ጾሳይ እሜዳ ማሮታን ዮናሳ ሀንቁዋ
(4:1-11)
1 ሽን ሄዌ ዮናሳ ኡባካ ናሸችቤና። ሄዋ ግሻዉ፥ እ ሎይ ሀንቀቴዳ፤ 2 መና ጎዳ ሀዋዳን ያጊደ ዎሴዳ፤ "አቤት መና ጎዳዉ፥ ታን ብሮ ታ ጋደን ደኣደ ጌዳዌ ሀዋ ግደኔ? ታን ነ ስንፐ ባቃታደ ታርሴሰ ባናዉ ኤሌሌዳዌ ሀዋሳ። ኔን ቃረታይነ ማሮተይ ኩሜዳ ጾሳ ግድያዋ፥ ሀንቆ ኤሌለናዋነ አገና ሲቁዋን ኩሜዳዋ፥ ቃይ አሀና ጌዳ ኢታባካ አግያ ጾሳ ግድያዋ ታን ካሰካ ኤራድ።4:2 ከሳ 34:6 3 አቤት መና ጎዳዉ፥ ሀእ ስም ሀይ ሀያና ታና ዎ፤ ፓጻ ደእያዋፐ ሀይቂያዌ ታዉ ሎአ" ያጌዳ።4:3 1 ካታ. 19:4
4 መና ጎዳይ አ ሀዋዳን ያጌዳ፤ "ቱሙ ኔን ሀዎ ሀንቀታናዉ በሲ?" ያጌዳ።
5 ዮናስ ካታማፐ ከሲደ ቤዳ፤ ቢደ ካታማፐ አዋይ ዶልያ ባጋን ኡቴዳ። ሄዋን ባረዉ ዳስያ ዳሴዳ፥ አ ኩዋን ኡቲደ፥ ካታማ ቦላ ጋክያዋ በአናዉ ናጌዳ። 6 አዋ ሱሉዋፐ ዮናሳ አሻና ማላ፥ መና ጎዳይ ጾሳይ እት ጎስያ ዶልሲደ ጊግሴዳ፤ ሄ ጎስያ ሀይይካ ዮናሳ ሁጲያፐ ቦላ ባጋና ኩዋ ግዳናዳን ኦዳ። ዮናስ ሄ ጎስያ ጋሱዋን ሎይ ናሸቴዳ። 7 ሽን ዎንተ ጋላስ ዎንታ ጾሳይ ጉጹንያ ጊግሴዳ፤ ሄ ጉጹኒ ጎስያ ሞዋን፥ ጎሲ መል አጌዳ። 8 አዋይ ከሶ ዎደ፥ ጾሳይ ምችያ ጫርኩዋ አዋይ ዶልያ ባጋፐ የዴዳ፤ ሄዋፐ ደንደዳዋን ዮናስ ላባናና ጋካናዉ፥ አዋይ ዮናሳ ሁጲያ ጹጌዳ። ያትና እ፥ "ፓጻ ደእያዋፐ ሀይቂያዌ ታዉ ሎአ" ያጊደ ሀይቃናዉ ዎሴዳ።
9 ጾሳይ ዮናሳ ሀዋዳን ያጌዳ፤ "ቱሙ ኔን ሀ ጎስያ ግሻዉ ሀንቀታናዉ በሲ?" ያጌዳ።
ዮናስ፥ "ኤ በሰ፤ ኡባ ሀይቃና ጋካናዉ ሀንቀታናዉ በሰ" ያጌዳ።
10 መና ጎዳይ ዮናሳ ሀዋዳን ያጌዳ፤ "እት ቃማን ዶላደ፥ ላኤን ቃማ መሌዳ ጎስያዉ፥ ኔን አን ዳቡራቤናባዉነ ድቻቤናባዉ ሀዋ ኬሻ ቃረታዳ። 11 ኡሸቻነ ሀድርሳ ሻክ ኤርቤና ጼታነ ላታሙ ሻአ አሳይነ ዳሮ መሂ ናናዌን ደኤ። ያትና ታን ሀ ዎልቃማ ካታማዉ ቃረታናዉ በሰኔ?" ያጌዳ።