ኦራ እስራኤላትን ኦራ ጌሻ ጎልያ
(ሆሰ 4:1—5:15)
1 ዉርሰ ጋላሳቱዋን መና ጎዳ ጌሻ ጎልያ ኬጸቴዳ ደሪ ደረቱዋ ኡባፐ ቂደ ቤታና፤ ከራ ኡባቱዋፐካ ቦላና ቁ ቁ ጋና። ጋድያ አሳይ አኮ ዛታና። 2 ዳሮ ካዉተቱዋ አሳይ ዪደ፥ "ሃይተ፤ መና ጎዳ ደርያ፥ ያቆባ ጾሳ ጌሻ ጎልያ አነ ፑደ ከሶይተ። እ ኮይያዋዳን ኑን ባና ማላ፥ እ ኑና ባረ ኦግያ ታማርሳና" ያጋና። አያዉ ጎፐ፥ ህጊ ጽዮነፐ፥ መና ጎዳ ቃላይካ የሩሳላመፐ ከሳና። 3 እ ዳሮ አሳቱ ግዱዋን ፕርዳና፤4:3 ኢዩ. 3:10 ሃኩዋን ደእያ ምኖ ካዉተቱዋ ፓሉምያካ ሻካና። ኡንቱንቱ ባረንቱ ማሻ ማራሻ፥ ባረንቱ ቶራካ ባጫ ከሳናዉ ቆጻና፤ ካተተይ ካዉተ ቦላ ማሻ ደንና። ሀዋፐ ጉይያን፥ ኡንቱንቱ ኡባና ኦላ ትምርትያ ታማርክኖ። 4 ሽን አሳይ ኡባይ ባረ ዎይንያ ቱራ ኩዋንነ ባላስያ ኩዋን ዎፑ ጊደ ኡታና፤4:4 ሶፎ. 3:10 አይ አሳይነ ኡንቱንታ ያሽሰና። አያዉ ጎፐ፥ ኡባፐ ዎልቃማ መና ጎዳይ ሀዋ ሃሳዬዳ።
5 አሳይ ኡባይ ባረ መና ጎዳ ጾሳ ሱንን ሀመታና፤ ሽን ኑን መና ጎዳ ኑ ጾሳ ሱንን መፐ መናዉ ሀመታና።
እስራኤልያ አሳይ ኦሞዱዋፐ ስማና
6 መና ጎዳይ ሀዋዳን ያጌ፤ "ሄ ጋላስ ታን ዎባቱዋ ሺሻና፤ ቃይ ኦሞዱዋን ሃኮ ሳኣ ቤዳዋንታነ ታን ቱጋዬዳዋንታካ ሺሻና። 7 ታን ዎባቱዋ ዉሪደ አቴዳ አቶዋንታ ኦና፤ ቃይ ኦሞዱዋን ሃኮ ሳኣ ቤዳዋንታካ ምኖ ካዉተ ከሳና። ሄ ዎድያፐ ዶማደ መና ጋካናዉ፥ ታን መና ጎዳይ ጽዮነ ደርያን ኡንቱንቱ ቦላ ካተታና" ያጌ።
8 ኔኖ፥ መና ጎዳ አሳ ዎችያ የሩሳላመ ቃ ግምቢያዉ፥ ነዉ ካሰ ነ ሞድያ ማታይ፥ ቃይ የሩሳላመ ካዉተ ዛዋይ ኡባይካ ስማና።
9 ሀእ ኔን ኮሻ ቁ ኦደ ዋስያዌነ የሉ ኦይቄዳ ምሽራቲዳን ኡንኤያዌ አያሴ? ነዉ ካቲ ባይና ግሻሴየ? ዎይ ኔና ዞርያዌ ዬዳ ድራሴ? 10 ህንተኖ፥ ጽዮነ አሳቶ፥ የሉ ኦይቄዳ ምሽራቲዳን ኦሊደ ጎንዶረትተ። አያዉ ጎፐ፥ ህንተ ካታማፐ ከስያዌ አተና፤ ከሲደ ደምባን ደአና፤ ሄዋፐካ ባብሎነ ባና። ግዶፐነ፥ ያን ህንተ አታና፤ መና ጎዳይ ህንተና ህንተ ሞርከቱዋ ኩሽያፐ ዎዛና።
11 ሽን ሀእ ዳሮ ካዉተቱ ነ ቦላ ሺቄድኖ፤ ሺቂደ፥ "የሩሳላመ ቱኖ፤ ኑ አይፊካ ጽዮነ ደረቆ" ያጊኖ። 12 ሽን ኡንቱንቱ መና ጎዳ ቆፋ ኤርክኖ፤ አ ሀልቹዋካ አኬክክኖ። ካ ቡክያ ኡዱማዉ ሺሼዳ ምርቂያዳን፥ መና ጎዳይ ኡንቱንታ ሙራናዉ ሺሼዳ።
13 ህንተኖ፥ የሩሳላመ አሳቶ፥ ደንድተ፤ ደንዲደ፥ ህንተ ሞርከቱዋ ቆጽተ። ታን ህንተ ካጭያ ብራታ፥ ህንተ ቅንጫፍልያካ ናሃሰ ኦና። ህንተ ዳሮ ካዉተቱዋ ክንቼሬና፤ ኡንቱንቱ ሱገን ሺሼዳባ ኡባ ህንተ መና ጎዳዉ ዱማያና፤ ህንተ፥ ኡንቱንቱ አቁዋካ ሳኣ ኡባ ጎዳዉ እማና ያጌ።