ናናዌ ካታማትዉ አየ አና!
1 ዳሮ አሳ ሱ ጉሴዳ ነነዌ ካታማትዉ አዬሮ! ዎርዱ እዝን ኩም ኡቴዳ። እዛ ዎልቃን አኬዳነ ቦንቄዳ ዱረታዉ ፓይዱ ባዋ። 2 ናናዌ ካታማትን ልሱዋ አርፔሉ፥ ፓራ ጋርያ ገድያ ጉንይ፥ ፓራቱዋ አንዳራሱነ ፓራ ጋረቱዋ ጉፋይ ስሰቴ። 3 ፓራ አሳቱ ነ ቦላ ዬድኖ፤ ማሻይ ጶሉጶሌ፤ ቶራቱካ ጶሊኖ። ዳሮ አሳይ ሀይቄዳ! አሃይ አሃ ቦላ ዶረቴዳ! ሀይቄዳባዉ ፓይዱ ባዋ! ሄዋና አደ ብያ አሳይካ አሃን በቴ። 4 ሀዌ ኡባይ ሀኔዳዌ ዛዋይ ባይና ነነዌ ጫራተ ጋሱዋና። እዛ ጮራ ሙሩኖ አቶ፤ ካዉተቱዋ ባረ ጫራተን፥ አሳካ ባረ ሙሩኑዋን አይለያዱ።
5 ኡባፐ ዎልቃማ መና ጎዳይ፥ "በአ፥ ታን ነ ቦላን ደንዳድ! ታን ነ ማዩዋ ነ ቦላፐ ቃራና፤ ነ ካሉዋ ጋደ አሳ፥ ነ ፖኩዋካ ካዉተቱዋ በሳና። 6 ታን ኔና ፕቱዋ ኦልያ ሳ ከሳና፤ ታን ኔና ካና፤ ቃይ አሳይ ኡባይ ኔናን ቅሊጭያዋ ኦና። 7 ኔና በእያ ኡባይ ኔፐ ሸልእ ጊደ፥ ‘በእተ፥ ናናዌ ካታማታ መላ ግዳዱ። እዝዉ ካዮትያዌ ኦኔ? እዞ ምንያዌካ ሀቃፐ ቤታንዴሻ!’ ያጋና" ያጌ።
8 ኔኖ ነነዌ ካታማቴ፥ ኔን ቴብሶ ግያ ግብጼ ካታማትፐ ዳራይ? እዞ ናይለ ሻፋይ ዶድ ዎዳ። ሻፋይ እዝዉ ተእያ ግምቢያ፤ ሃቱካ እዝዉ ድርሳ። 9 ቶጲነ ግብጼ እዝዉ ዛዋይ ባይና ዎልቃ፤ ፑጸነ ሊቢ እዞ ማድያዋንታ። 10 ግዶፐነ፥ እዛ ኦሞደታደ ባዱ፤ እዝን ደእያ ጉ ናናይካ ዳራጸቲደ፥ ኦግያ ጋጻን ኡባን ኩንዴድኖ። እዝ ቦንቼቴዳ አሳቱዋ ቦላን ሳማይ የገቴዳ፤ እዝ ዎልቃማ አሳቱ ኡባይካ ሳንላታን ቃሸቴድኖ።
11 ኔኖ ነነዌ ካታማቴ፥ ኔን ቃይ ማቲደ ጋንድጋርያ አሳዳን ሀናና። ነ ሞርከቱዋ ስንፐ ቆሰታደ አትያሳ ኔን ኮያና። 12 ነ ጌሳቱ ኡባይ ኮይሮ ቴሬዳ ቴራይ ጋዉጨቴዳ ባላስያ ምቱዋ ማላ፤ ሄ ባላስያ ም ቃያ ዎደ፥ ቴራይ ምያዎ ዶናን ዎ። 13 በአ፥ ነ ኦላንቻቱ ኡባይ ማጫ አሳ ማላ። ነ ዛዋ ፐንገቱካ ነ ሞርከቶ አኪደ ዶየቴድኖ፤ ጎርድያ ምካ ታማይ ም ድጌዳ።
14 ነ ሞርከቱ ኔና ዶዲደ ኡንኤያ ዎደ ኡሻናዉ ሃ ትካ። ነ ጌሱዋካ ምንሳ፤ ኡርቃ የ፤ አፐ ጹብያ መያ ሚሻን ጹብያ ጊግሳ። 15 ኔና ያን ታማይ ማና፤ ቦሊ ካ ምያዋዳን፥ ኔና ማሻን ቃንጸሬና።
ኔን ቦልያዳን ዳራ፤ ቦልያዋዳንካ ጮራታ። 16 ኔን ነ ዛልአንቻቱዋ ሳሉዋ ጾልንተቱዋፐ አደ ጮራያዳ። ሽን ሄዋንቱ ኡባይ ቦልያዳን ኡባባ ም ድጊደ፥ ፓል ያና። 17 ነ ካፓቱነ ማታይ ደእያዋንቱ፥ ሜጎ ጋላስ ድርሳ ቦላን ኡቲደ፥ አዋይ ከስያ ዎደ ፓል ይያ ቦለቱዋ ማላ፤ ኡንቱንቱ ቤዳ ሳካ ኤርያዌ ባዋ።
18 ኔኖ አሶረ ካተዉ፥ ነ ሄንንቻቱ ገምእሼድኖ፤ ነ ቦንቼቴዳ አሳቱካ ጌሮቴድኖ። ነ አሳይ ደረቱዋ ቦላን ላለቴዳ፤ ኡንቱንታ ሺሽያዌካ ባዋ። 19 ነ መኡ ኮለተና፤ ነ ማዱይካ ፓጸና። ነባ ስሴዳ ኡባይ ናሸቲደ፥ ኩሽያ ባቃና። አያዉ ጎፐ፥ ነ ዛዋይ ባይና ኢታተፐ ከስ አኬዳ አሳይ ሙለካ ባዋ።