ሚክያሳ 1

ጎዳይ ባረ አሳ ሙራና

1 እዮኣታም፥ አካዝነ ህዝቂያስ ካል ካሊደ ይሁዳን ካተቴዳ ዎደ፥ ሞረሸታ ካታማ አሳ ግድያ ሚክያሳኮ ዬዳ መና ጎዳ ቃላይ ሀዋ፤ እ በኤዳ ሳጻይ ሳማርያዋነ የሩሳላመባ።✝1:1 2 ካታ. 15:32—16:20፤ 18:1—20:21፤ 2 ኦዱዋ 27:1-7፤ 28:1—32:33

2 ህንተኖ፥ አሳዉ ኡባዉ፥ ስስተ! ቃይ ሳአዉነ ሳኣን ደእያ ኡባ ገደ፥ ሀዋ ስስተ! ኡባ ሞድያ መና ጎዳይ ህንተ ቦላ ማርካቴ፤ እ ባረ ጌሻ ጌሻ ጎልያን ህንተዋ ሃሳየ። 3 በእተ፥ መና ጎዳይ ባረ ደእያ ጌሻ ሳኣፐ ዬ፤ ዱገ ዪደ፥ ደረቱዋ ሁጲያን ሀመቴ። 4 ኤሳ ሙቃዳይ ታማን ሴርያዋዳን፥ ደረቱ አ ገድያፐ ጋርሳና ሲላና፤ ኡንቱንቱ ደርያፐ ዛንጋራይ ዱገ ጎግያ ሃዳን ጎጋና።

5 ሀዌ ኡባይ ሀንያዌ ያቆባ ዛራቱዋ ባይዙዋ ግሻሳነ እስራኤልያ አሳ ናጋራ ግሻሳ። ያቆባ ዛራቱዋ ባይዞ ጋሱዋ ግዴዳዌ ኦኔ? ኡንቱንቱ ካታማ ሳማርያ ግደኔ? ይሁዳ አሳይ ጎይንያ ቃ ሳአይ ሀቄ? የሩሳላመ ግደኔየ? 6 ሄዋ ድራዉ፥ ጾሳይ ሀዋዳን ያጌ፤ "ታን ሳማርያ፥ ደምባን ኬለቴዳ ቡርጨ ሹቻነ ዎይንያ ቱራ ቶክያ ሳ ኦና። ቃይ ታን አ ሹቻ ቡርጭያ ዱገ ዛንጋራዉ ኦላና፤ አ ባሱዋካ ካሎያና። 7 አ ኤቃ ምስለቱ ኡባይ ክንቼታና፤ አ ኤቃ ጎልያን ኦያ ሻርሙጻቶ እመቴዳ ሻርሙጻ የዉ ኡባይ ታማን ጹገታናዋ፤ ታን አ ኤቃቱዋ ኡባ ይሳና። አያዉ ጎፐ፥ ሄ የዉ ኡባይካ ሻርሙጺደ ደሜዳዋ ግድያ ድራዉ፥ እካ ቃይ ስሚደ፥ ሀራ ሻርሙጻዉ እመታና" ያጌ።

ዬኩዋነ ዋሱዋ

8 ሄዋ ድራዉ፥ ታን ዬካናነ ዋሳና፤ ካሎ ጺራነ መላ ገድያን ሀመታና፤ ዎራካናዳን ዋሳና፤ ቃይ ሶጎንያዳንካ አየ ጋና። 9 አያዉ ጎፐ፥ ሳማርያ ማዱይ ፓጻናዉ ዳንዳየናዋ። ሄ ቱጋይ ይሁዳ ጋድያ ጋኬዳ፤ ቃይ ታ አሳይ ደእያ የሩሳላመ ካታማ ፐንግያካ ማቴዳ።

10 ጋተ ካታማን ደእያ ኑ ሞርከቶ ሄዋ ኦዶፕተ፤ ኡንቱንቱ ስንን ሙለ ዬኮፕተ። ቤት-ኦፍራ ካታማን ባናን ጎንዶረትተ። 11 ህንተኖ፥ ሻፊራ ካታማን ደእያዋንቶ፥ ካሎቲደ ዬላቲደ፥ ኦሞዶ ቢተ። ጻእናና ካታማን ደእያዋንቱ ያፐ ከሳናዉ ጻልክኖ። ቤት-ኤጼላ ካታማይ ዬኩ ደኢያሳ ግድያ ድራዉ፥ እ ህንተንቶ አትያሳ ግዳናዉ ዳንዳየና። 12 መቱ መና ጎዳፐ የሩሳላመ ፐንገ ጋካናዉ ዬዳ ድራዉ፥ ማሮታን ደእያ አሳይ፥ "ሎኦባይ ያንዴሻ!" ጊደ ናጊደ ዳቡሬዳ።

13 ህንተኖ፥ ላክሻ ካታማን ደእያዋንቶ፥ ጋርያ ጎችያ ፓራቱዋ ዋጽተ። የሩሳላመ አሳይ ናጋራ ኦናዳን ጋሱዋ ግዴዳዌ ህንተና፤ አያዉ ጎፐ፥ ጽዮነ አሳ ናጋራይ ኮይሮ ህንተ ቦላ ቤቴዳ። 14 ሄዋ ድራዉ፥ ህንተኖ ይሁዳ አሳቶ፥ ህንተ ቢደ፥ ሞረሸታ-ጋተ ካታማ አሳዉ እሞታ እማና። አክዚባ ካታማ አሳይካ እስራኤልያ ካተቱዋ ጭምያዋንታ ግዳና።

15 ህንተኖ፥ ማሬሻ ካታማን ደእያዋንቶ፥ መና ጎዳይ ህንተና ጾንያዋ ህንተ ቦላ አሀና፤ ቦንቼቴዳ እስራኤልያ ካለያዋንቱ አዱላማ ጎንጎሉዋን ቆሰታና። 16 ህንተኖ፥ ይሁዳ አሳቶ፥ ህንተ ሲቅያ ናናይ ህንተፐ ኦሞደቲደ ባናዉ ደእያ ድራዉ፥ ህንተ ሁጲያ ሜደትተ፤ ህንተ ሁጲያካ አንኩዋ ሁጲያዳን ቦአይተ።