ናሆማ 2

አሶራ ሁጰ ካታማ ናናዌ ባየ

1 ኔኖ ናናዌ ካታማዉ፥ ይስያባይ ዬዳ! ሄዋ ድራዉ፥ ነ ጌሱዋ ናጋ፤ ነ ኦግያካ ዎቻ፤ ነ ዳንጩዋ ምንሳ፤ ነ ዎልቃካ ሎይ ምንሳ።

2 ይስያዋንቱ፥ እስራኤልያ አሳነ ዎይንያ ቱራ ይሶፐካ፥ መና ጎዳይ እስራኤልያ ቦንቹዋነ ያቆባ ቦንቹዋ ዛራና።

3 ኦላንቻቱዋ ጎንዳላቱ ዞኦ፤ ኦላንቻቱካ ዞኦ ማዩዋ ማዬድኖ። ኡንቱንቱ ኦላዉ ጊግያ ዎደ፥ ፓራ ጋረቱዋ ብራታይ ታማ ላጩዋዳን ጶልቁ ጊኖ፤ ኡንቱንቱ ባረንቱ ቶራ ቶማካ ጊግሴድኖ። 4 ፓራ ጋረቱ ኦግያን አንዳራሱዋ ክንቺኖ፤ ኡንቱንቱ ያነ ሃነ ጃሚደ፥ ካታማ ኦግያን ዩዪኖ። ቃይ ኡንቱንቱ ላጩ ፖዱ ግያ ጾምፕያ ማላቲኖ፤ ዋልቃንዳንካ ኤሌሊኖ። 5 እ ባረ ኦላ ካፓቱዋ ጼሲደ ሺሼ፤ ሽን አ ካፓቱ ሀመቲደ በቲኖ። ኡንቱንቱ ካታማ ግምቢያ ድርሳኮ ኤሌሊኖ፤ ኡንቱንታ ሞርከቱዋ ቆሁዋፐ ናግያ ዎልቃማ ጎንዳሊ ጊጌዳ። 6 ሻፋ ባጋና ደእያ ካታማ ድርሳ ፐንገቱ ዶየቴድኖ፤ ካትያ ጎሊካ ሻቢረቴዳ። 7 ካታማታ ኦሞደታደ ባዱ፤ እዝ ማጫ ቆማቱካ ካዮቲደ፥ ሀራጰቱዋዳን ዋሲኖ፤ ባረንቱ ትራካ ባቂኖ።

8 ዳጋት ኡቴዳ ሃይ ፖክ በስና ጎግያዋዳን፥ ነነዌ አሳይ ካታማፐ ባቃታና። አሳይ ኡንቱንቱ ባረ ቃላ ቁ ኦደ፥ "ኤቂተ፤ ኤቂተ!" ያጊደ ጼሳና፤ ሽን ኦንነ ጉየ ጼለና። 9 ሄ ካታማ አቆ፥ አን ምንጀቴዳ ቦንቾ ሚሻስካ ፓይዱ ባዋ። ሄዋ ድራዉ፥ ሄ ብራ ቦንቂተ! ሄ ዎርቃካ ቃይ ቦንቂተ!

10 ነነዌ ካታማይ መላ ግዴዳ፤ ቃይ ኦኒደ ባዬዳ! አሳ ዎዛናይ ያሻን ሲሌዳ፤ ጋዱካ ኮኮሬዳ፤ አሳ ኡባ ጼሳይ ጋጅ ጋጄዳ፤ ሶምኢካ ቡላቴዳ! 11 ጋማቱዋ ጌሱዋ ማላ፥ ዎዳላ ጋማቱ ደኢያሳ ማላነ አቱማነ ማጫ ጋማቱ ባረንቱ ማራቱዋና ኡንቱንቱ ያሽስያዌ ባይናን፥ ዩይያ ዎራ ማላ ግዴዳ ናናዌ ካታማይ ሀእ ሀቃን ደኢ? 12 ጋሙ ባረ ማራቶ ግድያባ ኦይቄዳ፤ ማጫ ጋማትስካ መንሬደ እሜዳ። ባረ ጌሱዋ ሃስ ኦይቄዳዋን፥ ባረ ጎንጎሉዋካ ሃስ አሄዳ አሹዋን ኩንዳ።

13 ኡባፐ ዎልቃማ መና ጎዳይ ሀዋዳን ያጌ፤ "በአ፥ ታን ነ ቦላን ደንዳድ! ታን ነ ፓራ ጋረቱዋ ታማን ጹጋና፤ ነ ዎዳላ ጋማቱዋካ ማሻይ ማና። ኔን ሃሳይያዋ ታን ቢታ ኡባፐ ይሳና፤ ነዉ ኪተትያዋንቱ ቃላይካ ላኤን ሙለካ ስሰተና" ያጌ።