ዎልቃማ አንጁዋ
1 ሄዋ ድራዉ፥ ኑን ስሴዳ ቱሙ የዉዋፐ ሱገት ዎራ ቤና ማላ፥ ሄ የዉዋ ሎይ ኦይቃናዉ በሴ። 2 አያዉ ጎፐ፥ ኪታንቻቱ ኦዴዳ ቃላይ ቱማ ግድያ ድራዉ፥ ናቂያ ዎይ አዛዘተና አሳይ ኡባይ ሙረቴዳዋ ግዶፐ፥ 3 ያትና፥ ኑን ሀ ዎልቃማ አቶተ ሸነኮ ጎፐ፥ ዋኒደ አታኔ? ጎዳይ ኮይሮ ባረ ሁጰዉ ሀ አቶተ ኦዴዳ፤ ቃይ እ ኦዴዳዋ ስሴዳዋንቱ ኑዉ ጌሺደ ኦዴድኖ። 4 ሄ ስሴዳዋንቱ ማርካቴዳዌ ቦላ ጾሳይካ ማላ፥ ኦራባነ ዱማ ዱማ ማላታ ኪተትያዋን ጉጅ ማርካቴዳ፤ ቃይ ጌሻ አያና እሙዋካ ባረ ኮዬዳዋዳን፥ ግሽ ጋዳ።
አቶተዉ ካለያዋ
5 አያዉ ጎፐ፥ ጾሳይ ኑን ሃሳይያ ስንፐ ያና አላምያ፥ ኪታንቻቱዋ ሞድስቤና። 6 ሽን ጾሳ ማጻፋይ እትሳን ሀዋዳን ያጌ፤
"ጾሳዉ፥ ኔን አሳዋ ቆፓናዉ አሳይ አዬ?
ዎይ ኔን አዉ ህርጋናዉ እ አዬ?2:6-8 ማዝ. 8:4-6
7 ኔን ኪታንቻቱዋፐ፥
አማሬዳ ዎድያ አ ጉዳ።
አ ሁጲያንካ ቦንቹዋነ፥
ሳባ ካላቻ ዎዳ።
8 ቃይ ኡባባ አ ገድያፐ ጋርሳና ዎደ
ሞድሳዳ"
ያጌ። አያዉ ጎፐ፥ ጾሳይ ኡባባካ አ ሞድሴዳዋዳን አን ሞደትቤናዌ አያይነ ባዋ፤ ሽን ሀእ ኡባባይ አዉ ሞደትያዌ ኑዉ ቤተና። 9 ሽን ኑን የሱሳ በኤቶ፤ የሱስ ጾሳ አ ኬካተ ባጋና አሳ ኡባዉ ሀይቃና ማላ፥ አማሬዳ ዎድያ ኪታንቻቱዋፐ ጋርሳ ግዴዳ። ቃይ ሀይቁዋ ዋይያ እ ዋየቴዳ ድራዉ፥ ፖእያ ቦንቹዋነ ሳባ ካላቻ ዎዳዋ ሀእ ኑን በኤቶ። 10 ጾሳይ ኡባባ መዳዌ፥ ኡባባካ ናግያዌ፥ የሱስ ዳሮ ናና አሂደ፥ ባረናና ቦንችሳና ማላ፥ ዋይያ ባጋና የሱሳ ባላይ ባይናዋ ኦዳዋ በሴ፤ አያዉ ጎፐ፥ ሄ ናና አቶተዉ ካለያዌ የሱሳ።
11 አያዉ ጎፐ፥ አሳ ጌሽያ የሱሳዉካ ቃይ ሄ ጌዬዳ አሳ ኡባዉካ አዉ እቱዋ። የሱስ ኡንቱንታ፥ "ታ እሻቱዋ" ጊደ ዬላተናን ጼስያዌ ሀዋሳ። 12 የሱስ፥
"ታን ነ ሱን ታ እሻቶ አዋያና።
ማባራ ሺቁዋንካ ኔና ጋላታና"
ያጌ።2:12 ማዝ. 22:22 13 ቃይ እ፥ "ታን ታ አማኑዋ ጾሳን ዎና" ቃይካ፥ "ጾሳይ ታዉ እሜዳ ናናቱዋና ታን ሀዋን ደአይ" ያጌ።2:13 ኢሳ. 8:17፣ 18
14 ናና ጊደ እ ጼስያዋንቱ፥ አሹዋፐነ ሱፐ መቴዳ አሳቱዋ ግድያ ድራዉ፥ የሱስ ባረ ሁጰዉ ኡንቱንታ ማላቲደ፥ ኡንቱንቱ መታ አኬዳ፤ ቃይ እ ሄዋ ኦዳዌ፥ ጻላህያ ካፑዋ ሀይቁዋ ቦላ ማታይ ደእያዋ ባረ ሀይቁዋን ይሳናሳ። 15 ቃይ ባረንቱ ደኡዋ ኡባን ሀይቆ ያዪደ፥ ሀይቆ አይለቲደ ደእያዋንታ ኡባቱዋ አይለተፐ ከሴዳ።
16 አያዉ ጎፐ፥ አብራሃማ ዛርያ እ ማድያዋፐ አትን፥ ኪታንቻቱዋ ማደናዌ ኤረቴዳ።2:16 ኢሳ. 41:8-9 17 ሄዋ ድራዉ፥ አሳ ናጋራይ አቶ ጌተታና ማላ፥ ጾሳ ኪታን አማነቴዳ ማርያ ቄሳቱዋ ኡባቱዋ ካፑዋ ግዳና ማላ፥ ኡባባን እ ባረ እሻቱዋ ማላታናዉ በሴ። 18 አያዉ ጎፐ፥ እ ባረ ሁጰዉ ፓጨቴዳ ድራዉነ ዋየቴዳ ድራዉ፥ ፓጨትያዋንታ ማዳናዉ ዳንዳዬ።