ጾሳይ ኑዉ አዉዋ
1 ስም ኑዉ ሀዋ ኬና ዳሮ አሳይ፥ ሻርያዳን ኑ ማታን ዩይ አደ ማርካትያዌ ደእሽን፥ ኑና ቢያ ኡባባነ ባቂ ኦይቂያ ናጋራ ድጊደ ኑ ስንን ደእያ ኑን ዎጻና ዎ ገንጪደ ዎጾይተ። 2 ኑን ኑ አማኖ ኦግያ ዶዬዳዋነ ፖልስያዋ ግዴዳ የሱሳ ጼሎይተ። የሱስ ዬላ ካደ፥ ስንፐ አዉ ደእያ ናሸቻ ድራዉ፥ ማስቃልያ ቦላ ምስማርያን ሸቲደ ሀይቃናዋ ገንጪደ፥ ጾሳ ካዉተ ኦይድያፐ ኡሸቻ ባጋና ኡቴዳ።
3 ህንተንቱ ህንተንቱ ዎዛና ባይዚደ ዳቡረና ማላ፥ ናጋራንቻቱ ባረና ዳሮ እጽናካ ገንጬዳ የሱሳ ቆፕተ። 4 ናጋራና ህንተንቱ ባጸቲደ፥ ሱ ጉሳና ጋካናዉ ብሮ ኦለት ድግበይክታ። 5 ጾሳይ ባረ ናናዳን፥ ህንተንታ ዞርያዋ ዶጌድቴ? ጾሳይ ህንተንታ፥
"ታ ናአዉ፥ ጾሳይ ኔና ሙርያ ዎደ፥ ላፋባዳን ቆፖፓ።
እ ኔና ሴርያ ዎደካ ያዮፓ።12:5-6 ኢዮባ 5:17፤ ሌም. 3:11-12
6 አያዉ ጎፐ፥ እ ባረ ሲቅያ ኡራ ሙሬ፤
ቃይ ባረ ናኣዳን አክያ ኡባካ ልሱዋን ሾጬ"
ያጌዳ። 7 ጾሳይ ህንተንታ ሙርያ ዎደ ገንጭተ። አያዉ ጎፐ፥ እ ህንተንታ ናናዳን ኦ። አዉ ሴረና ናአይ ደኢ? 8 ናና ኡባ ሴርያዋዳን፥ ህንተንታ ሙረናን አጎፐ፥ ካረን የለቴዳዋንታ ግዲታፐ አትን፥ ቱሙ ናና ግድክታ። 9 ሄዋ ቦላን ቃይ፥ ኑና የሌዳ ኑ አዎቱ ኑና ሙሬዳ ዎደ፥ ኑን ኡንቱንታ ቦንቼዶ። ያትና፥ ኑን ዋኒደ አያና አቦ ሎይ ዳርስ ሞደቲደ ደኦኮ? 10 አያዉ ጎፐ፥ ኑና የሌዳ ኑ አዎቱ ባረንታ ሎኦዋዳን፥ አማሬዳ ዎድያ ኑና ሙሬድኖ፤ ሽን ጾሳይ ኑን አ ጌሻተ አካና ማላ፥ ኑና ማዳናዉ ሙሬ። 11 ኑን ሙረትያ ዎደ፥ ሀእዉ ይሎዬ፤ ናሸቼና። ሽን ሙሬዳዋንቶ ጉየፐ ሄ ሙራይ ጽሎተ ደኡዋ ሳሮተ ዎይታ እማና።
ዞርያነ ሴራ
12 ሄዋ ድራዉ፥ ህንተንቱ አርጋጬዳ ኩሽያነ ህንተንቱ ዳቡሬዳ ጉልባታ መንተ።12:12 ኢሳ. 35:3 13 ዎቢያ ገዲ ፓጻናፐ አትን፥ ቡርቀና ማላ፥ ሱረ ኦግያን ሀመትተ።12:13 ሌም. 4:26
14 አሳ ኡባና ሳሮ ደአናዉ ምንተ፤ ቃይ ጌሻ ደኡዋ ደእተ። አያዉ ጎፐ፥ ጌሻተይ ባይናን ኦንነ ጎዳ በአናዉ ዳንዳየና። 15 ጾሳ አ ኬካተ ኦንነ አከናን አተና ማላ ናገትተ፤ ቃይ ዶላደ፥ ባረ ማርዝያን አሳ ዋይስያ ጫሞ ምዳን ሀኒደ፥ ኦንነ ዳሮ አሳ ቱንሰና ማላ ናገትተ።12:15 ዛረ. 29:18 16 ዎሹማናዉ ካጄልያ አሳይ ኦንነ ደኤና ማላ፥ ዎይ ቃይ እት ገደ ምያባዉ ባረ ባይራተ ዛልኤዳ፥ አያናባ ካዉሽስያ ኤሳ ማላ አሳይካ ደኤና ማላ ናገትተ።12:16 ዶመ 25:29-34 17 ሄዋፐ ጉይያን፥ ኤሳይ ባረ አቡ አንጁዋ አካናዉ ኮዬዳዋ ኤሪታ፤ ሽን አ አቡ አ አንጀናን እጼዳ፤ አያዉ ጎፐ፥ ናጋራፐ ስምያ ኦግያ እ ሀራይ አቶ፥ አፎጽ ኮዪደካ ደማናዉ ዳንዳይቤና።12:17 ዶመ 27:30-40
18 ህንተንቱ ቦቻናዉ ዳንዳይያ ደርያኮነ ኤጽያ ታማኮ፥ ማኮ፥ ሻርያኮነ ጎቱዋኮ፥12:18-19 ከሳ 19:16-22፤ 20:18-21፤ ዛረ. 4:11-12፤ 5:22-27 19 ቃይ ማላካታ ዋሱዋኮነ ቃላ ኮሻኮ ይበይክታ። አሳይ ሄ ኮሻ ስሴዳ ዎደ፥ ሀራ ጉጅ ስሰና ማላ ዎሴዳ። 20 አያዉ ጎፐ፥ ጾሳይ ኡንቱንታ፥ "ሀራይ አቶ፥ ዶአይካ ሄ ደርያ ቦቾፐ፥ ሹቻን ጫደቲደ ሀይቆ" ያጌዳ አዛዙዋ ኡንቱንቱ ገንጫናዉ ዳንዳይበይክኖ።12:20 ከሳ 19:12-13 21 አይፍያን ቤትያዌ ዳሮ ዳጋንያዋ ግድያ ድራዉ ሙሴ፥ "ታን ያሻን ኮኮራይ" ያጌዳ።12:21 ዛረ. 9:19
22 ሽን ህንተንቱ ጽዮነ ደርያ፥ ደኦ ጾሳይ ደእያ ካታማ፥ እትፐ ሺቂደ ናሸትያ ዳሮ ሻአ ኪታንቻቱዋኮ ሳሉዋ የሩሳላመ ዬድታ። 23 ጾሳ ባይራ ናናቱዋኮ፥ እትፐ ሺቄዳዋንቱኮ፥ ኡንቱንቱ ሱንይ ሳሉዋን ጻፈቴዳዋንቱኮ ዬድታ፤ ቃይ አሳ ኡባ ፕርድያ ጾሳኮነ፥ ባላይ ባይናዋንታ ኦዳ ጽሎ አሳቱዋ አያናቱዋኮ ዬድታ። 24 ኦራ ጫቆ ጋናትያ የሱሳነ አቤላ ሱፐ አያዋ ኦድያ ጉኬዳ ሱኮ ዬድታ።12:24 ዶመ 4:10
25 ህንተንቶ ኦድያ ኡራ የዉዋ ስስያዋ ህንተንቱ እጸና ማላ፥ ህንተንታ ናግተ። ጾሳ ኪታ ሳኣን ባረንቶ ኦድያዌ ኦድያዋ ስሰና እጼዳዋንቱ አታና ዮፐ፥ ሳሉዋን፥ "ህንተና ናግተ" ግያ ጾሳፐ ኑን ዋኒደ አታኔ?12:25 ከሳ 20:22 26 ሄ ዎደ አ ኮሻይ ሳኣ ቃዳ፤ ሽን እ ሀእ፥ "ታን ሳኣ ጻላላ ግደናን፥ እት ገደ ጉጃደ ሳሉዋካ ቃና" ያጌዳ።12:26 ሃገ 2:6 27 "እት ገደ ጉጃደ" ግያ ቃላይ ቃጸናባይ ምኒደ ደአና ማላ፥ መቴዳባይ ቃጻናዋነ ክቻናዋ ጌሺደ በሴ።
28 ኑን ቃጻናዉ ዳንዳየና ካዉተ አክያ ድራዉ፥ አነ ጾሳ ጋላቶይተነ አ ናሸቾይተ፤ አዉ በስያዋዳን ቦንቹዋንነ ያሻተን አዉ ጎይኖይተ። 29 አያዉ ጎፐ፥ ኑ ጾሳይ ቱሙ ባይዝያ ታማ።12:29 ዛረ. 4:24