ሚክያሳ 2

ህዬሳቱዋ ኡቁንያዋንቱ ቦላን ጋካናዉ ደእያ ኢታ ካጫ

1 ኢታባ ሀልችያዋንቶ፥ ቃይ ባረንቱ ሂጻን ደኢደ፥ ኢታባ ዎት ኦነንቶ ቆፕያዋንቶ አየ አና! ዎልቃይ ኡንቱንቱ ኩሽያን ደእያ ድራዉ፥ ሳአይ ዎንትያ ዎደ፥ ባረንቱ ሀልቹዋ ፖሊኖ። 2 ኡንቱንቱ ጎሻ ጋድያ አሞቶፐ፥ አሳዋ ዎልቃን አክ አጊኖ፤ ጎለቱዋ ኮዮፐካ አክ አጊኖ። አሳ ማታ የደ፥ አ ላታ ጮ ቦንቂኖ።

3 ሄዋ ድራዉ፥ መና ጎዳይ ሀዋዳን ያጌ፤ "በእተ፥ ታን ህንተ ቦላን ኢታባ አሀናዉ ሀልቻይ፤ ሄዋፐ ህንተ ከስ አካናዉ ዳንዳይክታ። ሄዌ ኢታ ዎደ ግድያ ድራዉ፥ ህንተ ኦቶረቲደ ስመረታናዉ ዳንዳይክታ። 4 ሄ ጋላስ ኡንቱንቱ ህንተ ቦላን ሌምስ ሌምሲደ ቅሊጫና፤ ቃይ ሀዋዳን ያግ ዝላሊደ፥ ህንተና ህዶታ ቃንጽሳና፤

"ኑን ኡባይካ ኡባና ዬዶ።

መና ጎዳይ ኑ ጋድያ አኪደ፥

ማካላንቻቶ ግሽ ግሺደ፥

እም ድጌዳ ያጋና" ያጌ።

5 ሄዋ ድራዉ፥ ጋድያ ኤጻን ግሽያ ዎደ፥ መና ጎዳ ሺቁዋ ግዶን ነ ሳማ ከስያ እት አሳይነ ደኤና።

6 አሳይ ታና ሀዋዳን ያጌ፤ "ኑ ቦላ ትምቢትያ ኦዶፓ። ‘ሀዌ ሀዌ ህንተ ቦላ ሀናና’ ጊደ ኦንነ ሃሳያናዉ ኮሸና። ሄዋ ማላ ካዉሻይ ኑ ቦላ ሙለካ ዬና" ያጊኖ።

7 ታን ኡንቱንታ፥ "ህንተኖ ያቆባ ዛረቶ፥ ‘መና ጎዳ አያናይ ዳንዳያንቻ ግደኔየ? እ ሄዋ ማላባ ኦየ?’ ያጊደ ህንተ ኦቻናዉ በሲ?" ያጋድ።

ጾሳይ ሀዋዳን ያጌ፤ "ሱረ ኦግያን ብያዋንቶ ታ ቃላይ ሎኦባ ኦ ግደኔ? 8 ሽን ማታ ዎድያፐ ዶሚደ፥ ታ አሳይ እቱ እቱዋ ቦላ ሞርክያዳን ደንዴዳ። ህንተ ሳሮ አሳቱዋ ማዩዋ፥ ኦላ ቆፋይ ሙለካ ባይናን አማነቲደ አያ አሳቱዋ ማዩዋ ቃር አኪታ፤ 9 ታ አሳ ግዶን ደእያ ማጫ አሳቱዋ ኡንቱንቱ ሎኦ ጎልያፐ ላግ ከሲታ፤ ታ አንጁዋካ ኡንቱንቱ ናናቱ ቦላፐ መናዉ አክ ድጊታ። 10 ደንዲደ ቢተ! ሀዌ ህንተንቶ ሸምፕያ ሳ ግደና። አያዉ ጎፐ፥ ሀ ሳአይ ቱናተፐ ደንዴዳዋን ዳሮ ባዬዳ።

11 "እት ጭምያ ዎርዳንቻይ ዪደ፥ ‘ህንተዉ ስንፐ ዎይንያ ኤሳይነ ማይያ ኡሻይ ጉፈታና’ ያጊደ ዎርዱዋ ትምቢትያ ኦድንቶ፥ እ ህንተንቶ ትምቢትያ ኦድያዋ ግዳና።

ስን ህዶታ

12 "ህንተኖ፥ ያቆባ ዛረቶ፥ ታን ህንተና ኡባካ ሺሻና፤ ታን እስራኤልያ አሳፐ አቴዳዋንታ ቱሙዋፐ ኡባካ ሺሻና። ዶርሳቱ ካሉዋን ሺቅያዋዳንነ ዶርሳ ዉዲ ሄን ጋደን ሺቅያዋዳን፥ ታን ኡንቱንታ እትፐ ሺሻደ ዎና። ሄ ሳአይ ዳሮ አሳ ሻባረቱሳን ኩማና። 13 ኡንቱንታ ከስያዌ ኡንቱንቱፐ ስንቲደ ከሳና፤ ኡንቱንቱካ ፐንግያ መንደ፥ ሄዋና ከሲደ ባና። መና ጎዳይ ባረ ሁጲያን ኡንቱንቶ ካትያ ግዲደ፥ ኡንቱንታ ስንዉ አደ፥ ኡንቱንታ ካለና" ያጌ።