1 ኡንቱንቱ የሩሳላመ ማቲደ፥ ደብረ ዛይተ ደርያ ማታን ደእያ ቤተፋገነ ቢታንያ ጋኬድኖ፤ የሱስ ባረና ካልያዋንቱፐ ላኡዋ ስንዉ ኪቲደ፥ 2 "ህንተንቱፐ ስንን ደእያ ሄራ ቢተ፤ ያ ገሎሳና ኦንነ ኡባ ቶግቤና ቃሹዋን ደእያ ሀረ ማራ ህንተ ደማና፤ አ ብል ሃ አኪደ ዪተ። 3 ኦንነ ህንተንታ፥ ‘ሄዋ አያዉ ኦተ?’ ያጊደ ኦቾፐ፥ ‘ጎዳዉ*11:3 ጎዳ፦ ሀዋ ጉሳይ ሀርያ ጎዳ። ሀዌ ኮሼ፤ ኤለካ ዛር ሃ የዳናዋ’ ያግተ" ያጌዳ።

4 ኡንቱንቱ ቢደ፥ ሀረ ማራ ፐንግያ ማታን ኦግያን ቃች ዎዳዋ ደሚደ ብሌድኖ። 5 ሄዋን ኤቄዳ እት እት አሳቱ ኡንቱንታ፥ "ሀረ ማራ ዎታናዉ ብሊቴ?" ያጌድኖ። 6 የሱሳ ካልያዋንቱ የሱስ ባረንታ አዛዜዳዋ ኦድና፥ አሳቱ የድ አጌድኖ። 7 ኡንቱንቱ ሀረ ማራ የሱሳኮ አሂደ፥ ባረንቱ ማዩዋ አ ዞክያን ዎድኖ፤ የሱስ ሄ ሀረ ማራ ቶጌዳ። 8 ጮራ አሳይ ባረንቱ ማዩዋ ኦግያን ሂጼዳ፤ ቃይ ሀራንቱ ም ሀይ ካር ካሪደ፥ ኦግያን ሂጼድኖ። 9 የሱሳፐ ስንና ሀመትያ አሳይነ አ ጌዱዋ ካልያ አሳይ ባረንቱ ኮሻ ቁ ኦደ፥

"ጾሳይ ጋላተቶ!

ጎዳ ሱንን ይያዌ አንጀቴዳዋ።✝11:9 ማዝ. 118:25-26

10 ጎዳ ሱንን ይያ ኑ አዉዋ

ዳዊተ ካዉተይ አንጀቴዳዋ።

ሳሉዋ ኡባፐ ቦላ ሳሉዋን

ደእያ ጾሳይ ጋላተቶ"

ያጌድኖ።

11 የሱስ የሩሳላመ ቢደ፥ ጌሻ ጎልያ ገሌዳ፤ ቃይ ኡባባ ዩይ ዩይ ጼሌዳዋፐ ጉይያን፥ ሳአይ ቃምያ ድራዉ፥ ታማነ ላኡ የሱሳ ካልያዋንቱና ቢታንያ ቤዳ።

12 ዎንተ ጋላስ ኡንቱንቱ ቢታንያፐ ከሲደ ቢሽን፥ የሱስ ኮሻቴዳ። 13 ሃኩዋን እት ባላስያ ግያ ምቶ ሀይ ማያ ኡቴዳዉኖ በኢደ፥ ኦን ኤር እ ቦላ አይፊ ቤቶፐነ ጊደ፥ በአናዉ እዝኮ ቤዳ፤ ሽን እዝኮ እ ብያ ዎደ፥ ሀይ ጻላላፐ አትን፥ አይነ አይፍያ ደምቤና፤ አያዉ ጎፐ፥ ባላሲ አይፍያ ዎዲ ጋክቤና። 14 የሱስ ሄ ባላሳቶ፥ "ኔፐ ሽረቲደ መናዉ ኦንነ አይፍያ ሞፖ" ያጌዳ። የሱሳ ካልያዋንቱ እ ግያዋ ስሴድኖ።

15 ኡንቱንቱ የሩሳላመ ቤድኖ፤ የሱስ ጌሻ ጎልያ ገሊደ፥ ሄዋን ዛልእያዋንታነ ሻምያዋንታ ካረ የደርሱዋ ዶሜዳ፤ ቃይ ሚሻ ላምያዋንቱ ጻራጴዛነ ዶጎሙዋ ዛልእያዋንቱ ኦይድያ አ የጊደ፥ 16 ኦንነ አየንቶ ቶኪደ፥ ጌሻ ጎልያ ግቢያ ግዶና አናዋ ድጌዳ። 17 የሱስ አሳ ሀዋዳን ያጊደ ታማርሴዳ: "ጾሳ ማጻፋን፥ ‘ታ ጎሊ አይሁዳ ግደና አሳይ ኡባይ ጾሳ ዎስያ ጎለ ጌተታና’ ያገቲደ ጻፌት ኡቴዳ፤ ሽን ህንተ አ ቦንቃንቻቱ ቆሰትያ ጎንጎሉዋ ከሴድታ።"✝11:17 ኢሳ. 56:7፤ ኤር. 7:11

18 ቄሳቱዋ ካፓቱነ ሙሴ ህግያ ታማርስያዋንቱ ሄዋ ስሲደ፥ አ ዎና ኦግያ ኮሻ ዶሜድኖ፤ ሽን ጮራ አሳይ እ ታማርስያዋን ማላለትያ ድራዉ፥ አዉ ያዬድኖ።

19 ሳአይ ኦማርሴዳ ዎደ፥ የሱስነ አ ካልያዋንቱ ካታማፐ ጋጻ ከሴድኖ።

20 ኡንቱንቱ ዎንተ ጋላስ ጉራ ኦግያና አደ፥ ሄ ባላሳታ ጻጱዋና መላ ድጌዳዉኖ በኤድኖ። 21 ጰጽሮስ ሀሳዪደ፥ "ታማርስያዎ፥ በአ፤ ኔን ሸቄዳ ባላሳታ መላ ድጋዱ" ያጌዳ።

22 የሱስ ዛሪደ፥ ኡንቱንታ ሀዋዳን ያጌዳ፤ "ጾሳ አማንተ። 23 ታን ህንተንቶ ቱሙዋ ጋይ፤ ኦንነ ባረ ዎዛናን ስናን ባረ ጌዳባይ ሀናናዋ አማኒደ፥ ሀ ደርያ፥ ‘ደንዳደ አባን ኩንዳ’ ጎፐ ሀናና። 24 ሄዋ ድራዉ፥ ጾሳ ህንተ ዎስያባነ ኦችያባ ኡባ አክ ድጎዋዳን አማንተ፤ ህንተ አካና። 25 ጾሳ ዎሳናዉ ህንተ ኤቂያ ዎደ፥ ሳሉዋን ደእያ ህንተ አዉ ህንተ ናጋራ አቶ ጋና ማላ፥ ኦንነ ህንተንታ ናቄዳባይ ደኦፐ፥ አዉ አቶ ጊተ። 26 ሽን አሳ ናጋራ ህንተ አቶ ጋና ዮፐ፥ ሳሉዋን ደእያ ህንተ አዉካ ህንተ ናጋራ ህንተንቶ አቶ ጌና።"

27 ኡንቱንቱ ቃይካ የሩሳላመ ቤድኖ፤ የሱስ ጌሻ ጎልያን ሀመትሽን፥ ቄሳቱዋ ካፓቱ፥ ሙሴ ህግያ ታማርስያዋንቱነ ጭማቱ የሱሳኮ ዬድኖ። 28 አ፥ "ኔን ሀዋ ኦናዉ ነዉ አይ ማታይ ደኢ? ዎይ ነዉ ሀ ማታ እሜዳዌ ኦኔ?" ያጌድኖ።

29 የሱስ ዛሪደ ኡንቱንታ፥ "ታንካ ህንተንታ እትባ ኦቻና፤ ታዉ ኦድተ፤ ታን ቃይ ሀዋ አይ ማታን ኦይታንቶ፥ ህንተንቶ ኦዳና። 30 ዮሃንስ ጻማቅያ ማታ አኬዳዌ ጾሳፔየ ዎይ አሳፔ? ታዉ ኦድተ" ያጌዳ።

31 ኡንቱንቱ ባረንቱ ግዶን ፓሉማ ዶሚደ፥ "ኑን፥ ‘ጾሳፐ ዬዳ’ ያጎፐ፥ እ ኑና፥ ‘ያትና፥ ዮሃንስ ኦዴዳዋ አያዉ አማንበይክቴ?’ ያጋና። 32 ሽን፥ ‘አሳፐ ዬዳ ጋኔ?’ " ያጌድኖ፤ ቃይ አሳይ ኡባይ ዮሃንስ ናብያ ግዴዳዋ ኤርያ ድራዉ፥ አሳዉ ያዬድኖ። 33 ሄዋ ድራዉ፥ ኡንቱንቱ የሱሳዉ፥ "ኑን ኤሮኮ" ያጊደ ዛሬድኖ።

የሱስ፥ "ታንካ ሀዋ አይ ማታን ኦይታንቶ፥ ህንተንቶ ኦድከ" ያጌዳ።