ ፖኡዋን ደእያ አሳዳን ፖኡዋን ሀመትተ። 9 አያዉ ጎፐ፥ ፖኡ ሎኦተ፥ ጽሎተነ ቱማተ ኡባ አይፌ።

10 ጎዳ ናሸችያባይ አየንቶ ታማርተ። 11 ጎእ ባይና ማ ኦሱዋ ቆንጭስ በስተፐ አትን አናና ዋላከቶፕተ። 12 ኡንቱንቱ ጌማን ኦያዌ ሀራይ አቶ ሃሳይያዌካ ፖኬ። 13 ሽን ኡባባይ ፖኡዋ ከስያ ዎደ፥ ቆንጭያን ቤታና፤ አያዉ ጎፐ፥ ቆንጭያን ቤትያ ኡባባይ ፖኡዋ። 14 ሄዋ ድራዉ፥

"ገምእሽያዎ፥ ቤጎታ፤

ሀይቁዋፐካ ደንዳ፤

ክርስቶስ ነዉ ፖእሳናዋ"

ያጌ።*

15 ስም ህንተ ዋን ደእንቶ አኬክተ፤ አዳ ኤራተና ደእያ አሳዳን ደእተፐ አትን፥ አዳ ኤራተይ ባይና አሳዳን ደኦፕተ። 16 ዎዲ ኢታ ግድያ ድራዉ፥ ህንተ ዎድያ ህንተዉ ዳንዳየቶዋዳን ሎኦተዉ ጎኤትተ። 17 ሄዋ ድራዉ፥ ጎዳይ ኮይያዌ አየንቶ አኬክተፐ አትን፥ ኤያ ግዶፕተ።

18 ቃይ ህንተናን ጌሻ አያናይ ቃንጸናን ኩሞፐ አትን፥ ህንተና ባይዝያ ዎይንያ ግያ ኤሳ ኡሺደ ማቶፕተ። 19 ማዝሙርያ የን፥ ጋላቲደ የጽያዋንነ አያና የን እቱ እቱዋና ሃሳይተ፤ ቃይ ጋላትያ የንነ ማዝሙርያ የጽያዋን ህንተ ዎዛናን ጎዳ ጋላቲደ የጽተ። 20 ኑ ጎዳ የሱስ ክርስቶሳ ሱንን፥ አዉዋ ጾሳ ኡባባዉ ኡባ ዎደ ጋላትተ።

21 ክርስቶሳዉ ያዪደ፥ እቱ እቶ ሞደትተ።

22 ማቼቶ፥ ጎዳዉ ሞደትያዋዳን፥ ህንተ አስናዉ ሞደትተ። 23 አያዉ ጎፐ፥ ክርስቶስ ዎሳ ጎለዉ ሁጰ ግድያዋዳን፥ አስናይካ ባረ ማቻትዉ ሁጰ፤ ቃይ ክርስቶስ ባረ ሁጲያን፥ ባረ ቦላ ግድያ ዎሳ ጎልያ አሽያዋ። 24 ሽን ዎሳ ጎሊ ክርስቶሳዉ ሞደትያዋዳን፥ ማቼቱ ቃይ ባረንቱ አስናዉ ኡባባን ሞደታናዉ በሴ።

25 አስናቶ፥ ክርስቶስ ዎሳ ጎልያ ሲቂደ፥ ባረ ሁጲያ እዝዉ እሜዳዋዳን፥ ህንተካ ህንተ ማቻቱዋ ሲቅተ። 26 እ ዎሳ ጎልያ ባረ ቃላንነ ሃን ሜጭ ጌሺደ፥ ጾሳዉ ዱማያናዉ ሀዋ ኦዳ። 27 ክርስቶስ ዎሳ ጎልያ ቅታይ ዎይ ዴሙዋ ጭስያዌ ዎይ ሄዋ ማላትያዌ ባይናን፥ አ ኩመን ቦንቹዋና ጌሻነ ቦረተናዋ ኦደ፥ ባረ ሁጰዉ ሺሻናዉ ኮዬዳ። 28 ስም ቃይ አስናይ ባረ ማቻቶ ባረ ቦላዳን ሲቃናዉ በሴ፤ ባረ ማቻቶ ሲቅያዌ ባረና ሲቄ። 29 አያዉ ጎፐ፥ ባረ ቦላ እጽያ አሳይ ሙለካ ባዋ፤ ሽን ክርስቶስ ዎሳ ጎልያ ሙዝያዋዳንነ ናግያዋዳን ኦንነ ባረ ቦላ ሙዜነ ናጌ። 30 አያዉ ጎፐ፥ ኑን አ ቦላ ዱማ ዱማ አሳተ።

31 ጾሳ ማጻፋይ፤ "ሄዋ ድራዉ፥ አቱማዌ ባረ አዉዋነ ባረ ዳዮ አጊደ፥ ባረ ማቻትና እትፐ ደአና፤ ኡንቱንቱ ላኡካ እት አሹዋ ግዳና" ያጌ።✝ 32 ሀ ጹራይ ዎልቃማ ቱማተ፤ ሽን ታን ሀዌ ክርስቶሳባነ ዎሳ ጎልያባ ኦዴ ያጋይ። 33 ግዶፐካ፥ ቃይ አስናይ ሁጲያን ሁጲያን ማችያ ባረ ሁጲያዳን ሲቃናዉ በሴ፤ ማቻታካ ባረ አስና ቦንቻናዉ በሴ።