ሚክያሳ 6

እስራኤልያ ናቁ ቆንጩሳ

1 መና ጎዳይ እስራኤልያ አሳና ሞተትያዋ ስስተ።

"ደንዳ! ደንዳደ ቃ ደረቱዋ ስንን ፕርደታ፤ ኔን ግያዋ ደረቱካ ስስኖ። 2 ህንተኖ ደረቶ፥ ህንተኖ፥ ሳአይ ኤቄዳ ምኖ ባሶቶ፥ መና ጎዳይ ሞትያ ሞቱዋ ስስተ። መና ጎዳይ ባረ አሳና ሞተቴ፤ እስራኤልያ አሳና እ ፓሉመቴ።"

3 መና ጎዳይ ኡንቱንታ ሀዋዳን ያጌ፤ "ታ አሳዉ፥ ታን ህንተና ዋታድታ? ታን ህንተንቶ ዋናደ ቶኩዋ ግዳድታ? አነ ታዉ ኦድተ! 4 ታን ህንተና ግብጼ ጋድያፐ ከሳድ፤ ቃይ ህንተና አይለተፐ ዎዛድ። ህንተና ካለና ማላ ሙሳ፥ አሮናነ ሚርያሞ ህንተዉ ኪታድ።✝6:4 ከሳ 4:10-16፤ 12:50-51፤ 15:20 5 ታ አሳዉ፥ ሞኣባ ካትያ ባላቅ ሀልቼዳዋነ ብኦራ ናአይ ባላም አዉ ዛሬዳዋ ሀሳያ። ሺጽማ ግያ ሳፐ ገልጋል ኔን ብያ ዎደ፥ ኦግያን ሀኔዳዋ አነ ሀሳያ። ሄዋ ሀሳዮፐ፥ ታን መና ጎዳይ ኔና አሻናዉ ኦዳ ኦሱዋ ኔን አኬካና" ያጌ።✝6:5 ፓይ. 22:2—24:25፤ ኢያሳ 3:1—4:19

መና ጎዳይ ባረ አሳፐ ኮይያዋ

6 መና ጎዳ፥ ቃ ሳኣን ደእያ ጾሳ ስንን ጎይናናዉ ያደ ታን አያ አካደ ሺቆ? አዉ ጹገትያ ያርሹዋ ግዳና ማላ፥ እት ላይ ግዴዳ ኮሩማቱዋ አካደ፥ አ ስን ዮሻ? 7 መና ጎዳይ ሻአ ዶርሳ ኦርገቱዋን ዎይ ታሙ ሻአ ሻፋቱዋን ደእያ ሃ ኬሻ ዎጋራ ዛይትያን ናሸታንዴ? ታ ናቁዋ ድራዉ፥ ታ ባይራ ናኣ፥ ታ ሸምፑዋ ናጋራ ግሻዉካ ታ የሉዋ እሞሻ?

8 ሀይ አሳዉ፥ መና ጎዳይ ነዉ ሎኦባ ኦድ ዎዳቴ። መና ጎዳይ ኔፐ ኮይያዌ አዬ ጎፐ፥ ኔን ሱረባ ኦናዋ፥ አገና ሲቁዋ በሳናዋነ አሽከተን ነ ጾሳና ሀመታናዋ።

9 መና ጎዳዉ ያይያዌ አዳ ኤራተ። የሩሳላመ ካታማ አሳ ጾሳይ ሀዋዳን ያጌ፤ "ሙራና ጋትማነ ሄ ጋትማ ጊግሴዳዌካ ኦነንቶ አኬክተ። 10 ናጋራንቻ ጎልያን ደእያ ናጋራን ሺሼዳ ሻሉዋነ ታ እጽያ ዎርዶ ማክያ ሚሻቱዋ ታን ዶጋኔየ? 11 ያትና፥ ሀ ዎርዶ ሚዛናን ልክያዋነ ዎርዶ ሚሻን ማክያ አሳ ናጋራ ታን ዋታደ አቶ ጋናዉ ዳንዳያይታ? 12 ሄ ካታማ ዱረቱ ማካላን ኩሜዳዋንታ፤ አን ደእያ አሳይ ኡባይ ዎርዱዋ። ኡንቱንቱ ዶና ግዶን ደእያ ኡንቱንቱ እንጻርሳይካ ባረ ሁጲያዉ ጌላ።

13 "ሄዋ ድራዉ፥ ታን ህንተ ናጋራ ጋሱዋን ህንተና ይሳናዉነ ድጋናዉ ደንዳድ። 14 ህንተ ማና፥ ሽን ካልክታ፤ ናፍሳይካ ህንተፐ ዱጸና። ህንተ ቡሪደ ሺሻና፥ ሽን ህንተንቶ ዳጋተና፤ ህንተ ዳጋዬዳዋካ ታን ኦላ የዳደ ይሳና። 15 ህንተ ካ ዘራና፥ ሽን ጋክና ጫክክታ፤ ዎጋራ ቴራ ጉምአና፥ ሽን ሄ ዛይትያ ኦከትክታ፤ ዎይንያ ቴራካ ህንተ ጉምአና፥ ሽን አ ኤሳ ኡሽክታ። 16 ህንተ ካትያ ኦምራ ዎጋ፥ አ ናኣ ካትያ አካባ ጎለ ኢታ ኦሱዋነ ኡንቱንቱ ዞርያ ካሌዳ ድራዉ፥ ታን ህንተና ይሳና፤ ታን ህንተና አሳይ ኡባይ ቦርያባ ኦና። አሳይ ኡባይ ህንተና ሸቂያ ሸቃካ ህንተ ቶካና" ያጌ።✝6:16 1 ካታ. 16:23-34፤ 21:25-26