Hebreus 4

1 ስም ጾሳይ ኑና ባረ ሸምፕያ ሳ፥ "ገልሳና" ጌዳዌ ብራ ግዶፐ፥ ህንተፐ ኦንነ ሄ ሸምፕያ ሳ ገለናን አተና ማላ ናገቶ። 2 አያዉ ጎፐ፥ ኡንቱንቱ ዎንጋላ ምሽራቹዋ ስሴዳዋዳን፥ ኑንካ ስሴዶ፤ ኡንቱንቱ ስሴድኖ፥ ሽን አማኒደ አክቤና ድራዉ፥ አይነ ኡንቱንታ ጎእቤና። 3 ግዶፐካ፥ ጾሳ ኪታይ ሳአይ መቶደፐ ዶምና ፖለቴዳዋ ግዶፐነ፥ ጾሳይ፥

"ታን ሀንቀታ ጫቃደ፥

‘ኡንቱንቱ ታን ሸምፕያ ሳ

ኡባካ ገልክኖ’ ያጋድ"

ጌዳዋዳን፥ ኑን አማኔዳዋንቱ እ ሸምፕያ ሳ ገላና።✝4:3 ማዝ. 95:11 4 አያዉ ጎፐ፥ ላፑን ጋላሳባ እትሳን ጾሳ ማጻፋይ፥ "ጾሳይ ላፑን ጋላሳን ባረ ኦሱዋ ኡባፐ ሸምፔዳ" ያጌዳ።✝4:4 ዶመ 2:2 5 ቃይ ሄ ሳኣን፥ "ኡንቱንቱ ታን ሸምፕያ ሳ ኡባካ ገልክኖ" ያጌዳ።✝4:5 ማዝ. 95:11 6 ዎንጋላ ምሽራቹዋ ኮይሮ ስሴዳዋንቱ አዛዘትቤና ድራዉ፥ ሸምፑዋ ሳኣ ገልበይክኖ፤ እት እት አሳቱ ያ ገላናዋንቱ ደኢኖ። 7 ጾሳይ ዳሮ ዎድያፐ ጉይያን፥ ዳዊታ ባጋና ላኤንዋ እት ጋላሳ፥ "ሀቼ" ግያ ቃላን ኬሪደ፥

"ጾሳ ቃላ ህንተንቱ ሀቼ ስስያዋ ግዶፐ፥

ዞርያ አከናን እጾፕተ"

ያጌዳ።✝4:7 ማዝ. 95:7-8 8 ጾሳይ ሸምፕያ ሳ አሳ አፊደ ኢያሱ ሸምፕሴዳዋ ግድንቶ፥ ጾሳይ ሀራ ጋላሳዋ ጉየ ኬረና።✝4:8 ዛረ. 31:7፤ ኢያሳ 22:4 9 ሄዋ ድራዉ፥ ጾሳ አሳዉ ሳምባታ ሸምፑ ናገት ኡቴዳ። 10 አያዉ ጎፐ፥ ጾሳይ ሸምፕያ ሳ ገልያ ኦንነ፥ ጾሳይ ባረ ኦሱዋፐ ሸምፔዳዋዳን፥ እካ ባረ ኦሱዋፐ ሸምፓና።✝4:10 ዶመ 2:2 11 ስም እስራኤልያ አሳይ አዛዘተናን እጺደ፥ ጾሳና እትፐ ሸምፕያ ሳ ገለናን አቴዳዋዳን፥ ኑፐ ኦንነ ሄዋ ማላ ኤኖ ጌናን እጹዋን ያ ገለናን አተና ማላ ምኖይተ።

12 አያዉ ጎፐ፥ ጾሳ ቃላይ መናዉ ደእያዋኔ ኦያዋ፤ ላኡ ባጋና ሌፈቴዳ ማሻፐካ አደ ኩሴ። ሄ ቃላይ ሸምፑነ አያናይ፥ ኩሪነ ኮልዚ እትፐ ጋከትያሳ ሻካና ጋካናዉ ጫዴ። ቃይ አሳ ዎዛናን ደእያ ኮሻነ ቆፋ እ ሻኬ። 13 ኑን ኦያዋ ዎችያ ጾሳ ስንን ኡባባይካ ቤትያዋፐነ ቆንጭያን ደእያዋፐ አትን፥ አ አይፍያን ጌምያ መታይ አያይነ ባዋ።

የሱስ ቄሳቱዋ ኡባቶ ዎልቃማ ካፑዋ

14 ስም ሳሉዋ ቤዳ፥ ቄሳቱዋ ኡባቱዋ ዎልቃማ ካፑ፥ ጾሳ ናአይ የሱስ፥ ኑዉ ደእያ ድራዉ፥ ኑ አማኑዋ ሎይ ናጌቶ። 15 አያዉ ጎፐ፥ ኑ ቄሳቱዋ ኡባቱዋ ካፑ ኑን ዳቡርያ ዎደ ኑዉ ቃረታናዉ ዳንዳዬ፤ ናጋራ እ ኦቤናዋፐ አትን፥ ኑናዳን ኡባባንካ ፓጨቴዳ። 16 ስም ኑና ኮሽያ ዎደ ማድያ ማሮተ አካናዉነ አ ኬካተ ደማናዉ፥ አ ኬካተይ ደእያ ሳኣ ጾሳ አራታኮ፥ ያየናን ሺቆይተ።